ଓଡ଼ିଶାରେ ଶୀତର ଆଗମନ: ୧୪ ଡିଗ୍ରୀ ସହ ଫୁଲବାଣୀ ସବୁଠାରୁ ଥଣ୍ଡା, ଆଗକୁ ଆହୁରି କମିବ ପାରଦ

ଭୁବନେଶ୍ୱର: ଓଡ଼ିଶାରେ ଧୀରେ ଧୀରେ ଶୀତର ପ୍ରକୋପ ବଢିବାରେ ଲାଗିଛି। ରାଜ୍ୟର ବିଭିନ୍ନ ସ୍ଥାନରେ ରାତିର ତାପମାତ୍ରା ହ୍ରାସ ପାଇବା ସହ ଶୀତୁଆ ଅନୁଭୂତି ହେଉଛି। ଭାରତୀୟ ପାଣିପାଗ ବିଭାଗ (IMD) ର ସଦ୍ୟତମ ସୂଚନା ଅନୁଯାୟୀ, ରାଜ୍ୟର ପ୍ରାୟ ସବୁ ଅଞ୍ଚଳରେ ପାରଦ ଖସିବାରେ ଲାଗିଛି।

ରାଜଧାନୀ ଭୁବନେଶ୍ୱର ଏବଂ କଟକରେ ମଧ୍ୟ ଶୀତର ପ୍ରଭାବ ଦେଖିବାକୁ ମିଳିଛି। ସୋମବାର ସକାଳ ୮.୩୦ ସୁଦ୍ଧା ରେକର୍ଡ ହୋଇଥିବା ତଥ୍ୟ ଅନୁଯାୟୀ, ଭୁବନେଶ୍ୱରରେ ସର୍ବନିମ୍ନ ତାପମାତ୍ରା ୧୮.୯ ଡିଗ୍ରୀ ସେଲସିୟସ୍ ରହିଥିବା ବେଳେ କଟକରେ ଏହା ୧୭.୬ ଡିଗ୍ରୀ ରହିଛି। ସହରର ବାସିନ୍ଦାମାନେ ସକାଳ ଏବଂ ସନ୍ଧ୍ୟା ସମୟରେ ହାଲୁକା ଶୀତ ଅନୁଭବ କରୁଛନ୍ତି।

ଆଭ୍ୟନ୍ତରୀଣ ଓଡ଼ିଶାରେ ଶୀତର ପ୍ରକୋପ ଅଧିକ ରହିଛି। ଫୁଲବାଣୀ ରାଜ୍ୟର ସବୁଠାରୁ ଥଣ୍ଡା ସହର ଭାବେ ପରିଗଣିତ ହୋଇଛି, ଯେଉଁଠାରେ ସର୍ବନିମ୍ନ ତାପମାତ୍ରା ୧୪ ଡିଗ୍ରୀ ସେଲସିୟସ୍ ରେକର୍ଡ କରାଯାଇଛି। ସେହିପରି ପର୍ଯ୍ୟଟନ ସ୍ଥଳୀ ଦାରିଙ୍ଗବାଡ଼ି ଏବଂ ଭବାନୀପାଟଣାରେ ତାପମାତ୍ରା ୧୫ ଡିଗ୍ରୀ ରହିଛି। ଝାରସୁଗୁଡ଼ା ଏବଂ ନବରଙ୍ଗପୁରରେ ୧୬ ଡିଗ୍ରୀ ଏବଂ କେନ୍ଦୁଝରରେ ୧୬.୬ ଡିଗ୍ରୀ ସେଲସିୟସ୍ ତାପମାତ୍ରା ରହିଛି।

ରାଜ୍ୟର ଅନ୍ୟ ଅନେକ ସ୍ଥାନରେ ମଧ୍ୟ ତାପମାତ୍ରା ୨୦ ଡିଗ୍ରୀ ତଳକୁ ଖସିଛି। ରାୟଗଡ଼ା (୧୭ ଡିଗ୍ରୀ), ବଲାଙ୍ଗୀର (୧୭.୨ ଡିଗ୍ରୀ), ଦେବଗଡ଼ (୧୭.୪ ଡିଗ୍ରୀ), ପାରଳାଖେମୁଣ୍ଡି (୧୭.୫ ଡିଗ୍ରୀ) ଏବଂ ହୀରାକୁଦ (୧୭.୮ ଡିଗ୍ରୀ) ରେ ଶୀତୁଆ ପାଣିପାଗ ଜାରି ରହିଛି। ଏହା ବ୍ୟତୀତ ସୁନ୍ଦରଗଡ଼, ସମ୍ବଲପୁର, ମାଲକାନଗିରି, ସୋନପୁର, ଯାଜପୁର, ଢେଙ୍କାନାଳ, ଭଦ୍ରକ, ବୌଦ୍ଧ, କୋରାପୁଟ ଏବଂ ବରଗଡ଼ରେ ମଧ୍ୟ ପାରଦ ୧୮ ରୁ ୧୯.୬ ଡିଗ୍ରୀ ମଧ୍ୟରେ ରହିଛି।

ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ, ଶୀତର ପ୍ରକୋପ ଆଗକୁ ଆହୁରି ବଢିବ। ଆଗାମୀ ୨ ରୁ ୩ ଦିନ ମଧ୍ୟରେ ରାଜ୍ୟର ସର୍ବନିମ୍ନ ତାପମାତ୍ରାରେ ଆହୁରି ୨ ରୁ ୪ ଡିଗ୍ରୀ ପର୍ଯ୍ୟନ୍ତ ହ୍ରାସ ଘଟିବାର ସମ୍ଭାବନା ରହିଛି। ଏହି ପୂର୍ବାନୁମାନ ପରେ ଲୋକମାନେ ଏବେଠାରୁ ଶୀତ ପୋଷାକ ବାହାର କରିବା ଆରମ୍ଭ କଲେଣି।