ସୁରଟ ବ୍ୟବସାୟୀଙ୍କ ଦୀପାବଳି ଉପହାର: ପ୍ରତ୍ୟେକ କର୍ମଚାରୀଙ୍କୁ ଦେଲେ ୧ ଲକ୍ଷ ଟଙ୍କାର କ୍ୟାଶ୍ ବୋନସ

ନୂଆଦିଲ୍ଲୀ: ଦୀପାବଳି ଅବସରରେ ସାଧାରଣତଃ କମ୍ପାନୀଗୁଡ଼ିକ ମିଠା ବା ଶୁଖିଲା ଫଳର ପ୍ୟାକେଟ୍ ଦେଇ କାମ ସାରିଦିଅନ୍ତି। କିନ୍ତୁ ଗୁଜରାଟର ସୁରଟ ସହରର ଜଣେ ଟେକ୍ସଟାଇଲ୍ ବ୍ୟବସାୟୀ ଏହି ପରମ୍ପରାକୁ ଭାଙ୍ଗି ନିଜ କର୍ମଚାରୀଙ୍କୁ ଏକ ବଡ଼ ସରପ୍ରାଇଜ୍ ଦେଇଛନ୍ତି। ବ୍ୟବସାୟୀ ରାମସ୍ୱରୂପ ମୁନ୍ଦେ ତାଙ୍କର ୨୦ ଜଣ କର୍ମଚାରୀଙ୍କୁ ଜଣପିଛା ୧ ଲକ୍ଷ ଟଙ୍କାରୁ ଅଧିକ ନଗଦ କ୍ୟାସ ବୋନସ ପ୍ରଦାନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି।

ଏହି ବୋନସ ପ୍ରଦାନ କରିବାର ଶୈଳୀ ବେଶ୍ ଆକର୍ଷଣୀୟ ଥିଲା। କୌଣସି ସାଧାରଣ ଲଫାପାରେ ନୁହେଁ, ବରଂ ରୁପା ପରି ଚିକ୍‌ଚିକ୍ କରୁଥିବା ପୂଜା ଥାଳିରେ ଟଙ୍କା ବିଡ଼ାଗୁଡ଼ିକୁ ସୁନ୍ଦର ଭାବେ ସଜାଇ ରଖାଯାଇଥିଲା। ଏଥିରେ ୧୦ ଟଙ୍କାରୁ ଆରମ୍ଭ କରି ୫୦୦ ଟଙ୍କା ପର୍ଯ୍ୟନ୍ତ ନୂଆ ନୋଟ୍ ରହିଥିଲା। ସବୁଠାରୁ ଭାବପ୍ରବଣ କଥା ହେଉଛି, ଏହି ଉପହାର କର୍ମଚାରୀଙ୍କୁ ସେମାନଙ୍କ ନିଜ ପତ୍ନୀଙ୍କ ହାତରେ ପ୍ରଦାନ କରାଯାଇଥିଲା। ଏହି ନିଆରା ପରମ୍ପରା କର୍ମଚାରୀଙ୍କ ପାଇଁ ଏକ ସ୍ମରଣୀୟ ମୁହୂର୍ତ୍ତ ସୃଷ୍ଟି କରିଥିଲା।

ନିଜର ଏହି ମହାନତା ସମ୍ପର୍କରେ ରାମସ୍ୱରୂପ କହିଛନ୍ତି ଯେ, ସେ ତାଙ୍କ କର୍ମଚାରୀଙ୍କୁ କେବଳ ଶ୍ରମିକ ଭାବେ ନୁହେଁ, ବରଂ ନିଜ ପରିବାରର ଏକ ଅଂଶ ଭାବେ ଦେଖନ୍ତି। ସେ ଚାହୁଁଥିଲେ ଯେ ତାଙ୍କ ସହ କାନ୍ଧକୁ କାନ୍ଧ ମିଳାଇ କାମ କରୁଥିବା ଏହି ଲୋକମାନେ କୌଣସି ଆର୍ଥିକ ଅଭାବ ନଥାଇ ଖୁସିରେ ଦୀପାବଳି ପାଳନ କରନ୍ତୁ। ତାଙ୍କ ମତରେ, ଯଦି କର୍ମଚାରୀମାନେ ପରିଶ୍ରମ କରି ବ୍ୟବସାୟ ବଢ଼ାଉଛନ୍ତି, ତେବେ ସେମାନଙ୍କ ପରିବାର ମଧ୍ୟ ଖୁସିରେ ପର୍ବ ପାଳନ କରିବାର ଅଧିକାର ରଖନ୍ତି।

ଏହି ବୋନସ ବିତରଣର ଏକ ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି। ଏହି ଅପ୍ରତ୍ୟାଶିତ ଉପହାର ପାଇ କିଛି କର୍ମଚାରୀ ଭାବୁକ ହୋଇ କାନ୍ଦି ପକାଉଥିବା ଭିଡିଓରେ ଦେଖିବାକୁ ମିଳିଛି। ଇଣ୍ଟରନେଟ୍ ବ୍ୟବହାରକାରୀମାନେ ବ୍ୟବସାୟୀଙ୍କ ଏହି ନିଷ୍ପତ୍ତିକୁ ଖୁବ୍ ପ୍ରଶଂସା କରୁଛନ୍ତି। ଜଣେ ୟୁଜର ଲେଖିଛନ୍ତି, "ଭଗବାନ ସମସ୍ତଙ୍କୁ ଏମିତି ଜଣେ ମାଲିକ ଦିଅନ୍ତୁ"। ସେହିପରି ଅନ୍ୟ ଜଣେ ଲେଖିଛନ୍ତି ଯେ, ଧନ ଟଙ୍କାରେ ମପାଯାଏ ନାହିଁ, ବରଂ ଏମିତି ଏକ ବଡ଼ ହୃଦୟରେ ମପାଯାଏ।