ପୁରୁଣା ହିତାଧିକାରୀଙ୍କୁ ପ୍ରତି ମାସରେ ଭତ୍ତା ଦେଇପାରୁ ନଥିବା ବିଜେପି ସରକାର, ନୂଆ ହିତାଧିକାରୀଙ୍କୁ ସାମିଲ କରିବା ଏକ ପ୍ରହସନ: ବିଜେଡି

ଭୁବନେଶ୍ୱର: ଓଡ଼ିଶାରେ ସାମାଜିକ ସୁରକ୍ଷା ପେନସନର ମୂଳଦୁଆ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ହୋଇଥିଲା। ବିଜେଡିର ୨୪ ବର୍ଷ ଶାସନ କାଳରେ ସାମାଜିକ ସୁରକ୍ଷା ପେନସନ ହିତାଧିକାରୀଙ୍କ ସଂଖ୍ୟା ୨୦୦୦ ମସିହାରେ ୩.୫୩ ଲକ୍ଷରୁ ବୃଦ୍ଧି ପାଇ ୨୦୨୪ ମସିହାରେ ୩୬ ଲକ୍ଷରେ ପହଞ୍ଚିଥିଲା । ଅର୍ଥାତ୍‌ ହିତାଧିକାରୀଙ୍କ ସଂଖ୍ୟା ୧୨ ଗୁଣ ବୃଦ୍ଧି ପାଇଥିଲା। ଅପରପକ୍ଷେ ବିଜେପି ସରକାରକୁ ଆସିବା ପରେ ରାଜ୍ୟରେ ଭତ୍ତା ସମସ୍ୟା ଦେଖା ଦେଇଛି। ଆସନ୍ତା ପଞ୍ଚାୟତ ନିର୍ବାଚନକୁ ଦୃଷ୍ଟିରେ ରଖି ବିଜେପି ରାଜନୈତିକ ଗୋଟିଚାଳନା କରୁଛି। ପୁରୁଣା ହିତାଧିକାରୀଙ୍କୁ ପ୍ରତି ମାସରେ ଭତ୍ତା ଦେଇପାରୁ ନଥିବା ବିଜେପି ସରକାର, ନୂଆ ହିତାଧିକାରୀଙ୍କୁ ସାମିଲ କରିବା ଏକ ପ୍ରହସନ ବୋଲି ଅଭିଯୋଗ କରିଛି ବିଜେଡି।

ଏକ ପ୍ରେସ ବିବୃତ୍ତି ମାଧ୍ୟମରେ ଗଣମାଧ୍ୟମ ସଂଯୋଜକ ଡ. ଲେନିନ ମହାନ୍ତି କହିଛନ୍ତି  ଯେ ୧ ଜାନୁଆରୀ ୨୦୦୮ରେ ମଧୁବାବୁ ପେନସନ ଯୋଜନା ଆରମ୍ଭ କରି ବିଜେଡି ସରକାର ଏକ ଐତିହାସିକ ପଦକ୍ଷେପ ନେଇଥିଲା। ଏହି ଯୋଜନା ମାଧ୍ୟମରେ ୬୦ ବର୍ଷ ଓ ତଦୂର୍ଦ୍ଧ ବୃଦ୍ଧବୃଦ୍ଧା, ବିଧବା, ଦିବ୍ୟାଙ୍ଗ ଓ ଅନ୍ୟାନ୍ୟ ନିରାଶ୍ରୟ ବର୍ଗଙ୍କୁ ମାସିକ ପେନସନ ପ୍ରଦାନ କରାଯାଉଥିଲା । ବିଜେଡି ସରକାର କ୍ରମାଗତ ଭାବେ ସାମାଜିକ ସୁରକ୍ଷା ପେନସନର ରାଶି ବୃଦ୍ଧି କରିଥିଲେ । ଲକ୍ଷାଧିକ ହିତାଧିକାରୀଙ୍କୁ ଅନ୍ତର୍ଭୁକ୍ତ କରି ୨୦୨୪ ମସିହାରେ ହିତାଧିକାରୀଙ୍କ ସଂଖ୍ୟା ପ୍ରାୟ ୩୬ ଲକ୍ଷରେ ପହଞ୍ଚିଥିଲା । ମିଶନ ଶକ୍ତି, ମମତା, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା, ରାଜ୍ୟ ଖାଦ୍ୟ ସୁରକ୍ଷା ଯୋଜନା ଭଳି ଯୋଜନାଗୁଡ଼ିକ ସବୁଠାରୁ ଦୁର୍ବଳ ବର୍ଗଙ୍କ ପାଇଁ ଏକ ମଜବୁତ ସୁରକ୍ଷାକୁ ସୁଦୃଢ଼ କରିଥିଲା। ଡ. ମହାନ୍ତି ଆହୁରି କହିଥିଲେ ଯେ ବିଜେପି ସରକାର କ୍ଷମତାକୁ ଆସିବାର ପ୍ରାୟ ୩୦ ମାସ ମଧ୍ୟରେ କେବଳ ପ୍ରାୟ ୫ ଲକ୍ଷ ହିତାଧିକାରୀ ସାମିଲ କରିଛନ୍ତି। ଶ୍ରୀଯୁକ୍ତ ପଟ୍ଟନାୟକଙ୍କ ଅଧୀନରେ ୨୪ ବର୍ଷରେ ହୋଇଥିବା ୧୨ ଗୁଣ ବୃଦ୍ଧି ସହ ତୁଳନାରେ ଏହାର ପରିସର ସୀମିତ ରହିଛି। ଓଡ଼ିଶାରେ ସାମାଜିକ ସୁରକ୍ଷା ପେନସନ ଭଳି ଜନକଲ୍ୟାଣକାରୀ ଯୋଜନାର ପ୍ରକୃତ ଶ୍ରେୟ ନବୀନ ପଟ୍ଟନାୟକ ସରକାରଙ୍କୁ ଯାଏ। ବର୍ତ୍ତମାନର ବିଜେପି ସରକାର ଏହି ଯୋଜନାକୁ ନେଇ ରାଜନୈତିକୀକରଣ କରିବା ବନ୍ଦ କରନ୍ତୁ। ନିର୍ବାଚନୀ ଉଦ୍ଦେଶ୍ୟ ବିନା ଯୋଜନା ଗୁଡ଼ିକର ସ୍ୱଚ୍ଛ, ନିରନ୍ତର ସୁଦୃଢ଼ୀକରଣ ଉପରେ ଧ୍ୟାନ ଦିଅନ୍ତୁ ବୋଲି ବିଜେଡି ଦାବି କରିଛି।