ରାଜଧାନୀରେ ପୁଣି ଲଜ୍ଜା: ଚାକିରି ଲୋଭ ଦେଖାଇ ବିବାହିତା ମହିଳାଙ୍କୁ ଦୁଷ୍କର୍ମ, ଭିଡିଓ ଦେଖାଇ ବ୍ଲାକମେଲିଂ ଅଭିଯୋଗ

ଭୁବନେଶ୍ୱର: ରାଜଧାନୀରେ ପୁଣି ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଚାକିରି ସନ୍ଧାନରେ ଆସିଥିବା ମହିଳା ଦୁଷ୍କର୍ମର ଶିକାର ହୋଇଛନ୍ତି। ଖାଲି ସେତିକି ନୁହେଁ, ଦୁଷ୍କର୍ମ ବେଳର ଭିଡିଓ ଦେଖାଇ ବ୍ଲାକମେଲିଂ କରିଛି। ଗୌତମ ନଗର ଅଞ୍ଚଳରେ ଏଭଳି ଘଟଣା ଘଟିଥିବା ବେଳେ ପୀଡ଼ିତା ମହିଳା ଥାନାରେ ଏତଲା ଦେଇଛନ୍ତି। ଅଭିଯୋଗ କ୍ରମେ ମାମଲା ରୁଜୁ କରିବା ସହ ଅଭିଯୁକ୍ତକୁ ଗିରଫ କରିଛି ମହିଳା ଥାନା ପୁଲିସ। ଗିରଫ ଅଭିଯୁକ୍ତ ହେଉଛି ଗୌତମ ନଗରରେ ରହୁଥିବା ପଟ୍ଟାମୁଣ୍ଡାଇ ଥାନା ଅଞ୍ଚଳର ଦିନେଶ କୁମାର ସେଠୀ (୨୬)।

ପୁଲିସ କହିବା ମୁତାବକ, ମହିଳା ଜଣକ ବିବାହିତା ହୋଇଥିବା ବେଳେ ତାଙ୍କର ଗୋଟିଏ ଝିଅ ଅଛନ୍ତି। ସ୍ୱାମୀ ରାଜ୍ୟ ବାହାରେ କାମ କରୁଥିବାରୁ ସେ ମାସେ ହେବ ଚାକିରି ଉଦ୍ଦେଶ୍ୟରେ ଭୁବନେଶ୍ୱରରେ ରହୁଥିଲେ। ଗତ ୬ ତାରିଖ ଦିନ ସ୍ନାପଚାଟ୍‌ ମାଧ୍ୟମରେ ତାଙ୍କର ଦିନେଶ ନାମକ ଜଣେ ଯୁବକଙ୍କ ସହ ପରିଚୟ ହୋଇଥିଲା । ଦିନେଶ ନିଜକୁ ଏକ ନିର୍ମାଣ କାର୍ଯ୍ୟସ୍ଥଳର ସୁପରଭାଇଜର ବୋଲି ପରିଚୟ ଦେଇ ଗୌତମ ନଗରସ୍ଥିତ ନିର୍ମାଣସ୍ଥଳରେ ତାଙ୍କୁ ଚାକିରି କରାଇ ଦେବାର ପ୍ରତିଶ୍ରୁତି ଦେଇଥିଲା। ଆଶ୍ୱାସନା ପାଇ ମହିଳା ଜଣକ ଗତ ୭ ତାରିଖ ସନ୍ଧ୍ୟାରେ ଗୌତମ ନଗର ସ୍ଥିତ ନିର୍ମାଣଧିନ ପ୍ରକଳ୍ପକୁ ଆସିଥିଲେ।

କିଛି ସମୟ କଥାବାର୍ତ୍ତା ପରେ ଦିନେଶ ତାଙ୍କୁ ନିଜ ରୁମକୁ ଡାକି ନେଇ ଚାକିରି ଦେବା ପାଇଁ ତାଙ୍କ ସହ ଶାରୀରିକ ସମ୍ପର୍କ ରଖିବାକୁ କହିଥିଲେ। ଏହାସହିତ ରୁମ୍‌ ଭିତରେ ମହିଳାଙ୍କୁ ଜୋରଜବରଦସ୍ତ ଦୁଷ୍କର୍ମ କରିଥିଲା। ଘଟଣା ସମ୍ପର୍କରେ କାହାରିକୁ ଜଣାଇଲେ ଗୁରୁତର ପରିଣାମ ଭୋଗିବାକୁ ପଡ଼ିବ ବୋଲି ଧମକ ଦେଇଥିଲା। ମହିଳା ଜଣକ ନିନ୍ଦା ଅପବାଦ ଭୟରେ ଘଟଣା ସମ୍ପର୍କରେ କାହାକୁ ଜଣାଇନଥିଲେ। ୧୦ ତାରିଖ ସକାଳେ ଦିନେଶ ନିଜ ହ୍ୱାଟ୍ସଆପ୍‌ ନମ୍ବରରୁ ମହିଳାଙ୍କ ମୋବାଇଲକୁ ଦୁଷ୍କର୍ମ ବେଳର ଭିଡିଓ ପଠାଇଥିଲା। ବ୍ଲାକମେଲ୍‌ କରି ଏକଲକ୍ଷ ଟଙ୍କା ଦାବି କରିବା ସହ ପୁନର୍ବାର ଦେଖା କରିବାକୁ ଦାବି କରିଥିଲା। ଭୟ ଓ ଚାପରେ ମହିଳା ଜଣକ ତାଙ୍କ କଥା ମାନିଥିଲେ। କିନ୍ତୁ ଅଭିଯୁକ୍ତ ବାରମ୍ବାର ସମାନ ଦାବି କରି ତାଙ୍କୁ ହଇରାଣ କରି ଚାଲିଥିଲା।

ନିର୍ଯାତନା ସହି ନପାରି ମହିଳା ଜଣକ ସମସ୍ତ ଘଟଣା ନିଜ ସ୍ୱାମୀଙ୍କୁ ଜଣାଇଥିଲେ। ତାଙ୍କ ସ୍ୱାମୀ ଦିନେଶର ମୋବାଇଲ ନମ୍ବର ସଂଗ୍ରହ କରି ଯୋଗାଯୋଗ କରିବାରୁ ସେ ପ୍ରତିଶୋଧ ପରାୟଣ ହୋଇ ମହିଳାଙ୍କ ସମସ୍ତ ନଗ୍ନ ଫଟୋ ତାଙ୍କ ସ୍ୱାମୀଙ୍କ ମୋବାଇଲକୁ ପଠାଇଥିଲା। ଏଥିସହ ଉକ୍ତ ଫଟୋ ଓ ଭିଡିଓକୁ ସୋସିଆଲ ମିଡିଆରେ ଭାଇରାଲ୍‌ କରିବା ସହ ମହିଳାଙ୍କୁ ହତ୍ୟା କରିବାର ଧମକ ମଧ୍ୟ ଦେଇଥିଲା। ଏନେଇ ପୀଡ଼ିତା ଜଣକ ମହିଳା ଥାନାରେ ଏତଲା ଦେବାପରେ ପୁଲିସ ବାପୁଜୀନଗରରୁ ଦିନେଶକୁ କାବୁ କରିବା ସହ ତା' ନିକଟରୁ ଗୋଟିଏ ମୋବାଇଲ ଫୋନ୍‌ ଜବତ କରିଥିଲା। ଯାଞ୍ଚ ସମୟରେ ଉକ୍ତ ମୋବାଇଲରେ ମହିଳାଙ୍କ ଅଶ୍ଳୀଳ ଫଟୋ ଓ ଭିଡିଓ ଥିବା ଜଣାପଡ଼ିଥିଲା।