କୋଟିଆରେ ଆନ୍ଧ୍ରର ନିର୍ବାଚନୀ ଚାଲ୍: ବିରୋଧ ପାଇଁ ଓଡ଼ିଶାର ସବୁ ଦଳ ଏକଜୁଟ୍, ସୀମାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି

ଭୁବନେଶ୍ୱର: ଓଡ଼ିଶା ଏବଂ ଆନ୍ଧ୍ରପ୍ରଦେଶ ମଧ୍ୟରେ ବିବାଦୀୟ କୋଟିଆ ଅଞ୍ଚଳରେ ଏବେ ଉତ୍ତେଜନା ପ୍ରକାଶ ପାଇଛି। ଆନ୍ଧ୍ରପ୍ରଦେଶର ନିର୍ବାଚନୀ କାର୍ଯ୍ୟକଳାପକୁ ପ୍ରତିହତ କରିବା ପାଇଁ ଓଡ଼ିଶା ସରକାର ସେଠାରେ ୭ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରିଛନ୍ତି। ଏହାସହ ଆନ୍ତଃ-ରାଜ୍ୟ ସୀମାରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି। ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ମଙ୍ଗଳବାର ଏହି ସୂଚନା ଦେଇଛନ୍ତି।

କୋଟିଆବାସୀ ଆନ୍ଧ୍ରର ନିର୍ବାଚନୀ କାର୍ଯ୍ୟକୁ ବିରୋଧ କରୁଥିବା ବେଳେ କୋରାପୁଟର ସମସ୍ତ ରାଜନୈତିକ ଦଳ କୋଟିଆର ସ୍ୱାର୍ଥ ରକ୍ଷା ପାଇଁ ଏକଜୁଟ ହୋଇଛନ୍ତି। ସ୍ଥାନୀୟ ବାସିନ୍ଦା, ରାଜନୈତିକ ପ୍ରତିନିଧି ଏବଂ ସାମାଜିକ ସଂଗଠନର କର୍ମକର୍ତ୍ତାମାନେ ମତଦାନ ଦିନ କୋଟିଆରେ ଉପସ୍ଥିତ ରହି ଏହାକୁ ବିରୋଧ କରିବେ ବୋଲି ଆଶା କରାଯାଉଛି। ଶାନ୍ତିଶୃଙ୍ଖଳା ରକ୍ଷା ପାଇଁ ପ୍ରଶାସନ ପକ୍ଷରୁ ସୀମାରେ ବିଭିନ୍ନ ଚେକ୍ ପୋଷ୍ଟ ସ୍ଥାପନ କରାଯାଇଛି। ସିନିୟର ପ୍ରଶାସନିକ ଅଧିକାରୀମାନେ ମଧ୍ୟ ସ୍ଥିତି ଉପରେ ନଜର ରଖିଛନ୍ତି।

ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି ଯେ, ଆନ୍ଧ୍ରପ୍ରଦେଶ ଏଥର କୋଟିଆ ବାହାରେ ମତଦାନ କେନ୍ଦ୍ର ସ୍ଥାପନ କରିଛି । ସ୍ଥାନୀୟ ଲୋକେ ଆନ୍ଧ୍ରରୁ ଆସୁଥିବା ଚାଉଳ ଗାଡ଼ି ଓ ସେଠାକାର ପ୍ରଶାସନିକ ଅଧିକାରୀଙ୍କୁ ଫେରାଇ ଦେଇଥିବା ରିପୋର୍ଟ ମଧ୍ୟ ମିଳିଛି। କୋଟିଆବାସୀ ଓଡ଼ିଶା ସରକାରଙ୍କ ସହାୟତା, ବିଶେଷ କରି ବାତ୍ୟା ସମୟରେ ମିଳିଥିବା ସାହାଯ୍ୟକୁ ମନେ ରଖିଛନ୍ତି ବୋଲି ସେ କହିଛନ୍ତି।

କୋଟିଆ ବିବାଦର ଇତିହାସ ବିଷୟରେ ସୂଚନା ଦେଇ ମନ୍ତ୍ରୀ କହିଛନ୍ତି ଯେ, ୧୯୬୮ ମସିହାରେ ତତ୍କାଳୀନ ଓଡ଼ିଶା ସରକାର ସର୍ବୋଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ। ୨୦୧୦ ରେ ମାମଲା ହାରିବା ପରେ ୨୦୨୧ ରେ ପୁଣି ଥରେ ଅଦାଲତ ଅବମାନନା ମାମଲା କରାଯାଇଥିଲା। ବର୍ତ୍ତମାନର ସରକାର ମଧ୍ୟ ଏହି ପ୍ରସଙ୍ଗରେ ଆଉ ଏକ ପିଟିସନ ଦାଖଲ କରିଛନ୍ତି। ଆନ୍ଧ୍ରପ୍ରଦେଶର ମୁଖ୍ୟ ଶାସନ ସଚିବ ଏବଂ ଜିଲ୍ଲାପାଳଙ୍କ ବିରୋଧରେ କୋର୍ଟରେ ମାମଲା ରୁଜୁ ହୋଇଛି। ଏହି ସାମ୍ବିଧାନିକ ସଙ୍କଟର ସମାଧାନ ପାଇଁ ଓଡ଼ିଶା ସରକାର ଆଇନଗତ ପରାମର୍ଶ ନେଉଛନ୍ତି।