ଶିଳ୍ପପତି ପରିଚୟ ଦେଇ ୧.୪୭ କୋଟି ଟଙ୍କା ଠକେଇ: ଠକ ଦମ୍ପତିଙ୍କୁ ଗିରଫ କଲା କମିଶନରେଟ୍ ପୋଲିସ

ଭୁବନେଶ୍ୱର: ଭୁବନେଶ୍ୱରରେ ଏକ ବଡ଼ ଧରଣର ଠକେଇ ମାମଲା ସାମ୍ନାକୁ ଆସିଛି। ଜଣେ ବ୍ୟକ୍ତିଙ୍କୁ ପ୍ଲଟ୍ ଏବଂ ଘର ଯୋଗାଇଦେବା ନାଁରେ ୧.୪୭ କୋଟି ଟଙ୍କା ଠକେଇ କରିଥିବା ଅଭିଯୋଗରେ କମିଶନରେଟ୍ ପୋଲିସ ଏକ ଦମ୍ପତିଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ଟଙ୍କପାଣି ରୋଡ୍ ଅଞ୍ଚଳର ଶ୍ରୀମନ୍ତ କଳସ ଏବଂ ତାଙ୍କ ପତ୍ନୀ ସୌମ୍ୟା ଶୁଭଦର୍ଶିନୀ କଳସ। 

ପୋଲିସର ସୂଚନା ଅନୁଯାୟୀ, ଏହି ଦମ୍ପତି ନିଜକୁ ବଡ଼ ଶିଳ୍ପପତି ଭାବେ ପରିଚୟ ଦେଇ ଲୋକଙ୍କ ବିଶ୍ୱାସ ଜିତୁଥିଲେ। ସେମାନେ ନିଜକୁ 'ସୌମ୍ୟଶ୍ରୀ ମେଟାଲ୍ସ ମେସିନାରୀ'ର ମାଲିକ ବୋଲି କହିବା ସହ ଚୌଦ୍ୱାର ଶିଳ୍ପାଞ୍ଚଳରେ ସେମାନଙ୍କର କମ୍ପାନୀ ଥିବା ଦାବି କରିଥିଲେ। ଏଥିସହିତ ଖୋର୍ଦ୍ଧାରେ 'ଏମଏସ ଷ୍ଟ୍ରିକ୍ ଇଣ୍ଡଷ୍ଟ୍ରିଜ୍' (MS Strick Industries) ର ମାଲିକାନା ମଧ୍ୟ ସେମାନଙ୍କ ପାଖରେ ଥିବା କହି ଲୋକଙ୍କୁ ପ୍ରଭାବିତ କରୁଥିଲେ। 

ଅଭିଯୋଗ ଅନୁଯାୟୀ, ସେମାନେ ସୁଧୀର ପାଣିଗ୍ରାହୀ ନାମକ ଜଣେ ବ୍ୟକ୍ତିଙ୍କୁ ଭୁବନେଶ୍ୱରରେ ପ୍ଲଟ୍ ଯୋଗାଇଦେବାକୁ ପ୍ରତିଶ୍ରୁତି ଦେଇଥିଲେ। ଏହି ବାବଦରେ ସେମାନେ ତାଙ୍କଠାରୁ ବିଭିନ୍ନ ପର୍ଯ୍ୟାୟରେ ମୋଟ ୧ କୋଟି ୪୭ ଲକ୍ଷ ୬୦ ହଜାର ଟଙ୍କା ହଡ଼ପ କରିଥିଲେ। ଟଙ୍କା ଦେବା ପରେ ମଧ୍ୟ ପ୍ଲଟ୍ ନମିଳିବାରୁ ସୁଧୀର ପୋଲିସର ଦ୍ୱାରସ୍ଥ ହୋଇଥିଲେ। କମିଶନରେଟ୍ ପୋଲିସ ଏହି ଘଟଣାର ତଦନ୍ତ କରି ଦମ୍ପତିଙ୍କୁ ଗିରଫ କରିଛି। ଏହି ଠକେଇ ଘଟଣାରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି କିମ୍ବା ଏହି ଦମ୍ପତି ଆଉ କେତେ ଜଣଙ୍କୁ ଠକିଛନ୍ତି, ସେ ନେଇ ପୋଲିସ ଅଧିକ ଖୋଳତାଡ଼ ଜାରି ରଖିଛି।