ଗଞ୍ଜାମର ସୁନାପୁର ବେଳାଭୂମିରେ ଅଘଟଣ: ସମୁଦ୍ରରେ ଗାଧୋଇବା ବେଳେ ଭାସିଗଲେ ଯୁକ୍ତ ଦୁଇ ଛାତ୍ର

ଗଞ୍ଜାମ: ସୁନାପୁର ସମୁଦ୍ରରେ ଭାସିଗଲେ ଯୁକ୍ତ ୨ ଛାତ୍ର । ଗଞ୍ଜାମ ଜିଲ୍ଲା ଚିକିଟି ବ୍ଲକ୍ ଅନ୍ତର୍ଗତ ସୁନାପୁର ବେଳାଭୂମିରେ ଘଟିଛି ଏପରି ଏକ ଦୁଃଖଦ ଘଟଣା । ସମୁଦ୍ରରେ ସାଙ୍ଗମାନଙ୍କ ସହ ଗାଧୋଉଥିବା ବେଳେ ପ୍ରବଳ ସୁଅରେ ଜଣେ ଯୁକ୍ତ ଦୁଇ ଛାତ୍ର ଭାସିଯାଇ ନିଖୋଜ ହୋଇଯାଇଛନ୍ତି। ମଙ୍ଗଳବାର ସନ୍ଧ୍ୟାରେ ଘଟିଥିବା ଏହି ଅଘଟଣ ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ନିଖୋଜ ଛାତ୍ର ଜଣକ ହେଲେ ଚିକିଟି ଅଞ୍ଚଳର କୋଟିଲିଙ୍ଗା ଗ୍ରାମର ଏ. ଯୁଧିଷ୍ଠିର।

ସୂଚନା ଅନୁଯାୟୀ, ମଙ୍ଗଳବାର ସନ୍ଧ୍ୟାରେ ଏ. ଯୁଧିଷ୍ଠିର ଏବଂ ତାଙ୍କର କିଛି ସାଙ୍ଗ ମିଶି ଜଣେ ବନ୍ଧୁଙ୍କ ଜନ୍ମଦିନ ପାଳନ କରିବା ପାଇଁ ସୁନାପୁର ବେଳାଭୂମିକୁ ଯାଇଥିଲେ। ସେଠାରେ ଭୋଜିଭାତ ଖାଇବା ପରେ କିଛି ଯୁବକ ସମୁଦ୍ରରେ ଗାଧୋଇବାକୁ ଯାଇଥିଲେ। ତେବେ ଗାଧୋଇବା ସମୟରେ ହଠାତ୍ ସମୁଦ୍ରର ପ୍ରବଳ ଲହଡ଼ି ଆସିବାରୁ ଯୁଧିଷ୍ଠିର ସେଥିରେ ଭାସିଯାଇଥିଲେ। ସାଙ୍ଗମାନେ ତାଙ୍କୁ ବହୁ ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ପାଇନଥିଲେ। ପରେ ସ୍ଥାନୀୟ ପ୍ରଶାସନ ଓ ଉଦ୍ଧାରକାରୀ ଦଳକୁ ଖବର ଦିଆଯାଇଥିଲା।

ଘଟଣା ସମ୍ପର୍କରେ ଖବର ପାଇ ସ୍ଥାନୀୟ ପ୍ରଶାସନ ଓ ଓଡ୍ରାଫ୍ (ODRAF) ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ବର୍ତ୍ତମାନ ସୁଦ୍ଧା ସମୁଦ୍ରରେ ବ୍ୟାପକ ଖୋଜାଖୋଜି ଅଭିଯାନ ଜାରି ରହିଛି, କିନ୍ତୁ ନିଖୋଜ ଛାତ୍ରଙ୍କର କୌଣସି ସନ୍ଧାନ ମିଳିପାରି ନାହିଁ। ଅନ୍ୟପକ୍ଷରେ, ସମୁଦ୍ର ଅଶାନ୍ତ ଥିବାରୁ ପର୍ଯ୍ୟଟକମାନେ ସତର୍କତା ଅବଲମ୍ବନ କରିବାକୁ ଏବଂ ପ୍ରବଳ ସୁଅ ଥିବା ସମୟରେ ପାଣି ଭିତରକୁ ନଯିବାକୁ ପ୍ରଶାସନ ପକ୍ଷରୁ କଡ଼ା ପରାମର୍ଶ ଦିଆଯାଇଛି।