ଭୁବନେଶ୍ୱରର କେଦାରଗୌରୀ ମନ୍ଦିର ପରିସରକୁ 'ସଂରକ୍ଷିତ ସ୍ମାରକୀ' ଘୋଷଣା କଲେ ରାଜ୍ୟ ସରକାର

ଭୁବନେଶ୍ୱର: ଭୁବନେଶ୍ୱରର ଐତିହାସିକ କେଦାରଗୌରୀ ମନ୍ଦିର ପରିସରକୁ ରାଜ୍ୟ ସରକାର ଏକ ସଂରକ୍ଷିତ ସ୍ମାରକୀ ଭାବରେ ଘୋଷଣା କରିଛନ୍ତି। ରାଜଧାନୀର ଓଲ୍ଡ ଟାଉନ୍ ଅଞ୍ଚଳରେ ଅବସ୍ଥିତ ଏହି ପ୍ରାଚୀନ ମନ୍ଦିରର ସୁରକ୍ଷା ଓ ରକ୍ଷଣାବେକ୍ଷଣ ପାଇଁ ଓଡ଼ିଶା ଭାଷା, ସାହିତ୍ୟ ଓ ସଂସ୍କୃତି (OLLC) ବିଭାଗ ପକ୍ଷରୁ ଏକ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ଏହି ପଦକ୍ଷେପ ଦ୍ୱାରା ମନ୍ଦିରର ଐତିହାସିକ ବୈଭବକୁ ବଜାୟ ରଖିବା ପାଇଁ ସରକାରୀ ସ୍ତରରେ ଅଧିକ ଗୁରୁତ୍ୱ ଦିଆଯିବ।  

ଓଡ଼ିଶା ପ୍ରାଚୀନ ସ୍ମାରକୀ ସଂରକ୍ଷଣ ଅଧିନିୟମ, ୧୯୫୬ (ଓଡ଼ିଶା ଅଧିନିୟମ ୧୨, ୧୯୫୬) ର ଧାରା ୩ ର ଉପ-ଧାରା (୩) ଅନୁଯାୟୀ ଏହି ଘୋଷଣା କରାଯାଇଛି। ସାଧାରଣ ଗେଜେଟ୍ ବିଜ୍ଞପ୍ତି ଅନୁଯାୟୀ, ଖୋର୍ଦ୍ଧା ଜିଲ୍ଲା ଓଲ୍ଡ ଟାଉନ୍ ଅଞ୍ଚଳରେ ଥିବା ଏହି ମନ୍ଦିର ପରିସର ଏବେ ରାଜ୍ୟ ସରକାରଙ୍କ ପ୍ରତ୍ୟକ୍ଷ ସଂରକ୍ଷଣାଧୀନ ରହିବ। ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ବିଜୟ କେତନ ଉପାଧ୍ୟାୟଙ୍କ ଦ୍ୱାରା ରାଜ୍ୟପାଳଙ୍କ ନିର୍ଦ୍ଦେଶକ୍ରମେ ଏହି ବିଜ୍ଞପ୍ତି ଜାରି କରାଯାଇଛି। 

ଏହି ମାନ୍ୟତା ମିଳିବା ପରେ କେଦାରଗୌରୀ ମନ୍ଦିର ପରିସରର ସଂରକ୍ଷଣ ଏବଂ ରକ୍ଷଣାବେକ୍ଷଣ ଦାୟିତ୍ୱ ଏବେ ରାଜ୍ୟ ପ୍ରତ୍ନତତ୍ତ୍ୱ ବିଭାଗ (State Archaeology Department) ଉପରେ ରହିବ। ଏହାଦ୍ୱାରା ଏହି ଐତିହାସିକ କୀର୍ତ୍ତିରାଜିର ସଠିକ୍ ପରିଚାଳନା ଏବଂ ସୌନ୍ଦର୍ଯ୍ୟକରଣ କାର୍ଯ୍ୟ ତ୍ୱରାନ୍ୱିତ ହୋଇପାରିବ। ମନ୍ଦିରର ସାଂସ୍କୃତିକ ଗୁରୁତ୍ୱକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି। 

ସୂଚନାଯୋଗ୍ୟ ଯେ, ବର୍ତ୍ତମାନ ରାଜ୍ୟ ପ୍ରତ୍ନତତ୍ତ୍ୱ ବିଭାଗ ଓଡ଼ିଶାରେ ୨୧୨ଟି ସଂରକ୍ଷିତ ସ୍ମାରକୀର ରକ୍ଷଣାବେକ୍ଷଣ କରୁଥିବାବେଳେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ASI) ୮୨ଟି ସ୍ମାରକୀର ଦାୟିତ୍ୱରେ ରହିଛି। କେଦାରଗୌରୀ ମନ୍ଦିରକୁ ଏହି ତାଲିକାରେ ଅନ୍ତର୍ଭୁକ୍ତ କରାଯିବା ଫଳରେ ଏହାର ପୁନରୁଦ୍ଧାର ଏବଂ ପରିଦର୍ଶକଙ୍କ ପାଇଁ ସୁବିଧା ସୁଯୋଗର ବିକାଶ ହୋଇପାରିବ ବୋଲି ଆଶା କରାଯାଉଛି।