କୋଲକାତା: ପଶ୍ଚିମବଙ୍ଗର ବିଭିନ୍ନ ଜିଲ୍ଲାରେ ଏବେ ଆଡେନୋଭାଇରସ୍‌’ର ଆତଙ୍କ ବଢିବାରେ ଲାଗିଛି। ଏହି ଭୂତାଣୁରେ ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢି ଚାଲିଥିବା ବେଳେ ସରକାରୀ ଏବଂ ଘରୋଇ ହସ୍ପିଟାଲଗୁଡିକରେ ରୋଗୀଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି। ରବିବାର ଏହି ଭୂତାଣୁ ଦ୍ବାରା ଆକ୍ରାନ୍ତ ହୋଇଥିବା ୬ ଶିଶୁଙ୍କ ଚିକିତ୍ସିତ ଅବସ୍ଥାରେ ମୃତ୍ୟୁ ହୋଇଛି। ଏହାକୁ ମିଶାଇ ଗତ ୯ ଦିନ ମଧ୍ୟରେ ୪୦ ଶିଶୁଙ୍କ ମୃତ୍ୟୁ ହୋଇସାରିଥିବା କୁହାଯାଇଛି।

ଆଡେନୋଭାଇରସ୍‌’ ଭୂତାଣୁ ଯେକୌଣସି ସମୟରେ ଏବଂ ଛୋଟ ଠାରୁ ବୟସ୍କ ଲୋକଙ୍କୁ ସଂକ୍ରମିତ କରିପାରେ। ତେବେ ପଶ୍ଚିମବଙ୍ଗରେ ବିଗତ ଦୁଇ ସପ୍ତାହ ମଧ୍ୟରେ ସର୍ବାଧିକ ଶିଶୁ ଏହି ଭୂତାଣୁ ଦ୍ବାରା ଆକ୍ରାନ୍ତ ହୋଇଛନ୍ତି। ଏହାକୁ ନେଇ ରାଜ୍ୟ ସରକାରଙ୍କ ପକ୍ଷରୁ ସବୁ ସରକାରୀ ଏବଂ ଘରୋଇ ଡାକ୍ତରଖାନାର ଶିଶୁ ବିଭାଗକୁ ସତର୍କ କରିଦିଆଯାଇଛି। ବର୍ତ୍ତମାନ ରାଜ୍ୟରେ କୌଣସି ଫ୍ଲୁ ଦେଖାଯାଇ ନଥିବା କୁହାଯାଇଥିଲେ ହେଁ ଶିଶୁମାନଙ୍କ ଠାରେ ଏହି ଭୂତାଣୁକୁ ନେଇ ସୃଷ୍ଟି ହୋଇଥିବା ସମସ୍ୟା ଚିନ୍ତାଜନକ ହୋଇପଡ଼ିଛି। ଯେଉଁ ଶିଶୁମାନଙ୍କ ନିକଟରେ ଏହି ଭୂତାଣୁର ଲକ୍ଷଣ ଦେଖାଯାଉଛି ସେମାନଙ୍କୁ ତୁରନ୍ତ ଚିକିତ୍ସା ଯୋଗାଇ ଦେବାକୁ ରାଜ୍ୟ ସରକାରଙ୍କ ପକ୍ଷରୁ ପରାମର୍ଶ ଜାରି କରାଯାଇଛି। ଏହି ଭୂତାଣୁ ଦ୍ବାରା ଆକ୍ରାନ୍ତ ହେଲେ ଥଣ୍ଡା ଏବଂ ଜ୍ବର ଲାଗି ରହିବା ସହିତ ଗଳାରେ ପୀଡ଼ା ଏବଂ ଦରଜ ରହିବ। ଏହାବ୍ୟତୀତ ନିଶ୍ବାସ ପ୍ରଶ୍ବାସରେ ମଧ୍ୟ କଷ୍ଟ ଅନୁଭବ ହେବ। ଚର୍ମ ସ୍ପର୍ଶ ଦ୍ବାରା ଏହା ସଂକ୍ରମିତ ହେବା ସହିତ ବାୟୁରେ କାଶ କିମ୍ବା ଛିଙ୍କ ଦ୍ବାରା ମଧ୍ୟ ଏହି ଭୂତାଣୁ ଅନ୍ୟକୁ ବ୍ୟାପିଥାଏ ବୋଲି ବିଶେଷଜ୍ଞମାନେ କହିଛନ୍ତି।