ଫ୍ଲୋରିଡାରେ ଭୟଙ୍କର ବିମାନ ଦୁର୍ଘଟଣା: ଆକାଶରୁ ଖସି ରାସ୍ତାରେ ଫାଟିଲା ବିମାନ, ୯ ଜଣଙ୍କର ମୃତ୍ୟୁ

ନୂଆଦିଲ୍ଲୀ: ଆମେରିକାର ଫ୍ଲୋରିଡା ରାଜ୍ୟରେ ଭୟଙ୍କର ବିମାନ ଦୁର୍ଘଟଣା ଘଟିଛି। ମିସାଇଲ୍ ପରି ଆକାଶରୁ ଖସି ରାସ୍ତାରେ ହୁତୁ ହୁତୁ ହୋଇ ଜଳିଲା ବିମାନ । ଏକ ଘରୋଇ ଲିୟରଜେଟ୍ ୬୦ (Learjet 60) ବିମାନ ଦକ୍ଷିଣ ଫ୍ଲୋରିଡାର ଏକ ଆବାସିକ ଅଞ୍ଚଳରେ ଖସିପଡ଼ିବା ଫଳରେ ଏଥିରେ ଥିବା ସମସ୍ତ ୯ ଜଣ ବ୍ୟକ୍ତିଙ୍କର ପ୍ରାଣହାନି ଘଟିଥିବା ସରକାରୀ ଭାବେ ନିଶ୍ଚିତ କରାଯାଇଛି। ବିମାନଟି ଖସିବା ମାତ୍ରେ ଏଥିରେ ଭୟଙ୍କର ବିସ୍ଫୋରଣ ଘଟି ନିଆଁ ଲାଗିଯାଇଥିଲା।

ଏହି ଘଟଣାଟି ରବିବାର ସ୍ଥାନୀୟ ସମୟ ଅପରାହ୍ନ ପ୍ରାୟ ୧୨:୫୦ରେ ପାମ୍ ବିଚ୍ କାଉଣ୍ଟିର ଗ୍ରୀନଆକ୍ରେସ୍ ଅଞ୍ଚଳରେ ଘଟିଥିଲା। N722BD ପଞ୍ଜିକରଣ ସଂଖ୍ୟା ବିଶିଷ୍ଟ ଏହି ଟୁଇନ୍-ଇଞ୍ଜିନ ବିଜନେସ୍ ଜେଟ୍ ଟି ଟେକ୍ସାସର ଅଷ୍ଟିନ-ବର୍ଗଷ୍ଟ୍ରୋମ ଆନ୍ତର୍ଜାତୀୟ ବିମାନବନ୍ଦରରୁ ବାହାରି ବାହାମାସ ଅଭିମୁଖେ ଯାଉଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ ବିମାନଟି ସିଧାସଳଖ ତଳକୁ ଖସି ଏକ ବିରାଟ ଗାତ ସୃଷ୍ଟି କରିଥିଲା।

ଫ୍ଲୋରିଡା ଗଭର୍ଣ୍ଣର ରନ ଡିସାଣ୍ଟିସ ଘଟଣାସ୍ଥଳ ପରିଦର୍ଶନ କରି ଏହାକୁ ଅତ୍ୟନ୍ତ ଦୁଃଖଦାୟକ ବୋଲି କହିଛନ୍ତି। ତାଙ୍କ କହିବା ଅନୁଯାୟୀ, ବିମାନଟି ଏକ ମିସାଇଲ ଭଳି ତଳକୁ ଖସୁଥିବାର ଦେଖାଯାଇଥିଲା। ଆମେରିକାର ପରିବହନ ସଚିବ ସିନ୍ ଡଫି ମଧ୍ୟ ଏହି ଦୁର୍ଘଟଣାରେ ସମସ୍ତ ଯାତ୍ରୀଙ୍କ ମୃତ୍ୟୁକୁ ନେଇ ଶୋକ ପ୍ରକାଶ କରିଛନ୍ତି। ସୌଭାଗ୍ୟବଶତଃ, ବିମାନଟି ଏକ ଜନବସତିପୂର୍ଣ୍ଣ ଅଞ୍ଚଳରେ ଖସିଥିଲେ ମଧ୍ୟ ଭୂମିରେ ଥିବା କୌଣସି ବ୍ୟକ୍ତିଙ୍କର କ୍ଷତି ହୋଇନାହିଁ। ଦୁର୍ଘଟଣା ପରେ ପ୍ରାୟ ୬୦୦ ଜଣ ସ୍ଥାନୀୟ ବାସିନ୍ଦାଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯାଇଛି।

ଏୟାର ଟ୍ରାଫିକ କଣ୍ଟ୍ରୋଲରୁ ମିଳିଥିବା ତଥ୍ୟ ଅନୁଯାୟୀ, ଦୁର୍ଘଟଣା ପୂର୍ବରୁ ପାଇଲଟମାନେ ଖରାପ ପାଗ ଏବଂ ବରଫ ଜମିବା (Icing) ସମ୍ପର୍କରେ ସୂଚନା ଦେଇଥିଲେ। ବିମାନଟି ଅତି ଦ୍ରୁତ ଗତିରେ ଅର୍ଥାତ୍ ମିନିଟ ପ୍ରତି ୨୦,୦୦୦ ଫୁଟ ବେଗରେ ତଳକୁ ଖସିବା ଆରମ୍ଭ କରିଥିଲା। ପାଇଲଟମାନେ ଜରୁରୀକାଳୀନ ପରିସ୍ଥିତି ଘୋଷଣା କରିଥିଲେ ମଧ୍ୟ ସେମାନେ ବିମାନକୁ ନିୟନ୍ତ୍ରଣ କରିପାରିନଥିଲେ।

ବର୍ତ୍ତମାନ ନ୍ୟାସନାଲ ଟ୍ରାନ୍ସପୋର୍ଟେସନ ସେଫ୍ଟି ବୋର୍ଡ (NTSB) ଏବଂ ଫେଡେରାଲ ଏଭିଏସନ ଆଡମିନିଷ୍ଟ୍ରେସନ (FAA) ପକ୍ଷରୁ ଏହି ଘଟଣାର ତଦନ୍ତ ଆରମ୍ଭ ହୋଇଛି। ବିମାନ ଦୁର୍ଘଟଣାର ପ୍ରକୃତ କାରଣ ଖୋଜିବା ପାଇଁ ତଦନ୍ତକାରୀ ଦଳ ଘଟଣାସ୍ଥଳରେ ପହଞ୍ଚି ନମୁନା ସଂଗ୍ରହ କରୁଛନ୍ତି। ମୃତକଙ୍କ ପରିଚୟ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ।