ଗଣେଶ ଭସାଣିବେଳେ ଅଘଟଣ, ଜେନେରେଟରରେ ନିଆଁ ଲାଗି ୫ ଶିଶୁ ଗୁରୁତର

ଗଞ୍ଜାମ: ଗଞ୍ଜାମ ଜିଲ୍ଲା ଅନ୍ତର୍ଗତ ପୁରୁଷୋତ୍ତମପୁର ସହରରେ ଗଣେଶ ମୂର୍ତ୍ତି ଭସାଣି ଶୋଭାଯାତ୍ରା ସମୟରେ ଏକ ବଡ଼ ଅଘଟଣ ଘଟିଛି। ଏହି ଶୋଭାଯାତ୍ରାରେ ବ୍ୟବହୃତ ଏକ ଜେନେରେଟରରେ ହଠାତ୍ ନିଆଁ ଲାଗିଯିବା ଫଳରେ ୫ ଜଣ ଶିଶୁ ଗୁରୁତର ଭାବେ ପୋଡ଼ି ହୋଇଯାଇଛନ୍ତି।

ଆହତ ହୋଇଥିବା ଶିଶୁମାନେ ହେଲେ ସୀତାରାମପୁର ଅଗ୍ରହାରମ୍ ସାହିର ବାସିନ୍ଦା ୪ ବର୍ଷୀୟା ଇତିଶ୍ରୀ ନାୟକ, ୧୧ ବର୍ଷୀୟା ସୁହାନୀ ନାୟକ, ୮ ବର୍ଷୀୟା ଭୂମି ନାୟକ, ୭ ବର୍ଷୀୟା ରାହାରୀ ନାୟକ ଏବଂ ୫ ବର୍ଷୀୟ ବିକାଶ ନାୟକ।

ମିଳିଥିବା ସୂଚନା ଅନୁଯାୟୀ, ଭସାଣି ଶୋଭାଯାତ୍ରା ପାଇଁ ଏକ ଟ୍ରାକ୍ଟର ଉପରେ ଜେନେରେଟର ରଖାଯାଇଥିଲା। ଏହି ଜେନେରେଟର ନିକଟରେ ଏକ ପେଟ୍ରୋଲ୍ କ୍ୟାନ୍ ମଧ୍ୟ ଥିଲା ଏବଂ ଶିଶୁମାନେ ସେଠାରେ ବସି ଶୋଭାଯାତ୍ରା ଦେଖୁଥିଲେ। ଦୀର୍ଘ ସମୟ ଧରି ଚାଲିବା କାରଣରୁ ଜେନେରେଟରଟି ଅତ୍ୟଧିକ ଗରମ ହୋଇଯାଇଥିଲା, ଯାହା ଫଳରେ ପାଖରେ ଥିବା ପେଟ୍ରୋଲ୍ କ୍ୟାନରେ ହଠାତ୍ ନିଆଁ ଲାଗିଯାଇଥିଲା। ଦେଖୁ ଦେଖୁ ନିଆଁ ଚାରିଆଡ଼କୁ ବ୍ୟାପିଯାଇଥିଲା ଏବଂ ପାଖରେ ବସିଥିବା ଶିଶୁମାନେ ନିଆଁ ହାବୁଡ଼ରେ ପଡ଼ିଯାଇଥିଲେ।

ଘଟଣା ପରେ ସ୍ଥାନୀୟ ଲୋକେ ତୁରନ୍ତ ଆହତ ଶିଶୁମାନଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ। ତେବେ ସେମାନଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ଅଧିକ ଚିକିତ୍ସା ନିମନ୍ତେ ସମସ୍ତଙ୍କୁ ବ୍ରହ୍ମପୁର ସ୍ଥିତ ଏମକେସିଜି (MKCG) ମେଡିକାଲ୍ କଲେଜ ଓ ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି। ଖବର ପାଇ ପୁରୁଷୋତ୍ତମପୁର ତହସିଲଦାର ଡାକ୍ତରଖାନାରେ ପହଞ୍ଚି ଆହତ ଶିଶୁମାନଙ୍କର ସ୍ୱାସ୍ଥ୍ୟାବସ୍ଥା ଏବଂ ଚିକିତ୍ସା ବ୍ୟବସ୍ଥାର ସମୀକ୍ଷା କରିଛନ୍ତି।