ପୋଙ୍ଗୟାଙ୍ଗ : ଉତ୍ତର କୋରିଆରେ ଖାଦ୍ୟ ସଙ୍କଟ ଦେଖାଦେଇଛି। ଏହି ଦିନକୁ ଦିନକୁ ଅଧିକ ଭୟଙ୍କର ହେବାରେ ଲାଗିଛି । ଲୋକେ ଖାଦ୍ୟପାଇଁ ଡହଳବିକଳ ହେଉଛନ୍ତି। ଏପରି ସମୟରେ ଲୋକମାନଙ୍କ ପାଇଁ ତୋଗଲି ନିର୍ଦ୍ଦେଶ ଜାରି କରିଛନ୍ତି ଉତ୍ତରକୋରିଆର ଏକଛତ୍ର ଶାସକ କିମ-ଜୋଙ୍ଗ-ଉନ୍‌। ୨୦୨୫ ପର୍ଯ୍ୟନ୍ତ କମ୍‌ ଖାଦ୍ୟ ଖାଇବାକୁ ସେ ଲୋକଙ୍କୁ ନିର୍ଦ୍ଦେଶ ଦେଇଛନ୍ତି। ସେ ଏହା ମାଧ୍ୟମରେ ଦେଶର ଖାଦ୍ୟ ସଙ୍କଟକୁ କମ୍‌ କରିବାକୁ ଚାହିଁଛନ୍ତି। ଉତ୍ତର କୋରିଆକୁ ଖାଦ୍ୟ ସାମଗ୍ରୀ ଯୋଗାଣ କମ୍‌ ହେଉଥିବାରୁ ଖାଦ୍ୟ ପଦାର୍ଥର ମୂଲ୍ୟ ଅହେତୁକ ବୃଦ୍ଧି ପାଇଛି। ସ୍ଥିତି ଏପରି ହୋଇଯାଇଛି ଯେ ଲୋକଙ୍କ ଚାହିଦା ପୂରଣ ହୋଇପାରୁ ନାହିଁ।

କିମ୍-ଜୋଙ୍ଗ-ଉନ୍‌ ଖାଦ୍ୟ ସଙ୍କଟ ପାଇଁ ଅନେକ କାରଣକୁ ଦର୍ଶାଇଛନ୍ତି। ସେ କହିଛନ୍ତି ଯେ ଖାଦ୍ୟ ସଙ୍କଟ ବହୁତ ଚିନ୍ତାଜନକ ହୋଇଯାଇଛି। କାରଣ କୃଷି କ୍ଷେତ୍ରରେ ଖାଦ୍ୟ ଉତ୍ପାଦନ ଯୋଜନା ବିଫଳ ହୋଇଛି। ଦେଶ ଉପରେ ଅନେକ ଅନ୍ତର୍ଜାତୀୟ କଟକଣା ଲାଗିଛି। ଏହା ସମସ୍ୟାକୁ ଅତ୍ୟନ୍ତ ଗମ୍ଭୀର କରିଦେଇଛି। କରୋନା କଟକଣା ଏବଂ କିଛି ଦିନ ତଳେ ଆସିଥିବା ସାମୁଦ୍ରିକ ଝଡ ପାଇଁ ମଧ୍ୟ ଏପରି ହୋଇଛି। ଦେଶ ଏବେ ଖରାପ ସ୍ଥିତି ଦେଇ ଗତି କରୁଛି। ୨୦୨୫ ପର୍ଯ୍ୟନ୍ତ ଏହି ସ୍ଥିତି ଲାଗି ରହିବାର ଆଶଙ୍କା ଥିବାରୁ ଲୋକଙ୍କୁ କମ୍‌ ଖାଇବା ପାଇଁ ସେ ନିର୍ଦ୍ଦେଶ ଦେଇଛନ୍ତି।