'ଆମେରିକା ଦିନେ ଚାହୁଁଥିଲା ଭାରତ ନିଜର ବିକଳ୍ପ ସୀମିତ ରଖୁ, କିନ୍ତୁ ଏବେ ସେହି ଧାରଣା ବଦଳିଛି': ଏସ. ଜୟଶଙ୍କର

ଆମେରିକା ଦିନେ ଚାହୁଁଥିଲା ଯେ ଭାରତ ଅନ୍ୟ ଦେଶ ସହ ସମ୍ପର୍କ ସୀମିତ ରଖି କେବଳ ୱାଶିଂଟନ୍ ଉପରେ ଅଧିକ ଧ୍ୟାନ ଦେଉ। କିନ୍ତୁ ଆମେରିକା ନିଜେ ଏକ ବିଶ୍ୱଶକ୍ତି ଭାବେ ସବୁ ଦେଶ ସହ ନିଜର ବିକଳ୍ପ ଖୋଲା ରଖିଥିଲା। ଏବେ କିନ୍ତୁ ସେହି ପୁରୁଣା ମାନସିକତା ଏବଂ ଛଳନା ଦୂର ହୋଇଯାଇଛି ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର କହିଛନ୍ତି।

ଆମେରିକାର ପୁରୁଣା ମାନସିକତା ଉପରେ ପ୍ରହାର

ସୋମବାର ନ୍ୟୁୟର୍କରେ ଏସିଆ ସୋସାଇଟି ଦ୍ୱାରା ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ବୈଦେଶିକ ମନ୍ତ୍ରୀ କହିଛନ୍ତି ଯେ, ଗୋଟିଏ ସମୟ ଥିଲା ଯେତେବେଳେ ଆମେରିକା ଚାହୁଁଥିଲା ଯେ ଭାରତ ପାଖରେ "ଅଧିକ ବିକଳ୍ପ" ନରହୁ ଏବଂ କେବଳ ଆମେରିକା ସହିତ ସମ୍ପର୍କ ମଜବୁତ କରିବା ଉପରେ ଧ୍ୟାନ ଦିଆଯାଉ। କିନ୍ତୁ ସମୟକ୍ରମେ ଦୁନିଆ ବଦଳିଛି ଏବଂ ଏବେ ଦେଶଗୁଡ଼ିକ ପରସ୍ପର ସହିତ ଖୋଲାଖୋଲି ଭାବେ ଯୋଡ଼ି ହେଉଛନ୍ତି। ଏହା ବର୍ତ୍ତମାନର ବହୁମୁଖୀ ବିଶ୍ୱ ବା ମଲ୍ଟିପୋଲାର ୱାର୍ଲ୍ଡ ଆଡ଼କୁ ଏକ ସ୍ପଷ୍ଟ ପରିବର୍ତ୍ତନକୁ ସୂଚାଉଛି।

ପ୍ରବାସୀ ଭାରତୀୟଙ୍କ ସହ ଆଲୋଚନା

ଜାତିସଂଘ ସାଧାରଣ ପରିଷଦ (UNGA)ର ୮୧ତମ ଅଧିବେଶନର ଉଚ୍ଚସ୍ତରୀୟ ସପ୍ତାହ ଶେଷ ହେବା ପରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ବହୁ ବିଶିଷ୍ଟ ଭାରତୀୟ-ଆମେରିକୀୟ ଏବଂ ପ୍ରବାସୀ ଭାରତୀୟ ସମ୍ପ୍ରଦାୟର ସଦସ୍ୟମାନେ ଉପସ୍ଥିତ ଥିଲେ। ବିଗତ ଦିନର କୂଟନୈତିକ ଆଶା ଏବଂ ବର୍ତ୍ତମାନର ବାସ୍ତବିକତା ଉପରେ ଆଲୋକପାତ କରି ଜୟଶଙ୍କର କହିଛନ୍ତି ଯେ, କୂଟନୀତିରେ ଆଉ କୌଣସି ଲୁଚାଛପା ନାହିଁ। ଭାରତ ନିଜର ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ସମଗ୍ର ବିଶ୍ୱ ସହିତ ବାଣିଜ୍ୟିକ ଏବଂ କୂଟନୈତିକ ସମ୍ପର୍କ ସ୍ଥାପନ କରୁଛି। ଦ୍ୱିପାକ୍ଷିକ ବାଣିଜ୍ୟ ଏବଂ ସମ୍ପର୍କର ସମୀକରଣ ଉପରେ ମତ ରଖି ସେ ସ୍ପଷ୍ଟ କରିଛନ୍ତି ଯେ ଭାରତ ଏବେ ଏକ ସ୍ୱାଧୀନ ଏବଂ ଦୃଢ଼ ବୈଦେଶିକ ନୀତି ଅନୁସରଣ କରୁଛି, ଯାହା ବିଶ୍ୱସ୍ତରରେ ଦେଶର ବଢ଼ୁଥିବା ପ୍ରଭାବକୁ ଦର୍ଶାଉଛି।