ନାଗାଲାଣ୍ଡରେ ବିଷାକ୍ତ ମଦ ତାଣ୍ଡବ: ୧୯ ଜଣଙ୍କ ମୃତ୍ୟୁ, ତଦନ୍ତ ପାଇଁ SIT ଗଠନ

ନୂଆଦିଲ୍ଲୀ: ବିଷାକ୍ତ ମଦ ପିଇ ୧୯ ଜଣଙ୍କ ମୃତ୍ୟୁ । ନାଗାଲାଣ୍ଡର ମୋକୋକଚୁଙ୍ଗ ଏବଂ ଟୁଏନସାଙ୍ଗ ଜିଲ୍ଲାରେ ବିଷାକ୍ତ ମଦ ପିଇ ଗତ ଦୁଇ ଦିନ ମଧ୍ୟରେ ଅତିକମରେ ୧୯ ଜଣଙ୍କର ମୃତ୍ୟୁ ଘଟିଛି। ଏହି ଘଟଣାରେ ପୋଲିସ ଏକ ବଡ଼ ଧରଣର ତଦନ୍ତ ଆରମ୍ଭ କରିବା ସହ ବେଆଇନ ମଦ ଯୋଗାଣରେ ସମ୍ପୃକ୍ତ ଥିବା ଅଭିଯୋଗରେ ୧୯ ଜଣଙ୍କୁ ଗିରଫ କରିଛି।

କୋହିମାର ଜଣେ ବରିଷ୍ଠ ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ମୋକୋକଚୁଙ୍ଗ ଜିଲ୍ଲାରେ ୮ ଜଣ ଏବଂ ଟୁଏନସାଙ୍ଗ ଜିଲ୍ଲାରେ ୧୧ ଜଣଙ୍କର ମୃତ୍ୟୁ ଘଟିଛି। ଏହି ଘଟଣାର ତଦନ୍ତ ପାଇଁ ଅତିରିକ୍ତ ପୋଲିସ ଅଧୀକ୍ଷକ ବୁଙ୍ଗଲାଙ୍ଗ ଚାଙ୍ଗଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (ଏସଆଇଟି) ଗଠନ କରାଯାଇଛି। ମଦର ନମୁନା ସଂଗ୍ରହ କରାଯାଇ ଫରେନ୍ସିକ ପରୀକ୍ଷା ପାଇଁ ଗୁଆହାଟୀର ଏକ ଲାବୋରେଟୋରୀକୁ ପଠାଯାଇଛି। ବିଭିନ୍ନ ସ୍ଥାନରେ ଚଢ଼ାଉ କରାଯାଇ ପୋଲିସ ପ୍ରାୟ ୩,୦୦୦ ବୋତଲ ମଦ ଜବତ କରିଛି।

୧୯୯୦ ମସିହାରୁ ନାଗାଲାଣ୍ଡରେ ମଦ ନିଷେଧ ଆଇନ ଲାଗୁ ହୋଇଥିଲେ ମଧ୍ୟ ବେଆଇନ ମଦ କାରବାର ଏକ ବଡ଼ ସମସ୍ୟା ହୋଇ ରହିଛି। ଚଳିତ ମାସ ଆରମ୍ଭରେ ମଧ୍ୟ ଟୁଏନସାଙ୍ଗ ଜିଲ୍ଲାରେ ବିଷାକ୍ତ ମଦ ପିଇ ଗୋଟିଏ ପରିବାରର ତିନି ଜଣ ସଦସ୍ୟଙ୍କ ସମେତ ୯ ଜଣଙ୍କର ମୃତ୍ୟୁ ହୋଇଥିଲା। ଏନେଇ ନାଗାଲାଣ୍ଡ ପୋଲିସ ମହାନିର୍ଦ୍ଦେଶକ (ଡିଜିପି) ରୂପିନ ଶର୍ମା ମଧ୍ୟ ସ୍ପଷ୍ଟ କରିଥିଲେ ଯେ ବିଷାକ୍ତ ମଦ କାରଣରୁ ଏହି ମୃତ୍ୟୁ ଘଟିଛି।

ଅଜଣା କିମ୍ବା ଲେବଲ୍ ନଥିବା ମଦ ନପିଇବାକୁ ପୋଲିସ ଜନସାଧାରଣଙ୍କୁ ପରାମର୍ଶ ଦେଇଛି। ମଦ ପିଇବା ପରେ ମୁଣ୍ଡ ବୁଲାଇବା, ଝାପସା ଦେଖାଯିବା, ଶ୍ୱାସକ୍ରିୟାରେ କଷ୍ଟ ଅନୁଭବ ହେବା କିମ୍ବା ଚେତାଶୂନ୍ୟ ହେବା ଭଳି ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ ନିବେଦନ କରାଯାଇଛି। ବର୍ତ୍ତମାନ ପୋଲିସ ପକ୍ଷରୁ ସଚେତନତା କାର୍ଯ୍ୟକ୍ରମ ମଧ୍ୟ ଜୋରଦାର କରାଯାଇଛି।