ଏଥର ରବିବାର ଘରେ ବନାନ୍ତୁ ହୋଟେଲ୍ ଷ୍ଟାଇଲ୍ 'ତନ୍ଦୁରୀ ଚିକେନ୍', ଜାଣନ୍ତୁ ସହଜ ରେସିପି

ରବିବାର ଛୁଟି ଦିନରେ ଘରର ସମସ୍ତେ ଏକାଠି ବସି ଖାଇବାର ମଜା ନିଆରା। ପ୍ରାୟତଃ ଲୋକମାନେ ଛୁଟିଦିନରେ ବାହାରୁ ଖାଦ୍ୟ ଅର୍ଡର କରିବାକୁ ପସନ୍ଦ କରନ୍ତି, କିନ୍ତୁ ଯଦି ଆପଣ ରେଷ୍ଟୁରାଣ୍ଟ ଭଳି ସ୍ୱାଦ ଘରେ ପାଇବାକୁ ଚାହୁଁଛନ୍ତି, ତେବେ ତନ୍ଦୁରୀ ଚିକେନ୍ ହେଉଛି ଏକ ବଢିଆ ବିକଳ୍ପ। ବିନା ତନ୍ଦୁର ବା ଓଭନ୍‌ରେ ମଧ୍ୟ ଆପଣ ଏହାକୁ ଗ୍ୟାସ୍ ଚୁଲାରେ ସହଜରେ ପ୍ରସ୍ତୁତ କରିପାରିବେ।

ଆବଶ୍ୟକ ସାମଗ୍ରୀ

ଏଥିପାଇଁ ଆପଣଙ୍କୁ ୫୦୦ ଗ୍ରାମ ଚିକେନ୍ (ବଡ଼ ଖଣ୍ଡ), ଅଧା କପ୍ ଦହି, ୨ ଚାମଚ ଅଦା-ରସୁଣ ପେଷ୍ଟ, ୧ ଚାମଚ କାଶ୍ମୀରୀ ଲଙ୍କା ଗୁଣ୍ଡ, ଅଧା ଚାମଚ ହଳଦୀ ଗୁଣ୍ଡ, ୧ ଚାମଚ ଗରମ ମସଲା, ୧ ଚାମଚ କସୁରୀ ମେଥି, ଆବଶ୍ୟକ ଅନୁସାରେ ଲୁଣ, ଲେମ୍ବୁ ରସ ଏବଂ ବଟର୍ ବା ତେଲ ଦରକାର ହେବ।

ପ୍ରସ୍ତୁତି ପ୍ରଣାଳୀ

ପ୍ରଥମେ ଚିକେନ୍ ଖଣ୍ଡଗୁଡିକୁ ଭଲ ଭାବରେ ଧୋଇ ସେଥିରେ କିଛି କଟା ଦାଗ (slits) କରନ୍ତୁ, ଯାହାଦ୍ୱାରା ମସଲା ଭିତରକୁ ଯାଇପାରିବ। ଏକ ପାତ୍ରରେ ଚିକେନ୍ ନେଇ ସେଥିରେ ଲେମ୍ବୁ ରସ, ଲୁଣ ଏବଂ ଅଳ୍ପ ଲଙ୍କା ଗୁଣ୍ଡ ମିଶାଇ ୧୫ ମିନିଟ୍ ରଖନ୍ତୁ।

ଅନ୍ୟ ଏକ ପାତ୍ରରେ ଦହି ସହ ବାକି ସମସ୍ତ ମସଲା ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ। ଏବେ ଚିକେନ୍‌କୁ ଏହି ମସଲା ପେଷ୍ଟରେ ବୁଡାଇ ଭଲଭାବେ ଗୋଳାଇ ଦିଅନ୍ତୁ। ଏହାକୁ ଅତିକମରେ ୨ ରୁ ୩ ଘଣ୍ଟା ପାଇଁ ଫ୍ରିଜରେ ମାରିନେସନ୍ ପାଇଁ ଛାଡି ଦିଅନ୍ତୁ।

କିପରି ରାନ୍ଧିବେ?

ଯଦି ଓଭନ୍ ନାହିଁ, ତେବେ ଏକ ନନ୍-ଷ୍ଟିକ୍ ପ୍ୟାନ୍‌ରେ ଅଳ୍ପ ବଟର୍ ଗରମ କରନ୍ତୁ। ମାରିନେଟ୍ ହୋଇଥିବା ଚିକେନ୍ ଖଣ୍ଡଗୁଡିକୁ ପ୍ୟାନ୍‌ରେ ରଖି ମଧ୍ୟମ ଆଞ୍ଚରେ ଘୋଡାଇ ରାନ୍ଧନ୍ତୁ। ମଝିରେ ମଝିରେ ଏହାକୁ ଓଲଟାଇ ଦିଅନ୍ତୁ ଯେପରି ଦୁଇ ପାଖ ଭଲଭାବେ ସିଝିଯିବ ଏବଂ ଲାଲ୍ ରଙ୍ଗ ହୋଇଯିବ। ଶେଷରେ ଏକ ଜାଲି (grill net) ସାହାଯ୍ୟରେ ସିଧାସଳଖ ଗ୍ୟାସ୍ ନିଆଁରେ ପୋଡିଲେ ଏଥିରେ ସ୍ମୋକି ଫ୍ଲେଭର ଆସିଥାଏ। ଗରମ ଗରମ ତନ୍ଦୁରୀ ଚିକେନ୍‌କୁ ପିଆଜ ଓ ସବୁଜ ଚଟଣୀ ସହ ପରିବେଷଣ କରନ୍ତୁ।