‘ବ୍ରାହ୍ମଣ ହେବା କ’ଣ ପାପ?’: ଏଚ୍‌ଡିଏଫ୍‌ସି କର୍ମଚାରୀ ଆସ୍ଥା ସିଂହଙ୍କ ସହ ବିବାଦ ପରେ ଋଷି ମିଶ୍ରଙ୍କ ବଡ଼ ବୟାନ

କାନପୁର: କାନପୁର ଏଚ୍‌ଡିଏଫ୍‌ସି (HDFC) ବ୍ୟାଙ୍କରେ ଘଟିଥିବା ବିବାଦ ଏବେ ନୂଆ ମୋଡ଼ ନେଇଛି। ବ୍ୟାଙ୍କରୁ ଇସ୍ତଫା ଦେଇଥିବା କର୍ମଚାରୀ ଋତୁ ତ୍ରିପାଠୀଙ୍କ ସ୍ୱାମୀ ଋଷି ମିଶ୍ର ବର୍ତ୍ତମାନ ଗଣମାଧ୍ୟମ ସାମ୍ନାକୁ ଆସି ନିଜର ପକ୍ଷ ରଖିଛନ୍ତି। ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓ ଏବଂ ଆସ୍ଥା ସିଂହଙ୍କ ଅଭିଯୋଗ ପରେ ଋଷି ମିଶ୍ରଙ୍କୁ ଟାର୍ଗେଟ କରାଯାଉଥିବା ନେଇ ସେ ଅଭିଯୋଗ କରିଛନ୍ତି।

ଜୀବନରୁ ମାରିଦେବାକୁ ମିଳୁଛି ଧମକ

ଋଷି ମିଶ୍ର ଅଭିଯୋଗ କରିଛନ୍ତି ଯେ, ବ୍ରାହ୍ମଣ ହୋଇଥିବାରୁ ତାଙ୍କୁ ଟାର୍ଗେଟ କରାଯାଉଛି ଏବଂ ଜୀବନରୁ ମାରିଦେବାକୁ ଧମକ ମିଳୁଛି। ସେ ଆସ୍ଥା ସିଂହଙ୍କ ସମସ୍ତ ଅଭିଯୋଗକୁ ମିଥ୍ୟା ବୋଲି ଦର୍ଶାଇବା ସହ ସତ୍ୟ ଜାଣିବା ପାଇଁ ବ୍ୟାଙ୍କର ସିସିଟିଭି (CCTV) ଫୁଟେଜ୍ ଯାଞ୍ଚ କରିବାକୁ ଦାବି କରିଛନ୍ତି। ତାଙ୍କ ପତ୍ନୀ ଋତୁ ତ୍ରିପାଠୀ କହିଛନ୍ତି ଯେ, ଯେବେଠାରୁ ଆସ୍ଥା ସିଂହ ମିଥ୍ୟା ଅଭିଯୋଗ ଆଣିଛନ୍ତି, ସେବେଠାରୁ ତାଙ୍କ ସ୍ୱାମୀଙ୍କୁ ବିପଦ ରହିଛି। ଯଦି ଋଷିଙ୍କର କିଛି କ୍ଷତି ହୁଏ, ତେବେ ଏଥିପାଇଁ ସମ୍ପୂର୍ଣ୍ଣ ଭାବେ ଆସ୍ଥା ସିଂହ ଦାୟୀ ରହିବେ ବୋଲି ସେ ଚେତାବନୀ ଦେଇଛନ୍ତି।

'ବ୍ରାହ୍ମଣ ହେବା କ’ଣ ଗୁନାହ?'

ନିଜ ପତ୍ନୀ ଓ ଭଉଣୀଙ୍କ ସହ ହୋଇଥିବା ଦୁର୍ବ୍ୟବହାର ବିଷୟରେ କହିବା ବେଳେ ଋଷି ମିଶ୍ର ଭାବପ୍ରବଣ ହୋଇପଡ଼ିଥିଲେ। ସେ କହିଛନ୍ତି, "ମୁଁ ଅପମାନ ସହିବି ଏବଂ ମାନହାନି ମକଦ୍ଦମା ମଧ୍ୟ ସାମ୍ନା କରିବି? ତାହେଲେ ସିଧାସଳଖ ମାନି ନିଆଯାଉ ଯେ ବ୍ରାହ୍ମଣ ହେବା ହିଁ ପାପ।" ସେ ଆହୁରି ମଧ୍ୟ କହିଛନ୍ତି ଯେ ସେ କୌଣସି ଭିଡିଓ ଭାଇରାଲ କରିନାହାନ୍ତି। ଯଦି ତାଙ୍କୁ ଭିଡିଓ ଭାଇରାଲ କରିବାର ଥାଆନ୍ତା, ତେବେ ସେ ଜାନୁଆରୀ ୭ ତାରିଖରେ ହିଁ କରିଦେଇଥାନ୍ତେ। ସିସିଟିଭି ଫୁଟେଜ୍ ଯାଞ୍ଚ କଲେ କିଏ ପ୍ରଥମେ ଦୁର୍ବ୍ୟବହାର କରିଥିଲା ତାହା ସ୍ପଷ୍ଟ ହୋଇଯିବ ବୋଲି ଋଷି ଦାବି କରିଛନ୍ତି।

ଇସ୍ତଫା ପଛର କାରଣ

ଅନ୍ୟପଟେ, ଚାକିରି ଛାଡ଼ିଥିବା ଋତୁ ତ୍ରିପାଠୀ ବ୍ୟାଙ୍କର କର୍ମକ୍ଷେତ୍ର ପରିବେଶକୁ ନେଇ ଗୁରୁତର ଅଭିଯୋଗ ଆଣିଛନ୍ତି। ଗତ ନଭେମ୍ବର ୬ରେ ସେ ବ୍ୟାଙ୍କରେ ଯୋଗ ଦେଇଥିଲେ, କିନ୍ତୁ ସେଠାକାର ପରିବେଶ ଅତ୍ୟନ୍ତ ଖରାପ ଥିଲା। ଘରେ ଛୋଟ ଝିଅ ଥିବା ସତ୍ତ୍ୱେ ତାଙ୍କୁ ରାତି ୧୧ଟା ପର୍ଯ୍ୟନ୍ତ ଅଫିସରେ ଅଟକାଇ ରଖାଯାଉଥିଲା। ବ୍ରାଞ୍ଚ ମ୍ୟାନେଜର ସୁମିତ ସିଂହ ତାଙ୍କୁ ବାରମ୍ବାର କ୍ୟାବିନକୁ ଡାକିବା ସହ ଘରେ ଛାଡ଼ିଦେବା କଥା କହୁଥିଲେ। ଏଥିରେ ରାଜି ନହେବାରୁ ତାଙ୍କ ଉପରେ ଇସ୍ତଫା ଦେବାକୁ ଚାପ ପକାଯାଇଥିଲା ବୋଲି ଋତୁ ଅଭିଯୋଗ କରିଛନ୍ତି।

ଆସ୍ଥା ସିଂହଙ୍କ ସଫେଇ

ସୂଚନାଯୋଗ୍ୟ ଯେ, ଏହି ବିବାଦ ସେତେବେଳେ ଚର୍ଚ୍ଚାକୁ ଆସିଥିଲା ଯେତେବେଳେ ରିଲେସନସିପ୍ ମ୍ୟାନେଜର ଆସ୍ଥା ସିଂହଙ୍କ ଏକ ଭିଡିଓ ଭାଇରାଲ ହୋଇଥିଲା, ଯେଉଁଥିରେ ସେ ନିଜକୁ 'ଠାକୁର' ବୋଲି କହିଥିଲେ। ଆସ୍ଥା ସଫେଇ ଦେଇଛନ୍ତି ଯେ, ଋଷି ମିଶ୍ର ତାଙ୍କ ଜାତି ପଚାରିବା ସହ ଦୁର୍ବ୍ୟବହାର କରିଥିବାରୁ ସେ ନିଜ ଗରିମା ରକ୍ଷା ପାଇଁ ଏଭଳି ଜବାବ ଦେଇଥିଲେ।