ISROର ବଡ଼ ସଫଳତା: GSLV-F18 ମାଧ୍ୟମରେ NVS-03 ନେଭିଗେସନ ସାଟେଲାଇଟ୍‌ର ସଫଳ ଉତକ୍ଷେପଣ

ନୂଆଦିଲ୍ଲୀ: ଭାରତୀୟ ମହାକାଶ ଗବେଷଣା ସଂସ୍ଥା (ISRO) ଆଜି ଏକ ବଡ଼ ସଫଳତା ହାସଲ କରିଛି। ସ୍ୱଦେଶୀ ନେଭିଗେସନ କ୍ଷମତାକୁ ବୃଦ୍ଧି କରିବା ପାଇଁ GSLV-F18 ରକେଟ୍ ସାହାଯ୍ୟରେ NVS-03 ସାଟେଲାଇଟ୍‌କୁ ସଫଳତାର ସହ କକ୍ଷପଥରେ ସ୍ଥାପିତ କରାଯାଇଛି। ଏହି ମିଶନର ସଫଳତା ପରେ ଭାରତୀୟ ମହାକାଶ କାର୍ଯ୍ୟକ୍ରମରେ ଆଉ ଏକ ଗୌରବମୟ ଅଧ୍ୟାୟ ଯୋଡ଼ି ହୋଇଛି। "ମିଶନ ସଫଳ! GSLV-F18 ସଫଳତାର ସହ NVS-03 କୁ ନିର୍ଦ୍ଧାରିତ କକ୍ଷପଥରେ ସ୍ଥାପନ କରିଛି। ସମସ୍ତଙ୍କୁ ଅଭିନନ୍ଦନ!" ବୋଲି ଇସ୍ରୋ ପକ୍ଷରୁ ଘୋଷଣା କରାଯାଇଛି।  

NVS-03 ହେଉଛି ଇସ୍ରୋର ପରବର୍ତ୍ତୀ ପିଢ଼ିର ନେଭିଗେସନ ସାଟେଲାଇଟ୍ ସିରିଜ୍‌ର ତୃତୀୟ ଉପଗ୍ରହ। ଏହା ଭାରତର ନିଜସ୍ୱ ନେଭିଗେସନ ବ୍ୟବସ୍ଥା NavIC (Navigation with Indian Constellation) କୁ ଅଧିକ ସୁଦୃଢ଼ କରିବ। ଏହି ବ୍ୟବସ୍ଥା ଭାରତ ଏବଂ ଏହାର ସୀମାଠାରୁ ପ୍ରାୟ ୧,୫୦୦ କିଲୋମିଟର ପର୍ଯ୍ୟନ୍ତ ଅଞ୍ଚଳରେ ସଠିକ ପୋଜିସନିଂ, ନେଭିଗେସନ ଏବଂ ସମୟ ସମ୍ବନ୍ଧୀୟ ସେବା ଯୋଗାଇବ। 

ଏହି ଉପଗ୍ରହରେ ଏକ ସ୍ୱଦେଶୀ ଆଟୋମିକ୍ କ୍ଲକ୍ (Atomic Clock) ସହିତ ଅତିରିକ୍ତ ଘଣ୍ଟାଗୁଡ଼ିକ ଖଞ୍ଜା ଯାଇଛି। ଏଥିରେ ପୂର୍ବରୁ ଥିବା L5 ଏବଂ S-ବ୍ୟାଣ୍ଡ୍ ସିଗନାଲ୍ ସହିତ ନୂତନ ଭାବେ L1 ସିଗନାଲ୍ ବ୍ୟାଣ୍ଡ୍ ଅନ୍ତର୍ଭୁକ୍ତ କରାଯାଇଛି। ଏହା ସାଧାରଣ ନାଗରିକ ଏବଂ ରଣନୈତିକ ବ୍ୟବହାରକାରୀଙ୍କ ପାଇଁ ନେଭିଗେସନ ସେବାକୁ ଅଧିକ ନିର୍ଭରଯୋଗ୍ୟ ଏବଂ ସୁଗମ କରିବ।