ପୂର୍ବ ସିକ୍କିମର ନାଥୁଲାରେ ଭୟଙ୍କର ହିମସ୍ଖଳନ; ୬ ମୃତ, ୧୫୦ରୁ ଅଧିକ ପର୍ଯ୍ୟଟକ ଫସି ରହିଥିବା ଆଶଙ୍କା

ଗାଙ୍ଗଟକ୍: ପୂର୍ବ ସିକ୍କିମର ନାଥୁଲାରେ ଘଟିଛି ଭୟଙ୍କର ହିମସ୍ଖଳନ । ହିମସ୍ଖଳନ ଯୋଗୁଁ ବରଫ ତଳେ ଚାପି ହୋଇ ୬ ଜଣ ପର୍ଯ୍ୟଟକ ମୃତ୍ୟୁବରଣ କରିଥିବାବେଳେ ପ୍ରାୟ ୧୫୦ ରୁ ଅଧିକ ଫସି ରହିଛନ୍ତି । ତେବେ ବରଫ ତଳେ ଫସି ରହିଥିବା ଯୋଗୁଁ ମୃତ୍ୟୁ ସଂଖ୍ୟା ବଢ଼ିବା ନେଇ ଆଶଙ୍କା କରାଯାଉଛି । ସେନା ଓ ସ୍ଥାନୀୟ ପ୍ରଶାସନ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଉଦ୍ଧାର ହୋଇଥିବା ଲୋକଙ୍କ ମଧ୍ୟରୁ ୩୦ଜଣଙ୍କ ଅବସ୍ଥା ସଂକଟାପର୍ଣ୍ଣ ରହିଛି । ସେମାନଙ୍କୁ ତୁରନ୍ତ ମେଡିକାଲକୁ ପଠାଯାଇଛି ।

ମୃତକଙ୍କ ମଧ୍ୟରେ ୪ ପୁରୁଷ ଥିବାବେଳେ ଜଣେ ମହିଳା ଏବଂ ଜଣେ ଶିଶୁ ଅଛନ୍ତି। ଝଡ଼ ପରେ ଆହତମାନଙ୍କୁ ନିକଟସ୍ଥ ଆର୍ମି ହସ୍ପିଟାଲ ନିଆଯାଇଥିଲା, ହେଲେ ସେଠାରେ ୬ ଜଣଙ୍କର ମୃତ୍ୟୁ ହୋଇଥିଲା। ସୂଚନା ଅନୁସାରେ, ମଙ୍ଗଳବାର ମଧ୍ୟାହ୍ନ ପ୍ରାୟ ୧୨ଟା ୨୦ ମିନିଟରେ ଗ୍ୟାଙ୍ଗଟୋକ୍‌ରୁ ସୋମଗୋ ହ୍ରଦ ଏବଂ ନାଥୁଲା ବର୍ଡରୁ ଯୋଡ଼ୁଥିବା ଜବାହାରଲାଲ୍‌ ନେହରୁ ମାର୍ଗରେ ଏହି ହିମସ୍ଖଳନ ହୋଇଥିଲା ।

ସିକ୍କିମ୍‌ରେ ଗତ ମାସରୁ ଲଗାତାର ବରଫପାତ ହେଉଛି। ଏହାଯୋଗୁଁ ପର୍ଯ୍ୟଟକଙ୍କୁ ଜବାହାରଲାଲ ନେହରୁ ରୋଡ୍‌ ସ୍ଥିତ ୧୩ ମିଲ୍‌ ପଏଣ୍ଟ ପର୍ଯ୍ୟନ୍ତ ଯିବାକୁ ଅନୁମତି ରହିଥିବାବେଳେ ପର୍ଯ୍ୟଟକମାନେ କଟକଣା ନ ମାନି ୧୫ ମିଲ୍‌ ପଏଣ୍ଟ ପର୍ଯ୍ୟନ୍ତ ଯାଇଥିଲେ ଯେଉଁଠାରେ ଏମାନେ ଭୂସ୍ଖଳନର ଶିକାର ହୋଇଥିଲେ। ଏଭଳି ସୂଚନା ପାଇବା ପରେ ସିକ୍କିମ୍ ପୋଲିସ ସହିତ ସେନାର ଯବାନମାନେ ଉଦ୍ଧାର କାର୍ଯ୍ୟରେ ଲାଗିଛନ୍ତି ।