ଏଲ୍‌ଏଲ୍‌ବି ପଢୁଥିବା ଜଣେ ଓଡ଼ିଆ ଛାତ୍ରୀଙ୍କ ମୃତଦେହ ମହାରାଷ୍ଟ୍ରର ଲୋନାଭାଲା ଅଞ୍ଚଳର ଏକ ଗଭୀର ଖାତରୁ ଉଦ୍ଧାର କରାଯାଇଛି। ଦୀର୍ଘ ୩୬ ଘଣ୍ଟାର ସର୍ଚ୍ଚ ଅପରେସନ୍ ପରେ ପୋଲିସ ମଙ୍ଗଳବାର ଦିନ ଛାତ୍ରୀଙ୍କ ମୃତଦେହ ଜବତ କରିଛି।

ମୃତ ଛାତ୍ରୀ ଜଣକ ହେଲେ ଶ୍ରେୟା ନରେନ୍ଦ୍ର ପତି (୨୦)। ସେ ମୁମ୍ବାଇର ଏକ କଲେଜରେ ଏଲ୍‌ଏଲ୍‌ବି ତୃତୀୟ ବର୍ଷର ଛାତ୍ରୀ ଥିଲେ। ମିଳିଥିବା ସୂଚନା ଅନୁଯାୟୀ, ଶ୍ରେୟା ଗତ ଜାନୁଆରୀ ୩୧ ତାରିଖରେ ଲୋନାଭାଲା-ଖଣ୍ଡାଲା ଅଞ୍ଚଳକୁ ଟ୍ରେକିଂ ପାଇଁ ଯାଇଥିଲେ। ସେ ଏନେଇ ନିଜ ପରିବାରକୁ ମଧ୍ୟ ସୂଚନା ଦେଇଥିଲେ। କିନ୍ତୁ ସନ୍ଧ୍ୟା ସୁଦ୍ଧା ସେ ଘରକୁ ନ ଫେରିବାରୁ ଏବଂ ତାଙ୍କ ମୋବାଇଲ୍ ସୁଇଚ୍ ଅଫ୍ ଥିବାରୁ ପରିବାର ଲୋକେ ଆତଙ୍କିତ ହୋଇପଡିଥିଲେ।

ଘଟଣାସ୍ଥଳ ନିକଟରେ ଥିବା ଜଣେ ଦୋକାନୀ ଶ୍ରେୟାଙ୍କ ବ୍ୟାଗ୍ ପାଇଥିଲେ। ବ୍ୟାଗ୍ ଭିତରେ ଥିବା ପରିଚୟ ପତ୍ର ଯାଞ୍ଚ କରି ଦୋକାନୀ ଜଣକ ତାଙ୍କ ପରିବାର ସହ ଯୋଗାଯୋଗ କରିଥିଲେ, ଯାହା ପରେ ପୋଲିସକୁ ଖବର ଦିଆଯାଇଥିଲା। ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଡଗ୍ ସ୍କ୍ୱାଡ୍ ଏବଂ ଡ୍ରୋନ୍ ସହାୟତାରେ ସର୍ଚ୍ଚ ଅପରେସନ୍ ଆରମ୍ଭ କରିଥିଲା।

ପ୍ରାୟ ୩୬ ଘଣ୍ଟାର ତଲାସୀ ଅଭିଯାନ ପରେ ଲୋନାଭାଲାର ଏକ ୪୦୦ ଫୁଟ ଗଭୀର ଖାତରୁ ଶ୍ରେୟାଙ୍କ ମୃତଦେହ ଉଦ୍ଧାର କରାଯାଇଥିଲା। ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି। ଶ୍ରେୟା ଏକାକୀ ଟ୍ରେକିଂ ପାଇଁ ଯାଇଥିଲେ ନା ତାଙ୍କ ସହ ଅନ୍ୟ କେହି ଥିଲେ, ସେ ନେଇ ପୋଲିସ ଅଧିକ ଛାନଭିନ୍ ଚଳାଇଛି।