ପାନ୍-ଇଣ୍ଡିଆ ସୁପରଷ୍ଟାର୍ ରାମ ଚରଣ ଙ୍କ ଜନ୍ମଦିନ ଅବସରରେ ତାଙ୍କର ଆଗାମୀ ବହୁ ପ୍ରତୀକ୍ଷିତ ଫିଲ୍ମ 'ପେଡ୍ଡି' ର ପ୍ରଥମ ଝଲକ୍ ବା ଟିଜର ରିଲିଜ୍ ହୋଇଛି। ମାର୍ଚ୍ଚ ୨୭ ତାରିଖରେ ନିଜର ଜନ୍ମଦିନ ପାଳନ କରୁଥିବା ଏହି ଅଭିନେତାଙ୍କ ପ୍ରଶଂସକଙ୍କ ପାଇଁ ଏହା ଏକ ବଡ଼ ଉପହାର। 'ପେଡ୍ଡି ପେହଲୱାନ' ଭାବରେ ତାଙ୍କର ଏକ ନୂଆ, ଦମଦାର୍ ଏବଂ ରୁଗେଡ୍ ଅବତାର ସାମ୍ନାକୁ ଆସିଛି, ଯାହା ଇଣ୍ଟରନେଟରେ ବେଶ୍ ଭାଇରାଲ୍ ହେବାରେ ଲାଗିଛି।

ଆଖଡ଼ାରେ 'ପେଡ୍ଡି ପେହଲୱାନ'ଙ୍କ ଜଲୱା

ମେକର୍ସଙ୍କ ଦ୍ୱାରା ରିଲିଜ୍ ହୋଇଥିବା ୪୪ ସେକେଣ୍ଡର ଏହି ପ୍ରୋମୋ ଭିଡିଓରେ ରାମ ଚରଣଙ୍କୁ ଏକ ଦେଶୀ ଆଖଡ଼ାରେ କୁସ୍ତି ଅଭ୍ୟାସ କରୁଥିବାର ଦେଖିବାକୁ ମିଳିଛି। ତାଙ୍କର ଲମ୍ବା ଦାଢ଼ି, ମଜବୁତ୍ ଶରୀର ଏବଂ କୁସ୍ତିଗିର୍ ଭାବରେ ବସ୍ତା ଉଠାଇବା ଓ ବର୍ଷାରେ ଗଦା ଧରି ଅଭ୍ୟାସ କରିବାର ଦୃଶ୍ୟ ଦର୍ଶକଙ୍କୁ ରୋମାଞ୍ଚିତ କରିଛି। ଟିଜରରେ ଥିବା ଏକ ଭଏସ୍-ଓଭର୍‌ରେ ଶୁଣିବାକୁ ମିଳୁଛି ଯେ, "କୁସ୍ତି କୌଣସି ବ୍ୟାଟ୍-ବଲ୍ ଖେଳ ନୁହେଁ, ଏହା ମୃତ୍ୟୁ ସହ ଖେଳିବା ସମାନ।" ଖେଳ ପ୍ରତି ତାଙ୍କର ଗର୍ବ ଏବଂ ନିଶାକୁ ଏହି ଟିଜରରେ ସ୍ପଷ୍ଟ ଭାବେ ଦର୍ଶାଯାଇଛି।

ନୂଆ ରିଲିଜ୍ ଡେଟ୍ ଘୋଷଣା

ପୂର୍ବରୁ ଏହି ସ୍ପୋର୍ଟସ୍ ଆକ୍ସନ୍ ଡ୍ରାମା ଫିଲ୍ମଟି ୨୦୨୬ ମସିହା ମାର୍ଚ୍ଚ ୨୭ରେ ରିଲିଜ୍ ହେବାର ଯୋଜନା ଥିଲା। କିନ୍ତୁ କିଛି ବାକି ଥିବା ସୁଟିଂ ଏବଂ ସ୍ୱତନ୍ତ୍ର ଗୀତର ଚିତ୍ରଣ ପାଇଁ ଫିଲ୍ମର ରିଲିଜ୍ ତାରିଖକୁ ଘୁଞ୍ଚାଇ ଦିଆଯାଇଛି। ନିର୍ଦ୍ଦେଶକ ବୁଚି ବାବୁ ସାନା ସ୍ପଷ୍ଟ କରିଛନ୍ତି ଯେ ଫିଲ୍ମଟି ଏବେ ୩୦ ଏପ୍ରିଲ ୨୦୨୬ ରେ ସାରା ବିଶ୍ୱରେ ଥିଏଟରକୁ ଆସିବ। ଏହି ଫିଲ୍ମରେ ରାମ ଚରଣଙ୍କ ବିପକ୍ଷରେ ବଲିଉଡ୍ ଅଭିନେତ୍ରୀ ଜାହ୍ନବୀ କପୁର ଲିଡ୍ ରୋଲରେ ଅଛନ୍ତି। ଅନ୍ୟ ପ୍ରମୁଖ ଭୂମିକାରେ ଶିବ ରାଜକୁମାର, ଜଗପତି ବାବୁ ଏବଂ ଦିବ୍ୟେନ୍ଦୁ ଶର୍ମା ନଜର ଆସିବେ ଏବଂ ଏହାର ସଂଗୀତ ନିର୍ଦ୍ଦେଶନା ଦେଇଛନ୍ତି ଓସ୍କାର ବିଜେତା ଏ.ଆର୍. ରହମାନ।

'ଧୁରନ୍ଧର ୨' ଓ 'ପେଡ୍ଡି'ର କନେକ୍ସନ୍

ନିକଟରେ ରଣବୀର ସିଂହଙ୍କ ବ୍ଲକବଷ୍ଟର ଆକ୍ସନ୍ ଥ୍ରିଲର ଫିଲ୍ମ 'ଧୁରନ୍ଧର ୨: ଦ ରିଭେଞ୍ଜ' ରିଲିଜ୍ ହୋଇ ବକ୍ସ ଅଫିସରେ ରେକର୍ଡ ଭାଙ୍ଗୁଛି। ରାମ ଚରଣ ମଧ୍ୟ ଏହି ଫିଲ୍ମର ଭୂୟସୀ ପ୍ରଶଂସା କରି ଏହାକୁ ଏକ ଦମଦାର୍ ଏବଂ ବାସ୍ତବିକ ଫିଲ୍ମ ବୋଲି କହିଥିଲେ। ବକ୍ସ ଅଫିସରେ କ୍ଲାସ୍ (clash) କୁ ଏଡ଼ାଇବା ଏବଂ 'ଧୁରନ୍ଧର ୨'ର କ୍ରେଜ୍‌କୁ ଦୃଷ୍ଟିରେ ରଖି ଫିଲ୍ମ 'ପେଡ୍ଡି'ର ନିର୍ମାତାମାନେ ଏହାର ରିଲିଜ୍ ତାରିଖକୁ ଏପ୍ରିଲ୍ ଶେଷକୁ ଘୁଞ୍ଚାଇବା ଏକ ବୁଦ୍ଧିମାନର ନିଷ୍ପତ୍ତି ବୋଲି ସିନେ ବିଶେଷଜ୍ଞମାନେ ମତ ଦେଉଛନ୍ତି ।