ବରଯାତ୍ରୀଙ୍କ ଉପରେ ମାଡ଼ିଗଲା ବର ବସିଥିବା ଗାଡ଼ି, ଦୁର୍ଘଟଣାରେ ଚାଲିଗଲା ବାପାଙ୍କ ଜୀବନ

ବଲାଙ୍ଗୀର: ବାହାଘର ଶୋଭାଯାତ୍ରା ବେଳେ ବଡ ଅଘଟଣ । ପୁଅ ବାହା ପାଇଁ ଆସି ଶବ ହୋଇଗଲେ ବାପା । ବରଯାତ୍ରୀଙ୍କ ଉପରେ ମାଡ଼ିଗଲା ବର ବସିଥିବା ଗାଡ଼ି । ଦୁର୍ଘଟଣାରେ ଚାଲିଗଲା ବାପାଙ୍କ ଜୀବନ । ବଲାଙ୍ଗିର ମଣ୍ଡଳ ଗାଁରେ ବାହାଘର ଶୋଭାଯାତ୍ରା ବେଳେ ଘଟିଛି ଏପରି ଅଘଟଣ । ବର ବେଶରେ ପୁଅ ବସିଥିବା କାର୍ ମାଡ଼ିଯିବାରୁ ବାପାଙ୍କର ମୃତ୍ୟୁ ହୋଇଛି । ଦୁର୍ଘଟଣାରେ ନବବଧୂର ଭାଇ ମଧ୍ୟ ଗୁରୁତର ଆହତ ହୋଇଛନ୍ତି । 

ମିଳିଥିବା ସୂଚନା ଅନୁସାରେ, ବଲାଙ୍ଗୀର ଲୋଇସିଂହା ଥାନା ଆମପାଲି ଗାଁରୁ ବେଲପଡା ଥାନା ମଣ୍ଡଳ ଗାଁକୁ ବରଯାତ୍ରୀ ଯାଇଥିଲା  । ବରଯାତ୍ରୀ ପ୍ରୋସେସନ ଚାଲିଥିଲା ବେଳେ ରାତି ପ୍ରାୟ ୧୧ଟା ସମୟରେ ବରଯାତ୍ରୀ ଗାଡି ଡ୍ରାଇଭର ଅଘଟଣ ଘଟାଇଥିଲେ  । ବର ବସିଥିବା ଗାଡି ଧକ୍କାରେ ଟଳିପଡିଲେ ବରପିତା  । ଘଟଣା ସ୍ଥଳରେ ବରପିତା ଚୈତନ୍ୟ ବାଗଙ୍କ ମୃତ୍ୟୁ ଘଟିଥିଲା  । ଦୁର୍ଘଟଣାରେ କନ୍ୟାର ଭାଇ ମଧ୍ୟ ଗୁରୁତର ଅବସ୍ଥାରେ ଚିକିତ୍ସାଧିନ ଥିବା ଜଣାପଡ଼ିଛି  । ଘଟଣାସ୍ଥଳରେ ବେଲପଡା ପୋଲିସ ପହଂଚି ଦୁର୍ଘଟଣା ଘଟାଇଥିବା ଗାଡିକୁ ଜବତ କରିବା ସହ ଡ୍ରାଇଭରକୁ ଅଟକ ରଖି ତଦନ୍ତ ଜାରି ରଖିଛି  । ଦୁର୍ଘଟଣା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା  । ବର ଓ କନ୍ୟା ପକ୍ଷ ଲୋକଙ୍କ ଆଲୋଚନା ପରେ ବିଳମ୍ବରେ ବାହାଘର ସମ୍ପନ୍ନ ହୋଇଥିଲା  । ବର କାନ୍ଦିକାନ୍ଦି ବାହା ହୋଇ ଘରକୁ ଫେରିଛି  ।