ପୂଜା ପାଇଁ ରାଜଧାନୀରେ ଅସମ୍ଭାଳ ଭିଡ଼ : ଅପରାହ୍ନ ସାଢେ ୩ଟା ପରଠୁ ଗଡ଼ୁନି ମୋ ବସ

ଭୁବନେଶ୍ବର : ମହାମାୟାଙ୍କ ମହାପୂଜାରେ କମ୍ପୁଛି ଗଗନପବନ । ଆଜି ମଣ୍ଡପରେ ମହାନବମୀ ପୂଜା ହେଉଛି । ମାଆଙ୍କ ଆବାହନରେ କମ୍ପୁଛି ପୂଜା ମଣ୍ଡପ । ଘଣ୍ଟଘଣ୍ଟା, ଶଙ୍ଖଧ୍ୱନି ଓ ବ୍ରାହ୍ମଣଙ୍କ ମନ୍ତ୍ରପାଠରେ କମ୍ପୁଛି ମଣ୍ଡପ । ଶ୍ରଦ୍ଧାଳୁଙ୍କ ଗହଳି ଚହଳି ଲାଗି ରହିଛି । ପୂଜା ପାଇଁ ରାଜଧାନୀ ଭୁବନେଶ୍ବରରେ ଅସମ୍ଭାଳ ଭିଡ ଦେଖାଦେଇଛି। ଯେଉଁଥି ପାଇଁ ଟ୍ରାଫିକ୍‌ ସମସ୍ୟା ମଧ୍ୟ ଦେଖାଦେଉଛି। ଯାହାକୁ ନଜରରେ ରଖି ଅପରାହ୍ନ ସାଢେ ତିନିଟାରୁ ମୋ ବସ ସହର ଭିତରେ ନଚଲାଇବାକୁ ବିଚାର କରୁଛି କ୍ରୁଟ ।

କ୍ରୁଟ ପକ୍ଷରୁ ଟୁଇଟ କରି କୁହାଯାଇଛି, ଅପରାହ୍ନରେ ଅସମ୍ଭାଳ ଭିଡ ଜମୁଛି । ଟ୍ରାଫିକ ସମସ୍ୟା ବି ଦେଖା ଦେଉଛି । ଏସବୁ ଭିତରେ ମୋ ବସ ଚାଲିବ କି ନାହିଁ ଏବଂ ଯଦି ଚାଲିବ ସମୟରେ ପରିବର୍ତ୍ତନ କରାଯିବ କି ଏସବୁ ପରିସ୍ଥିତି ଦେଖି ନିଷ୍ପତ୍ତି ନିଆଯିବ ବୋଲି କ୍ରୁଟ ପକ୍ଷରୁ କୁହାଯାଇଛି।

ଗତକାଲି ମହାଷ୍ଟମୀ ତିଥିରେ ପ୍ରବଳ ଭିଡ ହୋଇଥିଲା । ଏତେ ଭିଡି ଥିଲା ଯେ ଚାଲିଚାଲି ଯିବା ବି କାଠିକର ପାଠ ଥିଲା । ୮ କିମି ଯିବାକୁ ଅଢେଇଘଣ୍ଟା ଲାଗୁଥିଲା । ବିଶେଷ କରି ରସୁଲଗଡ, ବାଣୀବିହାର, ଶିଶୁଭବନ, ଜୟଦେବବିହାର, ପଟିଆ, ବରମୁଣ୍ଡା, ଆଚାର୍ୟ୍ୟବିହାର ଆଦି ରାସ୍ତାରେ ପ୍ରବଳ ଭିଡ ଦେଖିବାକୁ ମିଳିଥିଲା । ପୂଜା ମଣ୍ଡପ ସାମ୍ନାରେ ଯିବାକୁ ବାଟ ନଥିଲା ।

ରାଜଧାନୀ ଭୁବନେଶ୍ବରର ବଡ଼ ବଡ଼ ପୂଜା ପେଣ୍ଡାଲ ଓ ମଲ ଥିବା ରାସ୍ତାରେ ଟ୍ରାଫିକ୍ ଜାମ୍ ହୋଇଯାଉଛି । ଆଜି ନବମୀ ଓ ଆସନ୍ତାକାଲି ଦଶମୀ ଥିବାରୁ ଆହୁରି ଅଧିକ ଭିଡ଼ ହୋଇପାରେ । ଭିଡ଼କୁ କିପରି ନିୟନ୍ତ୍ରଣ କରାଯିବ ତାହା ପୁଲିସ ପାଇଁ ବଡ଼ ଚ୍ୟାଲେଂଜ ସୃଷ୍ଟି କରିପାରେ । ସୋସିଆଲ ମିଡିଆରେ କମିସନରେଟ୍ ପୁଲିସ ସଚେତନତା ପ୍ରୟାସ ଆରମ୍ଭ ହୋଇଛି । ଜରୁରୀ କାମ ଥିଲେ କେଉଁ ରାସ୍ତା ଦେଇ ଯିବେ, କେଉଁଠି ଟ୍ରାଫିକ୍ ଜାମ୍ କମ୍ ରହିଛି । ମଣ୍ଡପ ପାଖରେ କେଉଁଠି ପାର୍କିଂ ବ୍ୟବସ୍ଥା ରହିଛି, ସେନେଇ କମିଶନରେଟ୍ ପୁଲିସ ପକ୍ଷରୁ ସୂଚନା ଦିଆଯାଇଛି। ଆଉ ପୂଜା ସମୟରେ ମଧ୍ୟ ଲୁଟେରା ମାତିଛନ୍ତି। ଯାହାକୁ ନେଇ ପୁଲିସ ପକ୍ଷରୁ ଲୋକମାନଙ୍କୁ ସତର୍କ କରାଯାଇଛି।