ମହଙ୍ଗା ହେଲା ଆମେରିକା-ୟୁରୋପ ଯାତ୍ରା, କିଛି ରୁଟ୍‌ରେ ଭଡ଼ା ବହୁ ଗୁଣ ବଢ଼ିଯିବ

ନୂଆଦିଲ୍ଲୀ : କାଶ୍ମୀର ପହଲଗାମ୍‌ରେ ପର୍ଯ୍ୟଟକଙ୍କ ଉପରେ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ପରସ୍ପର ବିରୁଦ୍ଧରେ କଡ଼ା ଆଭିମୁଖ୍ୟ ପୋଷଣ କରିଛନ୍ତି। ଏହାମଧ୍ୟରେ ଭାରତୀୟ ବିମାନ ପାଇଁ ପାକିସ୍ତାନ ତାର ଆକାଶ ମାର୍ଗ ବନ୍ଦ କରିଦେଇଛି। ଏପରି ପରିସ୍ଥିତିରେ ଯଦି ଜଣେ ନିକଟ ଭବିଷ୍ୟତରେ ଆମେରିକା-ୟୁରୋପ କିମ୍ବା ପାଶ୍ଚାତ୍ୟ ଦେଶଗୁଡ଼ିକୁ ବିମାନ ଯାତ୍ରା କରିବାକୁ ଯୋଜନା କରୁଛନ୍ତି, ତେବେ ତାଙ୍କୁ ଟିକଟ ବାବଦ ଅଧÒକ ଅର୍ଥ ବ୍ୟୟ କରିବାକୁ ପଡିପାରେ। ପ୍ରକୃତରେ, ଭାରତୀୟ ବିମାନ ପାଇଁ ପାକିସ୍ତାନର ଆକାଶପଥ ବନ୍ଦ କରିବାର ନିଷ୍ପତ୍ତି ଭାରତୀୟ ବିମାନ ଶିଳ୍ପ ଉପରେ ଗମ୍ଭୀର ପ୍ରଭାବ ପକାଇଛି। ଏହାର ଅର୍ଥ ହେଉଛି କୌଣସି ଭାରତୀୟ ବିମାନ ପାକିସ୍ତାନ ଉପରେ ଉଡ଼ିପାରିବନାହିଁ। ଏପରି ପରିସ୍ଥିତିରେ, ଭାରତୀୟ ବିମାନ ସେବା ପ୍ରଦାନକାରୀ ସଂସ୍ଥାଗୁଡ଼ିକୁ ବିକଳ୍ପ ରୁଟ୍ ବାଛିବାକୁ ପଡୁଛି। ଏହି ରାସ୍ତାଗୁଡ଼ିକ ବହୁତ ଲମ୍ବା ଏବଂ ଏଥିରେ ଖର୍ଚ୍ଚ ମଧ୍ୟ ଅଧିକ ପଡ଼ିବ। ଏଟିଏଫ୍‌ ମୂଲ୍ୟରେ ବୃଦ୍ଧି ଯୋଗୁଁ ଭଡ଼ା ବଢ଼ିଯାଇଚି,ଯାହା ଫଳରେ ଯାତ୍ରୀ ଏବଂ ବିମାନ କମ୍ପାନୀ ଉଭୟ ଅସୁବିଧାର ସମ୍ମୁଖୀନ ହେଉଛନ୍ତି।

ପାକିସ୍ତାନୀ ଏହାର ଆକାଶ ପଥ ବନ୍ଦ କରିବା ଯୋଗୁଁ, ଭାରତୀୟ ବିମାନ ସେବା ପ୍ରଦାନକାରୀ ସଂସ୍ଥାଗୁଡ଼ିକୁ ବିକଳ୍ପ ରୁଟ୍ ବ୍ୟବହାର କରିବାକୁ ପଡୁଛି, ଯାହା ଫଳରେ ଉଡ଼ାଣ ଅବଧି ୭୦ ରୁ ୮୦ ମିନିଟ୍ ବୃଦ୍ଧି ପାଇଛି। ଉଦାହରଣ ସ୍ୱରୂପ, ଏୟାର ଇଣ୍ଡିଆର ଦିଲ୍ଲୀ-ଶିକାଗୋ ବିମାନଗୁଡ଼ିକୁ ଏବେ ଇନ୍ଧନ ଭରିବା ପାଇଁ ୟୁରୋପରେ ଅଟକିବାକୁ ପଡୁଛି, ଯାହା ଫଳରେ ଯାତ୍ରା ସମୟ ଏବଂ ମୂଲ୍ୟ ଉଭୟ ବୃଦ୍ଧି ପାଉଛି। ଏହା ପ୍ରଥମ ଥର ନୁହେଁ ଯେତେବେଳେ ପାକିସ୍ତାନ ଭାରତ ପାଇଁ ତାର ଆକାଶପଥ ବନ୍ଦ କରିଛି। ଫେବୃଆରୀ ୨୦୧୯ ରେ ପୁଲୱାମା ଆକ୍ରମଣ ପରେ ବାଲାକୋଟ ଏୟାରଷ୍ଟ୍ରାଇକର ଜବାବରେ ପାକିସ୍ତାନ ଚାରି ମାସ ପାଇଁ ତାର ଆକାଶପଥ ବନ୍ଦ କରିଦେଇଥିଲା।

ସେହି ସମୟରେ, ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂହ ପୁରୀ କହିଥିଲେ ଯେ ଭାରତୀୟ ବିମାନ କମ୍ପାନୀଗୁଡ଼ିକୁ ପ୍ରାୟ ୫୪୦ କୋଟିର କ୍ଷତି ହୋଇଛି। କେବଳ ଏୟାର ଇଣ୍ଡିଆ ୪୯୧ କୋଟି, ସ୍ପାଇସଜେଟ୍ ୩୦.୭୩ କୋଟି, ଇଣ୍ଡିଗୋ ୨୫.୧ କୋଟି ଏବଂ ଗୋ ଏୟାର ୨.୧ କୋଟି ଟଙ୍କାର କ୍ଷତି ସହିଛି। ଆମେରିକା, ୟୁରୋପ, ୟୁକେ, ମଧ୍ୟପ୍ରାଚ୍ୟ ଭଳି ଭାରତକୁ ଯାଉଥିବା ପ୍ରାୟ ସମସ୍ତ ପ୍ରମୁଖ ଆନ୍ତର୍ଜାତୀୟ ବିମାନଗୁଡ଼ିକ ପାକିସ୍ତାନ ଉପରେ ଉଡ଼ାଣ କରନ୍ତି କାରଣ ଏହା ସବୁଠାରୁ ଛୋଟ ଏବଂ କମ୍ ସମୟ ସାପେକ୍ଷ ରୁଟ୍। ଏୟାର ଇଣ୍ଡିଆ ଏବଂ ଇଣ୍ଡିଗୋ ବିମାନଗୁଡ଼ିକ ମୁଖ୍ୟତଃ ମଧ୍ୟପ୍ରାଚ୍ୟ, ତୁର୍କିୟ, କକେସସ୍ ଏବଂ ମଧ୍ୟ ଏସିଆକୁ ଏହି ରୁଟ୍ ବ୍ୟବହାର କରନ୍ତି। ବିଶେଷଜ୍ଞମାନଙ୍କର କହିବାନୁଯାୟୀ, ଯଦି ଏହି ପରିସ୍ଥିତି ଦୀର୍ଘ ଦିନ ପର୍ଯ୍ୟନ୍ତ ଜାରି ରୁହେ ତେବେ ୨୦୧୯ ପରି ସମାନ ପ୍ରଭାବ ଦେଖିବାକୁ ମିଳିବ। ଉଡ଼ାଣ ସମୟ ମଧ୍ୟ ବୃଦ୍ଧି ପାଇବ। ଗତଥର ପରି ଭଡ଼ାରେ ମଧ୍ୟ ଏକ ବଡ଼ ଧରଣର ବୃଦ୍ଧି ହୋଇପାରେ।