ରୋମ୍‌: ଖ୍ରୀଷ୍ଟ ସଂପ୍ରଦାୟର ସର୍ବୋଚ୍ଚ ଧର୍ମଗୁରୁ ପୋପ ଫ୍ରାନ୍ସିସ୍‌ଙ୍କ ଦେହାନ୍ତ ହୋଇଛି। ନିମୋନିଆରେ ପୀଡ଼ିତ ହୋଇ ପ୍ରାୟ ୫ ସପ୍ତାହ ହେଲା ଚିକିତ୍ସାଧୀନ ଥିଲେ ପୋପ ଫ୍ରାନ୍ସିସ୍‌। ସୋମବାର ସକାଳ ୭ଟା ୩୫ ମିନି୍‌ରେ ୮୮ ବର୍ଷୀୟ ପୋପ ଫ୍ରାନ୍ସିସ୍‌ଙ୍କ ମୃତ୍ୟୁ ହୋଇଥିବା ନେଇ ଭାଟିକାନ ସିଟି ପକ୍ଷରୁ ସୂଚନା ଦିଆଯାଇଛି। ସେ ଭାଟିକାନର କାସା ସାଣ୍ଟା ମାର୍ଟାସ୍ଥିତ ତାଙ୍କ ବାସଭବନରେ ଶେଷ ନିଶ୍ୱାସ ତ୍ୟାଗ କରିଥିଲେ। ଭାଟିକାନ୍ ନ୍ୟୁଜ୍ ଅନୁଯାୟୀ, ସେ ଦୀର୍ଘଦିନ ଦିନ ଧରି ଅସୁସ୍ଥ ଥିଲେ। ଗତକାଲି, ଇଷ୍ଟର ଅବସରରେ, ସେ ବହୁତ ଦିନ ପରେ ଲୋକଙ୍କ ସମ୍ମୁଖରେ ଉପସ୍ଥିତ ହୋଇଥିଲେ।

ପୋପ୍ ଫ୍ରାନ୍ସିସ୍ ବହୁତ ଦିନ ଧରି ଅସୁସ୍ଥ ଥିଲେ। ପୋପ୍ ପ୍ରାୟ ଗୋଟିଏ ମାସ ଧରି ହସ୍ପିଟାଲରେ ଚିକିତ୍ସା ପରେ ମାର୍ଚ୍ଚ ୨୪ ତାରିଖରେ ତାଙ୍କ ବାସଭବନ, କାସା ସାଣ୍ଟା ମାର୍ଟାକୁ ଫେରି ଆସିଥିଲେ। ହସ୍ପିଟାଲରୁ ଫେରିବା ପରେ, ସେ ହସ୍ପିଟାଲ ବାହାରେ ଏକତ୍ରିତ ହୋଇଥିବା ବହୁ ସଂଖ୍ୟକ ଲୋକଙ୍କୁ ଆଶୀର୍ବାଦ ଦେଇଥିଲେ। ପୋପଙ୍କୁ ସାର୍ବଜନୀନ ଭାବରେ ଦେଖିବା ପରେ ଲୋକମାନେ ବହୁତ ଖୁସି ହୋଇଥିଲେ।

ପୋପ୍ ବେନେଡିକ୍ଟ ଷୋଡ଼ଶଙ୍କ ପରେ ପୋପ୍ ହୋଇଥିଲେ ଫ୍ରାନସିସ୍ । ୨୦୧୩ରେ ସେ ଦାୟିତ୍ଵ ନେଇଥିଲେ ଏବଂ ୧୨ ବର୍ଷ ଧରି ପୋପ୍ ଥିଲେ । ଲାଟିନ ଆମେରିକାର ପ୍ରଥମ ବ୍ୟକ୍ତି ଭାବେ ସେ ପୋପ୍ ହୋଇଥିଲେ।। ତାଙ୍କ ମୃତ୍ୟୁରେ ସମଗ୍ର ବିଶ୍ବର ଖ୍ରୀଷ୍ଟଧର୍ମାବଲମ୍ବୀଙ୍କ ମଧ୍ୟରେ ଶୋକର ଛାୟା ଖେଳିଯାଇଛି।

ସେ ଗୋଟିଏ ମାସରୁ ଅଧିକ ସମୟ ପାଇଁ ହସ୍ପିଟାଲରେ ଭର୍ତ୍ତି ହୋଇଥିଲେ

ପୋପ୍ ଫ୍ରାନ୍ସିସ୍‌ଙ୍କୁ ଫେବୃଆରୀ ୧୪ ତାରିଖରେ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କର ଡବଲ ନିମୋନିଆ ହୋଇଥିଲା। ହସ୍ପିଟାଲରେ ଡାକ୍ତରଙ୍କ ତତ୍ତ୍ୱାବଧାନରେ ତାଙ୍କର ଚିକିତ୍ସା କରାଯାଇଥିଲା। ଗୋଟିଏ ମାସରୁ ଅଧିକ ସମୟ ଧରି ହସ୍ପିଟାଲରେ ରହିବା ପରେ ତାଙ୍କୁ ଡିସଚାର୍ଜ କରାଯାଇଥିଲା।

ଯୁବକ ଅବସ୍ଥାରେ ଫୁସଫୁସର ଏକ ଅଂଶ କଢ଼ାଯାଇଥିଲା

ପୋପ୍ ଫ୍ରାନ୍ସିସ୍ ଯୁବକ ଥିବା ସମୟରେ, ସଂକ୍ରମଣ ଯୋଗୁଁ ତାଙ୍କର ଗୋଟିଏ ଫୁସଫୁସକୁ କାଢ଼ିବାକୁ ପଡିଥିଲା। ଏହି କାରଣରୁ ତାଙ୍କୁ ଶ୍ୱାସକ୍ରିୟାରେ ସମସ୍ୟା ହେଉଥିଲା। ୨୦୨୩ ମସିହାରେ ମଧ୍ୟ ତାଙ୍କୁ ଫୁସଫୁସ ସଂକ୍ରମଣ ଯୋଗୁଁ ଡାକ୍ତରଖାନାରେ ଭର୍ତ୍ତି ହେବାକୁ ପଡିଥିଲା।

ଭାରତ ଗସ୍ତକୁ ନେଇ କଳ୍ପନାଜଳ୍ପନା ଚାଲିଥିଲା

ପୋପ୍ ଫ୍ରାନ୍ସିସ୍ ଭାରତ ଗସ୍ତରେ ଆସିବାକୁ ଯାଉଥିଲେ। ଗତ ବର୍ଷ ଡିସେମ୍ବରରେ, କେନ୍ଦ୍ର ମନ୍ତ୍ରୀ ଜର୍ଜ କୁରିଏନ୍ କହିଥିଲେ ଯେ ପୋପ୍ ଫ୍ରାନ୍ସିସ୍ ୨୦୨୫ ପରେ ଭାରତ ଗସ୍ତରେ ଆସିପାରନ୍ତି। କ୍ୟାଥୋଲିକ୍ ଚର୍ଚ୍ଚ୨୦୨୫କୁ ଜୁବିଲି ବର୍ଷ ଭାବରେ ଘୋଷଣା କରିଛି। ଭାରତ ପୂର୍ବରୁ ପୋପ୍ ଫ୍ରାନ୍ସିସ୍‌ଙ୍କୁ ଆନୁଷ୍ଠାନିକ ଭାବରେ ନିମନ୍ତ୍ରଣ କରିସାରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ତାଙ୍କୁ ସିଧାସଳଖ ନିମନ୍ତ୍ରଣ କରିଛନ୍ତି। ପୋପଙ୍କ ସ୍ୱାସ୍ଥ୍ୟ ଏବଂ ସୁବିଧା ଅନୁସାରେ ଯାତ୍ରା ସ୍ଥିର କରାଯିବାର ଥିଲା।