ବାରିପଦା/ମୋରଡ଼ା : ମୟୂରଭଞ୍ଜ ଜିଲ୍ଲାରେ ଥମୁନି ହାତୀ ମଣିଷ ଲଢେ଼ଇ। ଗତ କାଲି ବିଳମ୍ବିତ ରାତି ଓ ଆଜି ସକାଳେ ହାତୀ ଆକ୍ରମଣରେ ପୁଣି ଯାଇଛି ୩ ନିରୀହ ଜୀବନ। ସୂଚନା ଅନୁଯାୟୀ ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ରେଞ୍ଜ ଅନ୍ତର୍ଗତ ସମାଇଡ଼ିହି ଗ୍ରାମରେ ଗତକାଲି ବିଳମ୍ବିତ ରାତି ରେ ପ୍ରବେଶ କରି ଲୋକଙ୍କୁ ଆତଙ୍କିତ କରିବା ସହ ବ୍ୟାପକ କ୍ଷୟକ୍ଷତି ଘଟାଇବା ସହ ନିରୀହ ନାବାଳିକା କୁ ଅତ୍ୟନ୍ତ ନିର୍ମମ ଭାବେ କଚାଡି ଜୀବନରୁ ମାରି ଦେଇଥିବା ଜଣାପଡିଛି। ଉକ୍ତ ଗ୍ରାମର ପିତାମ୍ବର ପରମାଣିକ ଙ୍କ ପରିବାର ଖାଇ ପିଇ ଶୋଇଥିବା ବେଳେ ହଠାତ ଏକ ଦନ୍ତା ହାତୀ ପିତାମ୍ବର ଙ୍କ ଘର ଉପରେ ଆକ୍ରମଣ କରିବା ସହ ପିତାମ୍ବରଙ୍କ ନାବାଳିକା ପାଞ୍ଚ ବର୍ଷିଆ ଝିଅ ଗୁନୁ ପରମାଣିକ କୁ ଶୁଣ୍ଢରେ ଉଠାଇ କଚାଡି ଗୋଡ଼ ରେ ଦଳି ଜୀବନରୁ ମାରିଦେଇଛି।

ଅନ୍ୟ ପଟେ ବେତନଟୀ ରେଞ୍ଜ ତାଡ଼ିକି ଗ୍ରାମରେ ଜଣେ ବୃଦ୍ଧ ଘରେ ଶୋଇଥିବା ବେଳେ ହାତୀ ଆକ୍ରମଣରେ ଫଳରେ କାନ୍ଥ ପଡ଼ିବାରୁ ବୃଦ୍ଧ ଙ୍କ ମୃତ୍ୟ ହୋଇଛି। ମୃତକ ବୃଦ୍ଧ ଜଣଙ୍କ ହେଲେ ଦେବ ଦେହୁରୀ। ସେହିପରି ବାଙ୍ଗିରିପୋଷି ରେଞ୍ଜ ତଥା ଝାରପୋଖରିଆ ଥାନା ଅଧୀନ ଶିର୍ଷା ପଞ୍ଚାୟତର ପାଣିଶୋଳ ଗ୍ରାମରେ ଭବାନୀ ଶଙ୍କର ମହାନ୍ତଙ୍କର ହାତୀ ଆକ୍ରମଣରେ ମୃତ୍ୟୁ ଘଟିଛି । ସୀମାନ୍ତ ଝାଡଖଣ୍ଡ ଅଞ୍ଚଳକୁ ପଳାଇଯାଇଥିବା ହାତୀପଲ ପୁଣି ରାତିରେ ଫେରିଆସିବାରୁ ଗ୍ରାମବାସୀ ହାତୀମାନଙ୍କୁ ଘଉଡାଇଥିଲେ।

ଏହି ସମୟରେ ଏକ ହାତୀ ଆକ୍ରମଣ ପାଇଁ ଦୌଡି ଆସିବା ବଳେ ସେ ନିଜ ଘରକୁ ପ୍ରବେଶ ପାଇଁ ଉଦ୍ୟମ କରିବା ପୂର୍ବରୁ ହାତୀ ଆକ୍ରମଣ ର ଶିକାର ହୋଇଥିଲେ । ସମସ୍ତଙ୍କ ମୃତଦେହ କୁ ବନ ବିଭାଗ ଉଦ୍ଧାର କରି ବ୍ୟବଚ୍ଛେଦ ପାଇଁ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଆଣ୍ଡ ହସ୍ପିଟାଲ କୁ ପଠାଇଛି। ତେବେ ବନ ବିଭାଗ ପକ୍ଷରୁ ହାତୀ ଘଉଡ଼ାଇବା ପାଇଁ ବ୍ୟବସ୍ଥା କରାଯାଉ ନ ଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି। ବିଭାଗ ପକ୍ଷରୁ ଅଧିକ ତଦନ୍ତ ପରେ କ୍ଷତିପୂରଣ ଦିଆଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି।