କଣ୍ଟାମାଳ : ନାବାଳିକା ଶାଳୀକୁ ବିବାହ କରିବା ଜିଦ୍‌ରେ ଶ୍ୱଶୁର ଘରେ ଉନ୍ମତ୍ତ କାଣ୍ଡ କରିଛି ଜ୍ୱାଇଁ। ଏପରିକି ଶଳାକୁ ଅପହରଣ କରି ନେଇଥିବା ବେଳେ ସଂପୃକ୍ତ ନାବାଳିକା ଶାଳୀ ଲୋକଲଜ୍ଜା ଭୟରେ ଆତ୍ମହତ୍ୟା ଉଦ୍ୟମ କରିଥିବା ଜଣାପଡ଼ିଛି। ମନମୁଣ୍ଡା ଥାନାରେ ହୋଇଥିବା ଅଭିଯୋଗ ଅନୁସାରେ, ବୌଦ୍ଧ ଥାନା ସାମ୍ପଚ ଗ୍ରାମର ଲବ ସାହୁଙ୍କ ପୁଅ ରାଜେଶ ଗତ ୪ ବର୍ଷ ପୂର୍ବେ ମନମୁଣ୍ଡା ଥାନା ଚୌରିଆପଦର ଗ୍ରାମର ଶ୍ୟାମସୁନ୍ଦର ସାହୁଙ୍କ ଝିଅ ଦୀପାଳୀଙ୍କୁ ବିବାହ କରିଥିଲେ। ସେମାନଙ୍କ ଦୁଇଟି ପୁଅ ମଧ୍ୟ ଅଛନ୍ତି। ବିବାହ ବେଳେ ଆବଶ୍ୟକ ଯୌତୁକ ପାଇଥିଲେ ମଧ୍ୟ ଅଧିକ ଯୌତୁକ ପାଇଁ ରାଜେଶ ପତ୍ନୀକୁ ନିର୍ଯାତନ ଦେଇଆସୁଥିଲେ।

ତେବେ ପରବତ୍ତୀ ସମୟରେ ରାଜେଶ ପତ୍ନୀକୁ ଅଧିକ ଯୌତୁକ ଆଣିବା ପାଇଁ କହିଥିଲେ। ଆଉ ଯଦି ଯୌତୁକ ନଆଣିଲ ତେବେ ତମ ସାନ ଭଉଣୀ ନାବାଳିକା ଶାଳୀ(୧୪)କୁ ବାହା ହେବା ପାଇଁ  କହିଥିଲେ। ପତ୍ନୀ ପ୍ରତିବାଦ କରିବାରୁ ସେ ଶାଳୀକୁ ସ୍କୁଲ ଗଲା ବେଳେ ଗୁଣ୍ଡା ଧରି ଅପହରଣ କରି ନେଇ ଯିବାକୁ ଉଦ୍ୟମ କରି ବିଫଳ ହୋଇଥିଲା। ତା’ପରେ ସେ ଶାଳୀ ସହ ବାହା କରାଇ ଦେବା ପାଇଁ ଶାଶୁ ଅସିନ ଓ ଶ୍ୱଶୁର ଶ୍ୟାମସୁନ୍ଦରକୁ କହିଥିଲା। ଏପରିକି ସେମାନଙ୍କୁ ଧମକ ଦେଇଥିଲା। ତେବେ ଏହି ଘଟଣାରେ ନାବାଳିକା ଶାଳୀ ଲୋକଲଜ୍ଜା ଭୟରେ ଗତ ୧୦ ତାରିଖରେ ବିଷ ପିଇ ଦେଇଥିଲେ। ତାକୁ ପ୍ରଥମେ ସୋନପୁର ଓ ପରେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ବର୍ତ୍ତମାନ ସେ ଚିକିତ୍ସିତ ହେଉଛି। ତା ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି।

ଏହି ଘଟଣାରେ ପରେ ରାଜେଶ ପତ୍ନୀ ଓ ପିଲାମାନଙ୍କୁ ଶ୍ୱଶୁର ଘରେ ଛାଡି ଦେଇଥିଲା। ଆଜି ଅପରାହ୍ନରେ ସେ ଅନ୍ୟ ୩ ଜଣ ସହଯୋଗୀଙ୍କ ସହ ଆସି ନାବାଳକ ଶଳା(୧୦)କୁ ଅପହରଣ କରି ନେଇଥିବା ଅଭିଯୋଗ ହୋଇଛି। ତେବେ ନାବାଳକର କାକା ଗଣେଶ ଗ୍ରାମବାସୀଙ୍କ ସହ ସେମାନଙ୍କୁ ଗୋଡ଼ାଇ ନାବାଳକକୁ ଉଦ୍ଧାର କରିଥିଲେ ଏବଂ ସେମାନଙ୍କୁ ଧରିବା ସହ ବାଇକ ଦୁଇଟାକୁ ଜବତ କରିଥିଲେ। ନାବାଳକର କାକା ଗଣେଶଙ୍କ ଏତଲା କ୍ରମେ ମନମୁଣ୍ଡା ଥାନାରେ ଆଜି ଏକ ମାମଲା ୪୪/୨୧ରେ ରୁଜୁ କରାଯାଇଛି। ରାଜେଶ ସମେତ ତାଙ୍କର ୩ ସହଯୋଗୀଙ୍କୁ ପୁଲିସ୍‍ ଗିରଫ କରିଛି। ଆସନ୍ତାକାଲି ସେମାନଙ୍କୁ କୋର୍ଟଚାଲାଣ କରାଯିବ ବୋଲି ଆଇଆଇସି ଗୋପୀନାଥ ପ୍ରଧାନ ସୂଚନା ଦେଇଛନ୍ତି।