ଭୁବନେଶ୍ବର : ସମଗ୍ର ରାଜ୍ୟରେ ଘରୋଇ ଉପଭୋକ୍ତାଙ୍କ ପାଇଁ ବଢିଲା ବିଦ୍ୟୁତ ଦର । ୨୦୨୧-୨୨ ମସିହା ପାଇଁ ଦର ଧାର୍ଯ୍ୟ  କଲେ ଓଇଆରସି।ଗତବର୍ଷ ତୁଳନାରେ ୫.୬୦ ପ୍ରତିଶତ ୟୁନିଟ ପିଛା ବିଦ୍ୟୁତ ଦର ବୃଦ୍ଧି କରାଯାଇଛି । ୟୁନିଟ୍ ପିଛା ସର୍ବନିମ୍ନ ୩୦ ପଇସା ବୃଦ୍ଧି କରାଯାଇଛି । ସେପଟେ ଏପ୍ରିଲ ୪ ରୁ ଏହି ନୂଆ ବର୍ଦ୍ଧିତ ଦର ଲାଗୁହେବା ନେଇ ମଧ୍ୟ ସୂଚନା ଦେଇଛି ଓଡ଼ିଶା ବିଦ୍ୟୁତ ନିୟାମକ ଆୟୋଗ । କିନ୍ତୁ ବିପିଏଲ ଏବଂ ଜଳସେଚନ ଉପଭୋକ୍ତାଙ୍କ ପାଇଁ ଦର ଅପରିବର୍ତ୍ତିତ ରହିବ।

ସେପଟେ ପ୍ରିପେଡ ଗ୍ରାହକଙ୍କ ପାଇଁ ୨ ପ୍ରତିଶତ ରିହାତି ରହିବ । ବଢିଥିବା ନୂଆ ବିଲରୁ ବାଦ ପଡିବେ କୃଷି ଏବଂ ବିପିଏଲ ପରିସରଭୁକ୍ତ ଲୋକେ । ଅର୍ଥାତ କୃଷି ଏବଂ ବିପିଏଲ ଶ୍ରେଣୀ ପରିସରଭୁକ୍ତ ବର୍ଗଙ୍କ ପାଇଁ ବର୍ଦ୍ଧିତ ଦର ଲାଗୁ ହେବନାହିଁ । ବିତରଣ ତାରିଫରେ ୩ ପଇସା ବୃଦ୍ଧି କରାଯାଇଛି । ୨୫ ପଇସାରୁ ୨୮ ପଇସା ହୋଇଛି ବିତରଣ ତାରିଫ ଦର । ନୂଆ ବୃଦ୍ଧି ନେଇ ସୂଚନା ଦେଇଛି ଓଡ଼ିଶା ବିଦ୍ୟୁତ ନିୟାମକ ଆୟୋଗ ।

ସୂଚନା ମୁତାବକ ପୂର୍ବରୁ ୫୦ ୟୁନିଟ ପର୍ଯ୍ୟନ୍ତ ୟୁନିଟ ପିଛା ଦର ରହିଥିଲା ୨ଟଙ୍କା ୭୦ ପଇସା । କିନ୍ତୁ ଯଦି ଏହି ନୂଆ ଦର ଲାଗୁ ହୁଏ ତେବେ ୫୦ ୟୁନିଟ ପର୍ୟ୍ୟନ୍ତ ୟୁନିଟ ପିଛା ଦର ହେବ ୩ ଟଙ୍କା ୫୧ ପଇସା । ସେହିପରି ୨୦୦ ୟୁନିଟ ପର୍ଯ୍ୟନ୍ତ ୪ଟଙ୍କା ୫୦ ପଇସା ଥିଲାବେଳେ ଏହା ବୃଦ୍ଧି ଘଟି ୪.୮୦ ହେବ । ବର୍ତ୍ତମାନ ୨୦୧-୪୦୦ ୟୁନିଟ ପିଛା ଦର ରହିଛି ୫.୫୦ ପଇସା ଏବଂ ନୂଆ ଦର ଲାଗୁହେଲେ ୫.୮୦ ପଇସା ହେବ । ସେହିପରି ୪୦୦ ୟୁନିଟରୁ ଅଧିକ ୟୁନିଟ ପିଛା ଦର ୫.୯୦ ଫଇସା ରହିଥିବା ବେଳେ ବର୍ଦ୍ଧିତ ଦର ଅନୁଯାୟୀ ଏହା ୬.୨୦ ପଇସା ହେବ ବୋଲି ସୂଚନା ଦେଇଛି ଓଇଆରସି ।