କେନ୍ଦ୍ରାପଡା: ରାସ୍ତା କଲେ ନାହିଁ । ରାସ୍ତା ପାଇଁ ଯାଇଥିବା କୋଟି କୋଟି ଟଙ୍କା ମିଳିମିଶିି ଖାଇଗଲେ । ଯିଏ ପ୍ରତିବାଦ କଲା ତାକୁ ମିଛ ମାମଲାରେ ଫସେଇ ଜେଲ୍ ପଠାଇବା ଧମକ ଦେଲେ । କଥାଟି ଅଡୁଆ ଲାଗିଲେ ବି ସତ । ଏମିତି ଘଟଣା ଘଟିଛି କେନ୍ଦ୍ରାପଡା ଜିଲ୍ଳା ରାଜନଗର ଅଞ୍ଚଳରେ । ରାସ୍ତା ନ କରି ଫଳକ ମାରି ପାଖାପାଖି ଅଢ଼େଇ କୋଟି ଟଙ୍କା ହରିଲୁଟ୍ କରିଛନ୍ତି । ଅଭିଯୋଗ ପରେ ଏବେ ରାସ୍ତା କରିବେ ବୋଲି ପ୍ରଶାସନିକ ବାବୁମାନେ ପ୍ରତିଶ୍ରୁତି ଦେଉଛନ୍ତି । କେନ୍ଦ୍ରାପଡା ଜିଲ୍ଲା ଆଳି ବ୍ଲକ୍‌ର ଏକମାଣିଆ ପଞ୍ଚାୟତ ଚାରି ପଟେ ଘେରି ରହିଛି ନଦୀ । ଏହି ପଞ୍ଚାୟତରେ ୩ଟି ଗାଁ ରହିଛି । ପ୍ରାୟ ୫ ହଜାରୁ ଅଧିକ ଲୋକ ବସବାସ କରନ୍ତି । ଲୋକମାନେ ଯିବା ଆସିବା ପାଇଁ ଡଙ୍ଗା ଉପରେ ନିର୍ଭର କରନ୍ତି । ରାସ୍ତା କଥା ନ କହିବା ଭଲ । ପକ୍କା ରାସ୍ତା ପାଇଁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ୨ କୋଟି ୩୧ ଲକ୍ଷ ୮୦ ହଜାର ୧୮୮ ଟଙ୍କା ମଞ୍ଚୁର ହେଲା । ରାଜନଗର ବ୍ଲକ୍ କେରଡାଗଡ଼ ଘାଟ ରାସ୍ତା ଦେଇ ଏହି ୩ ଟି ଗାଁର ଲୋକମାନେ ଯିବାଆସିବା କରନ୍ତି ।

ଏକମାଣିଆ ପଞ୍ଚାୟତର ଏକମାଣିଆ, ନଳପାହି ଓ ଦକ୍ଷିଣଡିଆ ଆଦି ୩ଟି ଗାଁକୁ ଚାରିପଟୁ ବ୍ରାହ୍ମଣୀ ଓ ହଂସୁଆ ନଦୀ ଘେରିରହିଛି କ୍ଷ ତେବେ ରାସ୍ତା ନଥିବାରୁ ଲୋକେ ପାଣି କାଦୁଅରେ ପଚ ପଚ ହେବାକୁ ପଡୁଛି । ତେବେ ମଞ୍ଚୁର ଟଙ୍କାରେ ୩ କି.ମି ୭୫୦ ମିଟର ରାସ୍ତାର ବ୍ୟବସ୍ଥା ଥିଲା । କେରଡାଗଡ଼ ପୂର୍ତ୍ତ ବିଭାଗର ରାସ୍ତା ଠାରୁ ଘାଟ ପର୍ୟ୍ୟନ୍ତ ୭୦୦ ମିଟର ଓ ବାକି ୩ କି.ମି ୫୦ ମିଟର ନଦୀ ଆରପାରିରେ ଦକ୍ଷିଣଡିଆ ଗାଁ ଦେଇ ରାସ୍ତା ନିର୍ମାଣ ହେବାର ଥିଲା । ଏହି ରାସ୍ତା ୨୦୧୭ରୁ ଏପ୍ରିଲ୍ ୧୭ରୁ ୨୦୧୮ ଜାନୁଆରୀ ୨୦୧୮ରେ ଶେଷ ହେବାର ଥିଲା । ଠିକ୍ ସମୟରେ କାମ ଆରମ୍ଭ ହେଲା । ମାତ୍ର ୭ ଶହ ମିଟର ରାସ୍ତା କାମ ସରିଛି । ହେଲେ ଦକ୍ଷଣଡିଆ ରାସ୍ତା କଥା ଦୁରେ ଥାଉ ମାଟି ମୁଠେ ବି ପଡି ନାହିଁ । କିନ୍ତୁ ଫଳକ ମରାଯାଇଛି ୩ କି.ମି ୭୫୦ ମିଟର ରାସ୍ତାର କାମ ହୋଇଛି ବୋଲି । ସବୁଠାରୁ ବଡ଼ କଥା ହେଲା ଯେଉଁଠାରେ ଫଳକ ମରା ହେବା କଥା ସେଠାରେ ନ ମାରି ସେହି ସ୍ଥାନରୁ ୪ କିଲୋମିଟର ଦୂର ଅନ୍ୟ ଏକ ପଞ୍ଚାୟତର ଜଙ୍ଗଲିଆ ଜାଗାରେ ମାରି ଦେଇଛନ୍ତି । ତା’ଛଡା ପ୍ରତି ବର୍ଷ ରାସ୍ତା ମରାମତି ପାଇଁ ଆସୁଥିବା ଅର୍ଥ ଆଣି ଆତ୍ମସାତ ମଧ୍ୟ କରିଦେଇଛନ୍ତି । ଠିକାଦାରଙ୍କ ଠାରୁ ଆରମ୍ଭ କରି ଯନ୍ତ୍ରୀ ସମସ୍ତେ ଏଥିରେ ସାମିଲ ଥିବା ଜଣାପଡିଛି । ଆଶ୍ଚର୍ୟ୍ୟର କଥା ହେଉଛି ରାସ୍ତା କଥା ପଞ୍ଚାୟତ ଲୋକ ଅନେକ ଥର ଜିଲ୍ଳାପାଳ, ଆଳି ଓ ରାଜନଗର ବିଧାୟକଙ୍କୁ ଜଣାଇଛନ୍ତି । ହେଲେ ତାଙ୍କ କଥାକୁ କେହି ଶୁଣୁନାହାନ୍ତି । ପଞ୍ଚାୟତ ଲୋକଙ୍କ ଅଭିଯୋଗ ରାସ୍ତା ନ କରି ମିଳିମିଶି ଟଙ୍କା ଖାଇ ଦେଇଛନ୍ତି ।

ଗତ କିଛିଦିନ ତଳେ ରାସ୍ତା ଅଛି କି ନାହିଁ ସେ ବିଷୟରେ ଯାଞ୍ଚ କରିବାକୁ କେନ୍ଦ୍ରାପଡା ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀଯନ୍ତ୍ରୀ ଅନନ୍ତ ଗୋପାଳ ଶତପଥୀ ଓ ଅନ୍ୟ ଅଧିକାରୀମାନେ ଯାଇଥିଲେ । ଦକ୍ଷିଣଡ଼ିଆ ଗାଁରେ ବୁଲି ରାସ୍ତା ଖୋଜିଥିଲେ ହେଲେ ପାଇନଥିଲେ । କେରଡାଗଡ ପଟେ ମାତ୍ର ୭ ଶହ ମିଟର ରାସ୍ତା ପାଇଥିଲେ । ହେଲେ ବାକି ରାସ୍ତା ପାଇ ନଥିଲେ । ଗାଁ ଲୋକଙ୍କୁ ପ୍ରତିଶ୍ରୁତି ଦେଇଛନ୍ତି ଖୁବ୍ ଶୀଘ୍ର ରାସ୍ତା ନିର୍ମାଣ ହେବ । ଏହି ହରିଲୁଟ୍‌ରେ ଯେଉଁମାନେ ସାମିଲ୍ ଅଛନ୍ତି ସେମାନଙ୍କ ବିରୋଧରେ କାର୍ୟ୍ୟାନୁଷ୍ଠନ ହେବ । ଏବେ ଦେଖିବା ବାକି ରହିଲା ରାସ୍ତା ହେବ ନାଁ ପ୍ରତିଶ୍ରୁତି ଦେଇ କାମ ସାରିଦେବେ ।