ଆଜି ଜାତିର ପିତା ମହାତ୍ମା ଗାନ୍ଧୀଙ୍କ ୧୫୭ତମ ଜୟନ୍ତୀ, ଓଡ଼ିଶା ସହିତ ବାପୁଙ୍କର ଥିଲା ନିବିଡ଼ ସମ୍ପର୍କ

ଭୁବନେଶ୍ୱର: ଆଜି ଗାନ୍ଧୀ ଜୟନ୍ତୀ । ଜାତିର ପିତା ମହାତ୍ମା ଗାନ୍ଧୀଙ୍କ ୧୫୭ତମ ଜୟନ୍ତୀ। ସାରା ଦେଶ ଆଜି ମହାତ୍ମା ଗାନ୍ଧୀଙ୍କୁ ତାଙ୍କର ଜନ୍ମଜୟନ୍ତୀ ଅବସରରେ ଭକ୍ତିପୂତ ଶ୍ରଦ୍ଧାଞ୍ଜଳି ଅର୍ପଣ କରୁଛି। ତାଙ୍କ ଦ୍ୱାରା ପ୍ରଦର୍ଶିତ ସତ୍ୟ, ଅହିଂସା ଏବଂ ଶାନ୍ତିର ଚିରନ୍ତନ ବାର୍ତ୍ତାକୁ ଦେଶବାସୀ ଆଜିର ଦିନରେ ସ୍ମରଣ କରୁଛନ୍ତି।

ଅକ୍ଟୋବର ୨, ୧୮୬୯ ମସିହାରେ ଗୁଜରାଟର ପୋରବନ୍ଦରରେ ଜନ୍ମଗ୍ରହଣ କରିଥିବା ମୋହନଦାସ କରମଚାନ୍ଦ ଗାନ୍ଧୀ ଭାରତର ସ୍ୱାଧୀନତା ସଂଗ୍ରାମରେ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିଥିଲେ। ସତ୍ୟାଗ୍ରହ ଏବଂ ଅହିଂସା ମାଧ୍ୟମରେ ସେ ବ୍ରିଟିଶ ଶାସନ ବିରୋଧୀ ଆନ୍ଦୋଳନକୁ ଏକ ନୂଆ ଦିଗ ଦେଇଥିଲେ। ଗାନ୍ଧୀଜୀ କେବଳ ସ୍ୱାଧୀନତା ପାଇଁ ଲଢ଼ି ନଥିଲେ, ବରଂ ସ୍ୱଚ୍ଛତା, ଗ୍ରାମ ସ୍ୱରାଜ, ସାମାଜିକ ସମାନତା ଓ ଆତ୍ମନିର୍ଭରଶୀଳତା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। ଅସହଯୋଗ ଆନ୍ଦୋଳନ, ଦାଣ୍ଡି ଯାତ୍ରା ଏବଂ ଭାରତ ଛାଡ଼ ଆନ୍ଦୋଳନ ଭଳି ଐତିହାସିକ ଘଟଣା ସହ ତାଙ୍କର ନେତୃତ୍ୱ ଜଡ଼ିତ।

ମହାତ୍ମା ଗାନ୍ଧୀଙ୍କର ଓଡ଼ିଶା ସହିତ ଏକ ସ୍ୱତନ୍ତ୍ର ତଥା ନିବିଡ଼ ସମ୍ପର୍କ ରହିଥିଲା। ସ୍ୱାଧୀନତା ସଂଗ୍ରାମ ସମୟରେ ସେ ଅନେକ ଥର ଏହି ରାଜ୍ୟକୁ ଗସ୍ତରେ ଆସିଥିଲେ। ଓଡ଼ିଶାର ଦାରିଦ୍ର୍ୟ, ଗ୍ରାମୀଣ ଜୀବନଶୈଳୀ ଏବଂ ସାମାଜିକ ସ୍ଥିତି ତାଙ୍କୁ ଗଭୀର ଭାବରେ ପ୍ରଭାବିତ କରିଥିଲା। ଉତ୍କଳମଣି ଗୋପବନ୍ଧୁ ଦାସଙ୍କ ସମେତ ଓଡ଼ିଶାର ଅନେକ ବିଶିଷ୍ଟ ସ୍ୱାଧୀନତା ସଂଗ୍ରାମୀ ତାଙ୍କ ଗାନ୍ଧୀବାଦୀ ଆଦର୍ଶରେ ଅନୁପ୍ରାଣିତ ହୋଇ ଲୋକଙ୍କ ନିକଟରେ ସ୍ୱାଧୀନତାର ବାର୍ତ୍ତା ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ଅନ୍ୟପକ୍ଷରେ, ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକର ପ୍ରସିଦ୍ଧ ବାଲୁକା ଶିଳ୍ପୀ ଅଜୟ କୁମାର ଘୋଷ ନିଜ ବାଲୁକା କଳା ମାଧ୍ୟମରେ ଜାତିର ପିତାଙ୍କୁ ଏକ ନିଆରା ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ସେ ପ୍ରାୟ ୫ ଟନ୍ ବାଲି ବ୍ୟବହାର କରି ମହାତ୍ମା ଗାନ୍ଧୀଙ୍କର ଏକ ଆକର୍ଷଣୀୟ ପ୍ରତିମୂର୍ତ୍ତି ନିର୍ମାଣ କରିଛନ୍ତି। ଏହି କଳାକୃତି ମାଧ୍ୟମରେ ଶିଳ୍ପୀ ଜଣକ “ଗାନ୍ଧୀ ତୁମେ ଫେରି ଆସ” ବୋଲି ଏକ ହୃଦୟସ୍ପର୍ଶୀ ବାର୍ତ୍ତା ଦେଇଛନ୍ତି। ଗାନ୍ଧୀଜୀଙ୍କ ଆଦର୍ଶର ପ୍ରାସଙ୍ଗିକତାକୁ ଏହି ବାଲୁକା କଳା ମାଧ୍ୟମରେ ଦର୍ଶାଯାଇଛି।

ଗାନ୍ଧୀଜୀଙ୍କ ଅହିଂସା ଦର୍ଶନର ବିଶ୍ୱବ୍ୟାପୀ ଗୁରୁତ୍ୱକୁ ଦୃଷ୍ଟିରେ ରଖି ମିଳିତ ଜାତିସଂଘ ପକ୍ଷରୁ ଅକ୍ଟୋବର ୨ ତାରିଖକୁ ଆନ୍ତର୍ଜାତୀୟ ଅହିଂସା ଦିବସ ଭାବରେ ପାଳନ କରାଯାଉଛି। ଆଜିର ଏହି ପବିତ୍ର ଦିନରେ ନୂଆଦିଲ୍ଲୀର ରାଜଘାଟ ସମେତ ସମଗ୍ର ଦେଶରେ ବିଭିନ୍ନ ସ୍ମୃତିଚାରଣ ତଥା ପ୍ରାର୍ଥନା ସଭାମାନ ଆୟୋଜନ କରାଯାଇ ବାପୁଜୀଙ୍କୁ ସ୍ମରଣ କରାଯାଉଛି।