ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପକ୍ଷରୁ ବୟସ ଅନୁସାରେ ବ୍ୟାୟାମ ଗାଇଡଲାଇନ୍: ଜାଣନ୍ତୁ କାହାକୁ କେତେ ସମୟ ବ୍ୟାୟାମ କରିବା ଆବଶ୍ୟକ

ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପକ୍ଷରୁ ସୁସ୍ଥ ଜୀବନଯାପନ ପାଇଁ ଏକ ନୂତନ ଗାଇଡଲାଇନ୍ ଜାରି କରାଯାଇଛି। ବୟସ ବଢ଼ିବା ସହିତ ଶରୀରର ଆବଶ୍ୟକତା ବଦଳିଥାଏ, ତେଣୁ ପିଲାଦିନରୁ ଆରମ୍ଭ କରି ବୃଦ୍ଧାବସ୍ଥା ପର୍ଯ୍ୟନ୍ତ କେତେ ପରିମାଣର ବ୍ୟାୟାମ ବା ଶାରୀରିକ ପରିଶ୍ରମ ଆବଶ୍ୟକ, ସେ ନେଇ WHO ସ୍ପଷ୍ଟ ସୂଚନା ଦେଇଛି। ନିୟମିତ ବ୍ୟାୟାମ କେବଳ ଶାରୀରିକ ନୁହେଁ ବରଂ ମାନସିକ ସ୍ୱାସ୍ଥ୍ୟ ପାଇଁ ମଧ୍ୟ ଅତ୍ୟନ୍ତ ଲାଭଦାୟକ।

 ଶିଶୁ ଏବଂ କିଶୋର (୫ ରୁ ୧୭ ବର୍ଷ) ଏହି ବୟସ ବର୍ଗର ପିଲାମାନଙ୍କ ଶାରୀରିକ ଏବଂ ମାନସିକ ବିକାଶ ପାଇଁ ପ୍ରତିଦିନ ଅତିକମରେ ୬୦ ମିନିଟ୍ ର ମଧ୍ୟମରୁ ତୀବ୍ର ଧରଣର ଶାରୀରିକ କାର୍ଯ୍ୟକଳାପ କରିବା ଉଚିତ୍। ଦୌଡ଼ିବା, ଡେଇଁବା ଏବଂ ଖେଳକୁଦ ଭଳି କାର୍ଯ୍ୟକଳାପ ସେମାନଙ୍କ ହାଡ଼ ଏବଂ ମାଂସପେଶୀକୁ ମଜବୁତ କରିବାରେ ସାହାଯ୍ୟ କରେ। ଏହାସହ ସପ୍ତାହରେ ଅତିକମରେ ୩ ଦିନ ମାଂସପେଶୀ ଶକ୍ତିଶାଳୀ କରିବା ପାଇଁ ବ୍ୟାୟାମ କରିବା ଆବଶ୍ୟକ।

ବୟସ୍କ ବ୍ୟକ୍ତି (୧୮ ରୁ ୬୪ ବର୍ଷ) ଯୁବ ଏବଂ ବୟସ୍କମାନଙ୍କ ପାଇଁ ଶାରୀରିକ ସକ୍ରିୟତା ଅତ୍ୟନ୍ତ ଜରୁରୀ। WHO ର ପରାମର୍ଶ ଅନୁଯାୟୀ, ଏହି ବର୍ଗର ଲୋକେ ସପ୍ତାହକୁ ଅତିକମରେ ୧୫୦ ରୁ ୩୦୦ ମିନିଟ୍ ମଧ୍ୟମ ଧରଣର ଏରୋବିକ୍ ବ୍ୟାୟାମ (ଯେପରିକି ଜୋରରେ ଚାଲିବା, ସାଇକେଲ ଚଲାଇବା) କିମ୍ବା ୭୫ ରୁ ୧୫୦ ମିନିଟ୍ ତୀବ୍ର ଧରଣର ବ୍ୟାୟାମ କରିବା ଉଚିତ୍। ଏହାସହ ସପ୍ତାହରେ ୨ ଦିନ କିମ୍ବା ତଦୁର୍ଦ୍ଧ୍ୱ ସମୟ ମାଂସପେଶୀ ମଜବୁତ କରିବା ଭଳି ବ୍ୟାୟାମ କରିବା ଉଚିତ।

ବୃଦ୍ଧାବସ୍ଥା (୬୫ ବର୍ଷରୁ ଊର୍ଦ୍ଧ୍ୱ) ବୟସ୍କ ଲୋକମାନେ ନିଜର ଶାରୀରିକ ଭାରସାମ୍ୟ ଏବଂ ସମନ୍ୱୟ ବଜାୟ ରଖିବା ପାଇଁ ସ୍ୱତନ୍ତ୍ର ଧ୍ୟାନ ଦେବା ଉଚିତ୍। ସେମାନେ ମଧ୍ୟ ସପ୍ତାହକୁ ୧୫୦ ରୁ ୩୦୦ ମିନିଟ୍ ମଧ୍ୟମ ଧରଣର ବ୍ୟାୟାମ କରିବା ଆବଶ୍ୟକ। ବିଶେଷ କରି ପଡ଼ିଯିବା ଆଶଙ୍କାକୁ କମାଇବା ପାଇଁ ସପ୍ତାହରେ ୩ ଦିନ ବା ତା'ଠାରୁ ଅଧିକ ସମୟ ଭାରସାମ୍ୟ ଏବଂ ଶକ୍ତି ବୃଦ୍ଧି କରୁଥିବା ବ୍ୟାୟାମ କରିବାକୁ ପରାମର୍ଶ ଦିଆଯାଇଛି।

 ଗର୍ଭବତୀ ଏବଂ ପ୍ରସୂତି ମହିଳା ଗର୍ଭାବସ୍ଥା ଏବଂ ପ୍ରସବ ପରେ ମହିଳାମାନେ ସୁସ୍ଥ ରହିବା ପାଇଁ ସପ୍ତାହକୁ ଅତିକମରେ ୧୫୦ ମିନିଟ୍ ମଧ୍ୟମ ଧରଣର ଏରୋବିକ୍ କାର୍ଯ୍ୟକଳାପ କରିବା ଉଚିତ୍। ତେବେ କୌଣସି ବ୍ୟାୟାମ ଆରମ୍ଭ କରିବା ପୂର୍ବରୁ ସ୍ୱାସ୍ଥ୍ୟ ବିଶେଷଜ୍ଞଙ୍କ ପରାମର୍ଶ ନେବା ଜରୁରୀ ଅଟେ।