ବାଲେଶ୍ଵର : ବାଲେଶ୍ଵର ସହର ଉପକଣ୍ଠସ୍ଥ ଆଜିମାବାଦ ଠାରେ ଆଜି ଅପରାହ୍ନରେ ଏକ ମାଟି ବୋଝେଇ ଟ୍ରାକ୍ଟର ଉପରେ ଚଢ଼ାଉ କରାଯାଇ ୫୭ ହଜାର ୫୦୦ ଟଙ୍କାର ଜୋରିମାନା କରାଯାଇଛି। ଓଡି୦୧ଏଏ୬୬୫୯ ନମ୍ବରର ଏକ ଟ୍ରାକ୍ଟର ରେ ମାଟି ପରିବହନ ହେଉଥିବା ବେଳେ ବାଲେଶ୍ବର ଆଞ୍ଚଳିକ ପରିବହନ ଅଧିକାରୀ ରଶ୍ମି ରଞ୍ଜିତ ଦଳବେହେରା ଙ୍କ ନିର୍ଦ୍ଦେଶରେ ଏକ ଟିମ୍ ଚଢାଉ ଆଜିମାବାଦ ନିକଟରେ ଚଢ଼ାଉ କରିଥିଲେ। ତେବେ ଚଢ଼ାଉ ସମୟରେ ଏହି ଟ୍ରାକ୍ଟରଟି କୃଷି କାର୍ଯ୍ୟ ପାଇଁ ପଞ୍ଜିକୃତ କରାଯାଇଥିବା ବେଳେ ତାହାକୁ ମାଲ ପରିବହନ ସେ ବି ପୁଣି ବ୍ୟବସାୟୀକ କାମରେ ଲଗାଇବା, ଟ୍ରାକ୍ଟରର ଚାଳକଙ୍କ ନାମରେ ଲାଇସେନ୍ସ ନଥାଇ ଗାଡ଼ି ଚାଳନା କରିବା ଓ ଟ୍ରାକ୍ଟରକୁ ଚାଳନା କରୁଥିବା ଚାଳକ ଜଣକ ୧୭ ବର୍ଷର ନାବାଳକ ହୋଇଥିବାରୁ ଏହାକୁ ଜବତ କରାଯାଇ ଆଞ୍ଚଳିକ ପରିବହନ ଅଧିକାରୀଙ୍କ କାର୍ଯ୍ୟାଳୟ କୁ ଅଣାଯିବା ସହ ମାଲିକଙ୍କୁ ୫୭୫୦୦ ଟଙ୍କା ଜୋରିମାନା କରାଯାଇଛି।

ସେହିପରି ଟ୍ରାକ୍ଟର ରେ ମାଟି ପରିବହନ ହେଉଥିବାରୁ ଅତିରିକ୍ତ ତହସିଲଦାର ଅତନୁ ପ୍ରଧାନ ଆରଟିଓଙ୍କ କାର୍ଯ୍ୟାଳୟରେ ପହଞ୍ଚି ଟ୍ରାକ୍ଟର କୁ ଯାଞ୍ଚ କରିଛନ୍ତି।ବିନା ପରମିଟରେ ମାଟି ପରିବହନ ହେଉଥିବାରୁ ରାଜସ୍ବ ବିଭାଗ ତରଫରୁ ମଧ୍ୟ ଜୋରିମାନା ଆଦାୟ କରାଯିବ ବୋଲି ସୂଚନା ମିଳିଛି। ଅନ୍ୟପକ୍ଷରେ ଟ୍ରାକ୍ଟର ରେ ବ୍ୟବହାର ହେଉଥିବା ତେଲ ଅପମିଶ୍ରଣ ସମ୍ପର୍କରେ ଯଦି ଯାଞ୍ଚ ସମୟରେ ଜଣାପଡେ ତେବେ ସେଥିପାଇଁ ମଧ୍ୟ ଜୋରିମାନା ଆଦାୟ ହେବ ବୋଲି କୁହାଯାଇଛି।