ଭୁବନେଶ୍ୱର: ରାଜ୍ୟରେ ଲୋକକଳା କ୍ଷେତ୍ରର ବିକାଶ ନିମନ୍ତେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ । ଗଞ୍ଜାମ ଜିଲ୍ଲାର ପ୍ରହଲ୍ଲାଦ ନାଟକ ଓ କଳାହାଣ୍ଡି ଜିଲ୍ଲାର ଘୁମୁରା ନାଚ ପାଇଁ ନିୟମିତ ଲୋକକଳା ମଣ୍ଡଳୀ ପ୍ରତିଷ୍ଠା ପାଇଁ ଶ୍ରୀ ମଙ୍ଗରାଜ କେନ୍ଦ୍ର ନିକଟରେ ଦାବି କରିଛନ୍ତି ।

ବୁଧବାର ରାଜ୍ୟସଭାରେ ଏହି ପ୍ରସଙ୍ଗ ଉଠାଇ ସାଂସଦ ଶ୍ରୀ ମଙ୍ଗରାଜ କହିଛନ୍ତି ଯେ ପ୍ରୋତ୍ସାହନ ଅଭାବରୁ ଓଡ଼ିଶାର ଏହି ଦୁଇ ପ୍ରସିଦ୍ଧ ଲୋକକଳା ଅବଲୁପ୍ତ ଅବସ୍ଥାରେ ପହଞ୍ଚିଲାଣି । ଏଣୁ ଏହାର ପନରୁଦ୍ଧାର ନେଇ ଉଦ୍ୟମ କରାଯିବା ଦରକାର । ଏହି ଦୁଇ ଲୋକକଳା ପାଇଁ ୨ଟି ଲୋକକଳା ମଣ୍ଡଳୀ ଖୋଲିବାର ଆବଶ୍ୟକତା ରହିଛି । କେନ୍ଦ୍ର ସରକାର ତୁରନ୍ତ ଏହି ଦିଗରେ ପଦକ୍ଷେପ ଗ୍ରହଣ କରନ୍ତୁ ବୋଲି ସେ ଦାବି କରିଛନ୍ତି । ସେ କହିଛନ୍ତି ଯେ ଲୋକକଳା ଓ ସଂସ୍କୃତି କ୍ଷେତ୍ରରେ ଓଡ଼ିଶା ଏକ ସମୃଦ୍ଧ ରାଜ୍ୟ । ପ୍ରାଚୀନ ଓଡ଼ିଶାର ସଂସ୍କୃତି ଓ ସଭ୍ୟତା ସହ ଏହି ଲୋକକଳାଗୁଡ଼ିକର ଗଭୀର ସମ୍ପର୍କ ରହିଛି । ଏହା ଓଡ଼ିଶାର ଭାବାବେଗ ଓ ପରମ୍ପରା ସହ ମଧ୍ୟ ଜଡ଼ିତ । ମାତ୍ର ବିଡମ୍ବନା ହେଉଛି ଯେ ଏହି ଦୁଇ ଲୋକକଳାର କଳାକାରମାନେ ଦୁର୍ଦ୍ଦଶା ଦେଇ ଗତି କରୁଛନ୍ତି । ଏହି ଲୋକକଳାକୁ ଆବଶ୍ୟକୀୟ ପ୍ରୋତ୍ସାହନ ମିଳିଲେ କଳାକାରମାନେ ଉପକୃତ ହେବା ସହ ଲୋକକଳାର ପ୍ରଚାର ପ୍ରସାର ହୋଇପାରିବ । ଏହି ଦୁଇ ଐତିହ୍ୟ ଲୋକକଳାର ସ୍ୱତନ୍ତ୍ରତାକୁ ବଜାୟ ରଖିବାକୁ ହେଲେ କେନ୍ଦ୍ର ସରକାର ଏହାର ପୁନଃବିକାଶ ନେଇ ପଦକ୍ଷେପ ଗ୍ରହଣ କରନ୍ତୁ ବୋଲି ଶ୍ରୀମଙ୍ଗରାଜ କହିଛନ୍ତି ।