ପାରଳାଖେମୁଣ୍ଡି : ଦର୍ଶକ ମାନିଲେନି ସାମାଜିକ ଦୂରତା । ପୁଣି ଦୁଇ ସିନେମା ହଲ୍ ସିଲ୍ । ଗଜପତି ପାରଳାଖେମୁଣ୍ଡିର ୨ଟି ସିନେମା ହଲ୍ ସିଲ୍ କରିଛି ଜିଲ୍ଲା ପ୍ରଶାସନ । କୋଭିଡ୍ ଗାଇଡଲାଇନ୍ ଉଲ୍ଲଙ୍ଘନ ଅଭିଯୋଗରେ ଅନିର୍ଦ୍ଦିଷ୍ଟ କାଳ ଯାଏଁ ଜୟ ମା ଓ ଲକ୍ଷ୍ମୀ ସିନେମା ହଲ୍ ସିଲ୍ କରାଯାଇଛି । ସଂକ୍ରମଣ ବଢ଼ୁଥିବା ବେଳେ ପ୍ରଶାସନ ଏପରି କଡ଼ା ନିଷ୍ପତ୍ତି ନେଇଛି । ଗତକାଲି ଏକ ତେଲୁଗୁ ଫିଲ୍ମ ଦେଖିବାକୁ ସିନେମା ହଲରେ ପ୍ରବଡ଼ ଭିଡ଼ ଜମିଥିଲା । ଟିକେଟ କାଉଣ୍ଟରରେ ଭିଡ଼ ଜମିବାରୁ ପୋଲିସ ଲାଠି ମାଡ଼ ମଧ୍ୟ କରିଥିଲା । ଗତକାଲି କରୋନା କଟକଣା ଉଲ୍ଲଂଘନ ଅଭିଯୋଗରେ ରାୟଗଡ଼ାର ଏକ ସିନେମା ହଲ୍ ସିଲ୍ ହୋଇଥିଲା । ସେହିପରି ଉଦୟପ୍ଲାଜା ସିନେମା ହଲକୁ କେବଳ ଚେତାବନୀ ଦେଇ ଛାଡ଼ି ଦେଇଥିଲା ପ୍ରଶାସନ।

ସୂଚନା ଅନୁସାରେ ଗତକାଲି ୱକିଲ ସାବ୍ ନାମକ ଏକ ତେଲୁଗୁ ସିନେମା ରିଜିଲ୍ ହୋଇଥିଲା । ଯେଉଁଥିପାଇଁ ଗଜପତି ସମେତ ପଡୋଶୀ ଆନ୍ଧ୍ରରୁ ଶହ ଶହ ଲୋକ ସିନେମା ହଲରେ ଗହଳି ଲଗାଇଥିଲେ । କୋଭିଡ ନିମୟ ମାନୁନଥିବା ବେଳେ କେହି ମାସ୍କ ପିନ୍ଧିନଥିଲେ । ସରକାରଙ୍କ ଚେତାବନୀ ସତ୍ତ୍ୱେ ୫୦ ଭାଗ ନୁହେଁ ସିନେମା ହଲ ହାଉସଫୁଲ ହୋଇଯାଇଥିଲା। କେବଳ ଏତିକି ନୁହେଁ ବାହାରେ ମଧ୍ୟ ଶହ ଶହ ଲୋକଙ୍କ ଭିଡ଼ ଜମିଥିଲା । ଗତକାଲି ଏଥିପାଇଁ ଲାଠି ମାଡ଼ ହୋଇଥିଲା । ଏହାର ପରିଣାମ ସ୍ୱରୂପ ଆଜି ଦୁଇଟି ସିନେମା ହଲକୁ ସିଲ୍ କରିଛି ପ୍ରଶାସନ ଓ ପୁଲିସ୍ । ଦୁଇଟି ହଲକୁ ୧୦ ହଜାର ଟଙ୍କା ଲେଖାଏଁ ଜୋରିମାନା ହୋଇଛି। ଯାଞ୍ଚ ବେଳେ ଆବଶ୍ୟକ ଅନୁମତି ପତ୍ର ବା କାଗଜପତ୍ର ନଥିବା ଯୋଗୁଁ ଅନିର୍ଦ୍ଧିଷ୍ଟ କାଳ ପାଇଁ ସିନେମା ହଲ୍ କୁ ସିଲ୍ କରାଯାଇଥିବା କହିଛନ୍ତି ପାରଳାଖେମୁଣ୍ଡି ତହସିଲଦାର ।