ଭୁବନେଶ୍ୱର: ନିମାପଡ଼ାର ସାମ୍ବାଦିକ ଅକ୍ଷୟ ନାୟକଙ୍କୁ କମିଶନରେଟ ପୁଲିସ ପଚରା ଉଚରା କରିଛି । ନିମାପଡ଼ା ନିର୍ବାଚନ ମଣ୍ଡଳୀର ୧୧ନଂ ଜୋନର ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁ ଆତ୍ମହତ୍ୟା ଘଟଣାରେ ପୁଲିସର ପଚର ଉଚରା କରିଛି। ଆତ୍ମହତ୍ୟାର ଠିକ ୨ ଘଣ୍ଟା ପୂର୍ବରୁ ମୃତକ ସ୍ଥାନୀୟ ସାମ୍ବାଦିକଙ୍କ ସହ କଥା ହୋଇଥିବା ନେଇ ଅଡ଼ିଓ କଲ୍ ଭାଇରାଲ ହୋଇଥିଲା । ଯେଉଁଥିରେ ମୃତକ ଧର୍ମେନ୍ଦ୍ର ସାହୁ ଅନେକ କଥା କହିଥିବା ସାମ୍ବାଦିକ ଅକ୍ଷୟ ନାୟକ ଯୁକ୍ତି ବାଢିଛନ୍ତି ।

ଏହି ମାମଲାକୁ କମିଶନରେଟ ପୁଲିସ ତଦନ୍ତ କରୁଥିବାବେଳେ, ଆଜି ଡିସିପି ଅଫିସରେ ହାଜର ହେବାକୁ ଉକ୍ତ ସାମ୍ବାଦିକଙ୍କୁ ପୁଲିସ ନୋଟିସ କରିଥିଲା । ସେପଟେ ନିର୍ଦ୍ଧିଷ୍ଟ ସମୟରେ ପହଞ୍ଚିଥିଲେ ସାମ୍ବାଦିକ ଅକ୍ଷୟ ନାୟକ । କମିଶନରେଟ ପୁଲିସର ଏକ ଟିମ୍ ୪ଘଣ୍ଟା ଧରି ଜେରା କରିଥିଲେ । ପରେ ସାମ୍ବାଦିକ ଅକ୍ଷୟ ନାୟକଙ୍କୁ କମିଶନରେଟ ପୁଲିସ ଛାଡିଛି । କଲ ରେକର୍ଡ ସମ୍ପର୍କରେ ପଚରାଉଚରା କରାଯିବା ସହିତ ତାଙ୍କ ମୋବାଇଲକୁ ଜବତ କରାଯାଇଛି । କଲ ରେକର୍ଡ, ଧର୍ମେନ୍ଦ୍ରଙ୍କ ସହ ତାଙ୍କର ସମ୍ପର୍କ ନେଇ ପଚରାଉଚରା କରିଛି ପୋଲିସ । ଏହା ସହ ସୋସିଆଲ ମିଡିଆରେ କଣ ପାଇଁ ଅଡିଓକୁ ଭାଇରାଲ କରିଛନ୍ତି, ସେ ସମ୍ପର୍କରେ ମଧ୍ୟ ତଦନ୍ତ ହୋଇଛି ।

ପୋଲିସକୁ ସମ୍ପୂର୍ଣ୍ଣ ସହଯୋଗ କରୁଥିବା କହିଛନ୍ତି ଅକ୍ଷୟ । ଆବଶ୍ୟକ ପଡ଼ିଲେ ପୁଣି ଅକ୍ଷୟଙ୍କୁ ଜେରା କରାଯିବ ବୋଲି ପୁଲିସ କହିଛି। ମୃତ୍ୟୁ ପୂର୍ବରୁ ଧର୍ମେନ୍ଦ୍ର ଅକ୍ଷୟ ନାୟକଙ୍କ ସହ କଥା ହୋଇଥିବା ଅଡିଓ ଭାଇରାଲ ହୋଇଥିଲା । ଯାହାକୁ ନେଇ ବିରୋଧି ଦଳ ମଧ୍ୟ ଆନ୍ଦୋଳନ ଏବଂ ପ୍ରତିବାଦ କରି ଆସୁଛି ।