ଆଜି ପ୍ରକାଶ ପାଇବ ମାଟ୍ରିକ ପରୀକ୍ଷା ଫଳ, ସନ୍ଧ୍ୟା ୬ଟାରୁ ବୋର୍ଡ ୱେବସାଇଟରେ ଉପଲବ୍ଧ ହେବ ରେଜଲ୍ଟ

ଭୁବନେଶ୍ୱର: ଆଜି ପ୍ରକାଶ ପାଇବ ମାଟ୍ରିକ ପରୀକ୍ଷା ଫଳ । ଅପରାହ୍ନ ୪ଟା ଉନ୍ମୋଚିତ ହେବ ପରୀକ୍ଷା ଫଳ ପୁସ୍ତିକା । ସନ୍ଧ୍ୟା ୬ଟା ପରେ ୱେବସାଇଟରେ ଉପଲବ୍ଧ ହେବ ରେଜଲ୍ଟ । ବୋର୍ଡ ୱେବସାଇଟ www.bseodisha.ac.in ଓ http://bseodisha.nic.inରେ  ରେଜଲ୍ଟ ଦେଖିପାରିବେ ଛାତ୍ରଛାତ୍ରୀ । ଏହାସହ SMS ମାଧ୍ୟମରେ ମଧ୍ୟ ନିଜର ରେଜଲ୍ଟ ଜାଣିପାରିବେ ପରୀକ୍ଷାର୍ଥୀ । ଏଥିପାଇଁ ମୋବାଇଲରେ OR 10ଲେଖି ନିଜର ରୋଲ ନମ୍ବର ଲେଖି 5676750 କୁ SMS ପଠାଇଲେ ପାଇପାରିବେ ରେଜଲ୍ଟ ।

ଏଥର ମାଟ୍ରିକ ପରୀକ୍ଷା ଫେବ୍ରୁୟାରୀ ୧୯ରୁ ମାର୍ଚ୍ଚ ୨ ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା । ୩୦୮୨ ପରୀକ୍ଷା କେନ୍ଦ୍ରରେ ୫ ଲକ୍ଷ ୬୦ ହଜାର ଛାତ୍ରଛାତ୍ରୀ ପରୀକ୍ଷା ଦେଇଥିଲେ। ପରେ ମାର୍ଚ୍ଚ ୧୯ ତାରିଖରୁ ୫୧ ଟି କେନ୍ଦ୍ରରେ ଖାତା ମୂଲ୍ୟାୟନ ହୋଇଥିଲା। ସବୁ ପ୍ରକ୍ରିୟା ଭଲରେ ଓ ସଠିକ ସମୟରେ ସରିଥିବାରୁ ଠିକ ଦୁଇ ମାସ ମଧ୍ୟରେ ଫଳ ପ୍ରକାଶ ପାଉଛି। ଏଥର ଫଳ ତୃଟିଶୂନ୍ୟ ହେବ ବୋଲି ବୋର୍ଡ ସଭାପତି ଆଶା ରଖିଛନ୍ତି । ସେ ଆହୁରି ମଧ୍ୟ କହିଛନ୍ତି ଏଥର ପ୍ରଥମଥର ଲାଗି ଇଂରାଜି ଓ ଓଡିଆ ଭାଷାରେ ଗୋଟିଏ ସିଟରେ ମାଟ୍ରିକ ସାର୍ଟିଫିକେଟ ଦିଆଯିବ । 

ଛାତ୍ରଛାତ୍ରୀଙ୍କ ମନରେ ଉତ୍କଣ୍ଠା ଓ ଭୟ

ପରୀକ୍ଷା ଫଳ ପ୍ରକାଶ ପାଇବାକୁ ନେଇ ପ୍ରାୟ ୫ ଲକ୍ଷ ୬୦ ହଜାର ପରୀକ୍ଷାର୍ଥୀଙ୍କ ମନରେ ଉତ୍କଣ୍ଠା ଲାଗି ରହିଛି। ପରୀକ୍ଷା ଫଳ କିପରି ହେବ, ନିଜର ଆଶା ମୁତାବକ ନମ୍ବର ଆସିବ କି ନାହିଁ, ତାହାକୁ ନେଇ ବିଦ୍ୟାର୍ଥୀମାନଙ୍କ ମନରେ ଉଭୟ ଉତ୍ସାହ ଏବଂ ଭୟ ଦେଖିବାକୁ ମିଳିଛି। ବର୍ଷକର କଠିନ ପରିଶ୍ରମର ଫଳ କ'ଣ ହେବ ସେନେଇ ସମସ୍ତେ ଉତ୍ସୁକତାର ସହ ଅପେକ୍ଷା କରିଛନ୍ତି।