ସର୍ବନିମ୍ନ ଇପିଏଫ୍‌ ପେନ୍‌ସନ୍‌ ହେବ ୨୫୦୦ ଟଙ୍କା ! ୧୧ ବର୍ଷ ହେବ ହଜାରେ ଟଙ୍କାରେ ଅଟକିଛି ସର୍ବନିମ୍ନ ପେନ୍‌ସନ୍‌....

ନୂଆଦିଲ୍ଲୀ: କର୍ମଚାରୀ ପେନସନ ଯୋଜନା ଅଧୀନରେ କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫ୍‌ଓ)ର ମାସିକ ସର୍ବନିମ୍ନ ପେନ୍‌ସନ୍‌ ୧୦୦୦ ଟଙ୍କାରୁ ୨୫୦୦ ଟଙ୍କାକୁ ବୃଦ୍ଧି କରାଯାଇପାରେ। ବେଙ୍ଗାଲୁରୁଠାରେ ଅକ୍ଟୋବର ୧୦-୧୧ରେ ହେବାକୁ ଥିବା ଇପିଏଫ୍‌ଓର କେନ୍ଦ୍ରୀୟ ଟ୍ରଷ୍ଟି ବୋର୍ଡ (ସିବିଟି) ବୈଠକରେ ଏ ସମ୍ପର୍କରେ ନିଷ୍ପତ୍ତି ନିଆଯାଇପାରେ। ଯଦି ପେନସନ ବୃଦ୍ଧି ପ୍ରସ୍ତାବ ଗୃହୀତ ହୁଏ, ତେବେ ଏହା ଦୀର୍ଘ ୧୧ ବର୍ଷ ମଧ୍ୟରେ ପେନ୍‌ସନ୍‌ରେ ପ୍ରଥମ ବୃଦ୍ଧି ହେବ। ଶେଷ ଥର ପାଇଁ ଇପିଏଫ୍‌ଓ  ସଦସ୍ୟଙ୍କ ମାସିକ ସର୍ବନିମ୍ନ ପେନସନ ୧୦୦୦ ଟଙ୍କା ୨୦୧୪ରେ  ସ୍ଥିର କରାଯାଇଥିଲା। ସେବେଠାରୁ କର୍ମଚାରୀଙ୍କ ସର୍ବନିମ୍ନ ପେନ୍‌ସନ୍‌ ବୃଦ୍ଧି ହୋଇନାହିଁ। ଏକ ରିପୋର୍ଟ ଅନୁଯାୟୀ, ୩୦ ଲକ୍ଷରୁ ଅଧିକ ପେନସନଭୋଗୀ ସର୍ବନିମ୍ନ ପେନସନ ପାଉଛନ୍ତି। ଯେଉଁମାନେ ଅତି କମରେ ୧୦ ବର୍ଷ ନିରନ୍ତର ସେବା ପୂରଣ କରନ୍ତି ଏବଂ ୫୮ ବର୍ଷ ବୟସରେ ପହଞ୍ଚିଥାନ୍ତି, ସେମାନେ ଇପିଏସ୍‌ ଅଧୀନରେ ନିୟମିତ ପେନସନ ପାଇବାକୁ ଯୋଗ୍ୟ। ଯଦି ଜଣେ ସଦସ୍ୟ ଚାକିରି ମଝିରେ ଛାଡିଦିଅନ୍ତି, ତେବେ ସେମାନେ ସେମାନଙ୍କର ସଂଗୃହୀତ ପେନସନ ଉଠାଇପାରିବେ କିମ୍ବା କମ୍ ପେନସନ ରାଶି ବାଛିପାରିବେ। ସିବିଟି ବୈଠକରେ ଇପିଏଫ୍‌ଓ ୩.୦ ଉପରେ ମଧ୍ୟ ଆଲୋଚନା ହେବ। ସର୍ବନିମ୍ନ ପେନସନ ସଂଶୋଧନ ବ୍ୟତୀତ, ସିବିଟି ବୈଠକରେ ଇପିଏଫ୍‌ଓ ୩.୦ ଭଳି ଡିଜିଟାଲ୍ ସଂସ୍କାର ଉପରେ ମଧ୍ୟ ଆଲୋଚନା କରାଯିବ। ଏହାର ପ୍ରମୁଖ ବୈଶିଷ୍ଟ୍ୟଗୁଡ଼ିକ ମଧ୍ୟରେ ଏଟିଏମ୍‌ରୁ ସିଧାସଳଖ ପିଏଫ୍‌ ଉଠାଣ ଏବଂ ୟୁପିଆଇ ମାଧ୍ୟମରେ ତୁରନ୍ତ ଉଠାଣ ଏବଂ ଦ୍ରୁତ ଦାବି ସମାଧାନ ଅନ୍ତର୍ଭୁକ୍ତ।