ହସ୍ପିଟାଲରେ କିଡ୍‌ନୀ ରାକେଟ: ୬ ଲକ୍ଷରେ କିଣି ୮୦ ଲକ୍ଷରେ ବିକ୍ରି, ୫ ଡାକ୍ତର ଗିରଫ

କାନପୁର: ଉତ୍ତର ପ୍ରଦେଶ କାନପୁରରୁ ବିଚଳିତ କରିବା ଭଳି ମାମଲା ସାମ୍‌ନାକୁ ଆସିଛି। ଆଇନକୁ କଡ଼ାକଡ଼ି ଭାବେ କାର୍ଯ୍ୟକାରୀ ଦାବି କରୁଥିବା ରାଜ୍ୟରେ ଦିନଦ୍ଵିପହରେ କିଡ୍‌ନୀ ପ୍ରତିରୋପଣ ରାକେଟ ଚାଲିଛି। ଆଇନ ଥାଇ ମଧ୍ୟ ତାହା ମୂଲ୍ୟହୀନ ପାଲଟିଛି। ଭଗବାନଙ୍କ ଦ୍ଵିତୀୟ ରୂପ କୁହାଯାଉଥିବା ଡାକ୍ତର ଅଧିକରୁ ଅଧିକ ଟଙ୍କା ଉପାର୍ଜନ ଲୋଭ ପାଇଁ ବେଆଇନ କାର୍ଯ୍ୟକଳାପରେ ଲିପ୍ତ ରହୁଛନ୍ତି। ଡାକ୍ତରଖାନାରେ ରୋଗୀ ସେବା ନାମରେ ବେଆଇନ ଅଙ୍ଗ ପ୍ରତିରୋପଣ ରାକେଟ ଚଳାଉଛନ୍ତି। ଏହି ରାକେଟ ଚଳାଇବାକୁ ନେଇ ଡାକ୍ତର ଦମ୍ପତିଙ୍କ ସମେତ ୬ ଜଣଙ୍କୁ ପୁଲିସ ଗିରଫ କରିଛି। ଏମାନଙ୍କ ମଧ୍ୟରେ ଅନ୍ୟ ତିନି ଡାକ୍ତର ଏବଂ ଜଣେ ଦଲାଲ ସାମିଲ ରହିଛି। 

ବିହାରର ଜଣେ ୨୩ ବର୍ଷୀୟ ଏମ୍‌ବିଏ ଛାତ୍ରଙ୍କଠାରୁ ୬ଲକ୍ଷ ଟଙ୍କା ଦେଇ କିଡ୍‌ନୀ କ୍ରୟ କରାଯାଇଛି। ଏହି କିଡ୍‌ନୀକୁ ଜଣେ ୩୦ ବର୍ଷୀୟ ମହିଳାଙ୍କୁ ୮୦ ଲକ୍ଷ ଟଙ୍କାରେ ବିକ୍ରି କରିଦିଆଯାଇଛି। କିଡନୀ ଦାନ କରିଥିବା ଛାତ୍ର ପୁଲିସ ଫୋନ କରି ଅଭିଯୋଗ କରିବା ପରେ ସୋମବାର ରାତିରେ ସହରର ମେଡ୍ ଲାଇଫ୍ ହସ୍ପିଟାଲ୍, ଆହୁଜା ହସ୍ପିଟାଲ୍ ଏବଂ ପ୍ରିୟା ହସ୍ପିଟାଲରେ ଏକସଙ୍ଗେ ଚଢ଼ାଉ କରାଯାଇଥିଲା।ମେଡ୍ ଲାଇଫ୍ ହସ୍ପିଟାଲରେ କିଡନୀ ଦେଇଥିବା ଏମବିଏ ଛାତ୍ର ଏବଂ ରୋଗୀ ଭର୍ତ୍ତି ଥିବା ମିଳିଥିଲା। ପ୍ରତିରୋପଣ ସମ୍ପର୍କିତ ଦଲିଲ ମଗାଯିବାରୁ ହସ୍ପିଟାଲ କୌଣସି ବୈଧ କାଗଜପତ୍ର ଦେଖାଇ ପାରିନଥିଲା।ଏହି ମାମଲାରେ ଆଜି ଆହୁଜା ହସ୍ପିଟାଲର ମାଲିକାଣୀ ଡାକ୍ତର ପ୍ରୀତି ଆହୁଜା, ତାଙ୍କ ସ୍ୱାମୀ ଡାକ୍ତର ସୁରଜିତ, ଡାକ୍ତର ରାଜେଶ କୁମାର, ଡାକ୍ତର ରାମ ପ୍ରକାଶ, ଡାକ୍ତର ନରେନ୍ଦ୍ର ସିଂହ ଏବଂ ଦଲାଲ ଶିବମ ଅଗ୍ରୱାଲଙ୍କୁ ଗିରଫ କରି ଜେଲ୍‌ ପଠାଯାଇଛି।

ପୁଲିସ କମିଶନର ରଘୁବୀର ଲାଲ କହିଛନ୍ତି ଯେ ଏହି ରାକେଟ୍ ସହ ଜଡ଼ିତ ଅନ୍ୟ ୪ ଜଣ ଡାକ୍ତରଙ୍କୁ ଗିରଫ କରିବା ପାଇଁ ଚଢ଼ାଉ ଜାରି ରହିଛି। ପ୍ରାଥମିକ ତଦନ୍ତ ଅନୁଯାୟୀ, ସହରର ଅନେକ ଘରୋଇ ହସ୍ପିଟାଲରେ ଏପର୍ଯ୍ୟନ୍ତ ପ୍ରାୟ ୪୦ ରୁ ୫୦ଟି କିଡନୀ ପ୍ରିତରୋପଣ କରାଯାଇଥିବା ଆଶଙ୍କା କରାଯାଉଛି। ଏହି ନେଟୱର୍କ ଲକ୍ଷ୍ନୌ ବ୍ୟତୀତ ଦିଲ୍ଲୀ, ମୁମ୍ବାଇ, କୋଲକାତା, ନେପାଳ ଏବଂ ଦକ୍ଷିଣ ଆଫ୍ରିକା ପର୍ଯ୍ୟନ୍ତ ବ୍ୟାପିଛି। 

ପୁଲିସ ଅନୁଯାୟୀ, କଲ୍ୟାଣପୁରର ଆହୁଜା ହସ୍ପିଟାଲରେ କିଡନୀ ଟ୍ରାନ୍ସପ୍ଲାଣ୍ଟର କାରବାର ଚାଲିଥିଲା। ପଚରାଉଚରା ବେଳେ କିଡନୀ ଦେଇଥିବା ଆୟୁଷ କହିଥିଲେ ଯେ ସେ ବିହାରର ସମସ୍ତିପୁରର ବାସିନ୍ଦା। ଉତ୍ତରାଖଣ୍ଡର ଡେରାଡୁନର ଏକ କଲେଜରେ ସେ ଏମବିଏ ପଢୁଛନ୍ତି। ଶିବମ ଅଗ୍ରୱାଲ ଓରଫ ଶିବମ କାଡା ଏହି ନେଟୱର୍କର ମାଷ୍ଟରମାଇଣ୍ଡ। ଶିବମ ତାଙ୍କୁ ଏକ ଟେଲିଗ୍ରାମ ଗ୍ରୁପ୍ ଜରିଆରେ ଜାଲରେ ଫସାଇ କାନପୁରକୁ ଡକାଇଥିଲା। କଲ୍ୟାଣପୁରର ଆବାସ ବିକାଶ-୩ ରେ ଥିବା ଏକ ଆପାର୍ଟମେଣ୍ଟରେ ଶିବମ ଅଗ୍ରୱାଲଙ୍କ ସହ ୬ ଲକ୍ଷ ଟଙ୍କାରେ କିଡନୀ ବିକିବାକୁ ଚୂଡ଼ାନ୍ତ ହୋଇଥିଲା। ରବିବାର ଆହୁଜା ହସ୍ପିଟାଲରେ ମୁଜାଫରନଗରର ପାରୁଲ ତୋମାରଙ୍କ କିଡନୀ ପ୍ରତିରୋପଣ କରାଯାଇଥିଲା। ପାରୁଲଙ୍କ ସ୍ୱାମୀଙ୍କର ମେରଠରେ ଏକ ସ୍କୁଲ ଅଛି। ପାରୁଲଙ୍କ ପରିବାର ଶିବମକୁ ୭ ଲକ୍ଷ ଟଙ୍କା ଦେଇଥିଲେ ଏବଂ ବାକି ଟଙ୍କା ପରେ ଦେବାକୁ କହିଥିଲେ। ଶିବମ ଆୟୁଷଙ୍କ ଆକାଉଣ୍ଟରେ ୩.୫୦ ଲକ୍ଷ ଟଙ୍କା ଜମା କରିଥିଲା। ସେଥିମଧ୍ୟରୁ ୨.୭୫ ଲକ୍ଷ ଆହୁଜା ହସ୍ପିଟାଲକୁ, ୨୫ ହଜାର ମେଡ୍ ଲାଇଫ୍ ହସ୍ପିଟାଲକୁ ଚିକିତ୍ସା ପାଇଁ ଦିଆଯାଇଥିଲା ଏବଂ ୫୦ ହଜାର ଟଙ୍କା ସେ ନିଜ ପାଖରେ ରଖିଥିଲା। ଆୟୁଷ ଶିବମଠାରୁ ବାକି ଅଢ଼େଇ ଲକ୍ଷ ଟଙ୍କା ମାଗିବାରୁ ବିବାଦ ଆରମ୍ଭ ହୋଇଥିଲା। ସୋମବାର ଦିନ ଆୟୁଷ ଫୋନ୍ ଯୋଗେ ପୁଲିସକୁ ଏହି ବିଷୟରେ ସୂଚନା ଦେଇଥିଲେ।