ନର୍ଦ୍ଧମା ଢାଙ୍କୁଣୀ ଚୋରି କଲେ ୫୦ ଲକ୍ଷ ଜରିମାନା! ପାକିସ୍ତାନ ସରକାର ଆଣିଲେ କଡ଼ା ଆଇନ

ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଏଠାରେ ନର୍ଦ୍ଧମା ଢାଙ୍କୁଣୀ ଚୋରି ଏତେ ମାତ୍ରାରେ ବଢ଼ିଯାଇଛି ଯେ ସରକାରଙ୍କୁ ଏଥିପାଇଁ ଏକ କଠୋର ଆଇନ ଆଣିବାକୁ ପଡ଼ିଛି। ପାକିସ୍ତାନର ପଞ୍ଜାବ ପ୍ରଦେଶ ମୁଖ୍ୟମନ୍ତ୍ରୀ ମରିୟମ ନୱାଜ ନର୍ଦ୍ଧମା ଢାଙ୍କୁଣୀ ଚୋରି ରୋକିବା ପାଇଁ ଏହି ନୂତନ ଏବଂ କଠୋର ନିୟମ ଘୋଷଣା କରିଛନ୍ତି।

୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା

ପାକିସ୍ତାନର ନୂତନ ଆଇନ ଅନୁଯାୟୀ, ନର୍ଦ୍ଧମା କିମ୍ବା ମ୍ୟାନହୋଲ୍ ଢାଙ୍କୁଣୀ ଚୋରି କରିବା, ବିକିବା କିମ୍ବା କିଣିବାକୁ ଏକ ଗମ୍ଭୀର ଅପରାଧ ଭାବେ ବିବେଚନା କରାଯିବ। ଦୋଷୀ ସାବ୍ୟସ୍ତ ହେଲେ ଅଭିଯୁକ୍ତଙ୍କୁ ୧ରୁ ୧୦ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ଭୋଗିବାକୁ ପଡ଼ିବ। ଏହା ସହିତ ଦୋଷୀଙ୍କ ଉପରେ ୩୦ ଲକ୍ଷରୁ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଭାରୀ ଜରିମାନା ଲଗାଯିବାର ବ୍ୟବସ୍ଥା ମଧ୍ୟ କରାଯାଇଛି। ଚୋରଙ୍କ ସହ କବାଡ଼ି ବାଲାଙ୍କ ଉପରେ ମଧ୍ୟ ଏହି ଆଇନ ଲାଗୁ ହେବ।

ପରିବାର ସାଜି ଆସୁଛନ୍ତି ଚୋର

ମୁଖ୍ୟମନ୍ତ୍ରୀ ମରିୟମ ନୱାଜ ଏହି ଚୋରି ପଛରେ ଥିବା ଏକ ଅଦ୍ଭୁତ ତଥ୍ୟ ଉଜାଗର କରିଛନ୍ତି। ସେ କହିଛନ୍ତି ଯେ, ଚୋରମାନେ ରାତି ୧୧ଟାରୁ ୧୨ଟା ମଧ୍ୟରେ ସକ୍ରିୟ ହୁଅନ୍ତି। ସେମାନେ ଗଧ ଗାଡ଼ିରେ ଏକ 'ପରିବାର' ଭଳି ଆସନ୍ତି, ଯେଉଁଥିରେ ମହିଳାମାନେ ମଧ୍ୟ ସାମିଲ ଥାଆନ୍ତି, ଯାହାଫଳରେ କାହାର ସନ୍ଦେହ ନ ହୁଏ। ଏହି ଗ୍ୟାଙ୍ଗ୍ ଖୁବ୍ ସଫେଇର ସହ ଢାଙ୍କୁଣୀ ଚୋରି କରି ଗାଡ଼ିରେ ଲଦି ଫେରାର ହୋଇଯାଆନ୍ତି।

ଦୁର୍ଘଟଣା ପାଇଁ ଦୋଷୀଙ୍କୁ କଡ଼ା ଦଣ୍ଡ

ପଞ୍ଜାବର ବିଭିନ୍ନ ସହରରେ ଖୋଲା ମ୍ୟାନହୋଲ୍ ଯୋଗୁଁ ଅନେକ ସମୟରେ ଛୋଟ ପିଲା ଏବଂ ପଥଚାରୀ ଦୁର୍ଘଟଣାର ଶିକାର ହୋଇ ପ୍ରାଣ ହରାଉଛନ୍ତି। ଯଦି ଖୋଲା ମ୍ୟାନହୋଲରେ ପଡ଼ି କୌଣସି ନାଗରିକଙ୍କ ମୃତ୍ୟୁ ଘଟେ, ତେବେ ଦାୟୀ ବ୍ୟକ୍ତିଙ୍କୁ ସିଧାସଳଖ ୧୦ ବର୍ଷ ଜେଲ୍ ଦଣ୍ଡ ମିଳିବ ବୋଲି ସରକାର ସ୍ପଷ୍ଟ କରିଛନ୍ତି। ଏହି ନିୟମ ଦ୍ୱାରା କେବଳ ଚୋର ନୁହେଁ, ବରଂ ଦାୟିତ୍ୱହୀନ ସରକାରୀ ଅଧିକାରୀଙ୍କ ଉପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।