ମୁମ୍ବଇ : ୨୦୧୩ର ଏକ ମାମଲାରେ ଗ୍ୟାଙ୍ଗଷ୍ଟାର ଛୋଟା ରାଜନକୁ ୧୦ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି ମୁମ୍ବଇର ଏକ ସ୍ବତନ୍ତ୍ର ସିବିଆଇ କୋର୍ଟ। ରାଜନ ସେ ସମୟରେ ବୁକିରୁ ବିଲ୍ଡର ସାଜିଥିବା ଅଜୟ ଗୋସାଲିୟାଙ୍କୁ ହତ୍ୟା ଉଦ୍ୟମ କରିଥିଲା। କୋର୍ଟ ମଙ୍ଗଳବାର ଏହି ମାମଲାରେ ଛୋଟା ରାଜନ ଏବଂ ତାହାର ଅନ୍ୟ ସହଯୋଗୀଙ୍କୁ ଦୋଷୀ ସାବ୍ୟସ୍ତ କରି ସମାନ ଦଣ୍ଡ ଦେଇଛନ୍ତି। ଏହା ସହିତ ରାଜନ ଉପରେ ୫ ଲକ୍ଷ ଟଙ୍କାର ଜରିମାନା ଲଗାଇଛନ୍ତି। ଗୋସାଲିଆଙ୍କୁ ହତ୍ୟା କରିବା ଲାଗି ରାଜନ ତାହାର ସହଯୋଗୀ ସତୀଶ କାଳିଆକୁ ନିର୍ଦ୍ଦେଶ ଦେଇଥିଲା।

୨୦୧୩ ଅଗଷ୍ଟ ୨୮ରେ ୩ ଜଣ ଲୋକ ମାଲଦାର ଇନଫିନିଟି ମଲ ବାହାରେ ଗୋଶାଳିଆଙ୍କୁ ଗୁଳି କରିଥିଲେ। ଏହି ଆକ୍ରମଣରେ ସେ ଗୁରୁତର ଆହତ ହୋଇଥିଲେ। ତେବେ ତଦନ୍ତ ବେଳେ ଏହି ଘଟଣାରେ ଛୋଟା ରାଜନର ହାତ ଥିବା ଜାଣିବାକୁ ପାଇଥିଲା ସିବିଆଇ । ଏହି ମାମଲାରେ, ୨୮ ଅଗଷ୍ଟ ୨୦୧୩ରେ ବଙ୍ଗୁର ନଗର ପୁଲିସ ଷ୍ଟେସନରେ ଆଇପିସି ଧାରା ୩୦୭, ୧୨ ବି, ଧାରା ୩ ଏବଂ ଧାରା ୨୫ ଅନୁଯାୟୀ ଅଭିଯୁକ୍ତମାନଙ୍କ ବିରୋଧରେ ଏଫଆଇଆର୍‌ ରୁଜୁ ହୋଇଥିଲା । କିଛି ଦିନ ପରେ ଏହି ମାମଲାରେ ମହାରାଷ୍ଟ୍ର କଣ୍ଟ୍ରୋଲ୍ ଅଫ୍ ଅର୍ଗାନାଇଜଡ୍ ଆକ୍ଟ (MCOCA) ଲାଗୁ କରାଯାଇଥିଲା । ପରେ ସ୍ୱତନ୍ତ୍ର ୟୁନିଟ୍ ନଭେମ୍ବର ୨୦୧୩ ରେ ୭ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା ।

ଏହି ମାମଲାରେ ୩ ଅଭିଯୁକ୍ତ ପ୍ରକାଶ ନିକମ, ସତୀଶ କାଲିୟା ଏବଂ ଛୋଟା ରାଜନ୍‌ ଓ୍ବାଣ୍ଟେଡ୍‌ ଥିଲେ । ପରେ ଜଣେ ସାମ୍ବାଦିକଙ୍କୁ ହତ୍ୟା ମାମଲାରେ ନିକମ ଏବଂ କାଲିୟାକୁ ଗିରଫ କରିବାକୁ ସକ୍ଷମ ହୋଇଥିଲା ପୋଲିସ । ମୁଖ୍ୟ ଅଭିଯୁକ୍ତ ଛୋଟା ରାଜନ୍‌କୁ ବାଲୀରୁ ଗିରଫ କରାଯିବା ପରେ ଭାରତ ଅଣାଯାଇଥିଲା ଏବଂ ସିବିଆଇକୁ ହସ୍ତାନ୍ତର କରାଯାଇଥିଲା । ୨୦୧୬ ମସିହା ଏପ୍ରିଲ ୨୧ ତାରିଖରେ ଛୋଟା ରାଜନ୍‌କୁ ହେପାଜତକୁ ନେଇଥିଲା ସିବିଆଇ । ପୂର୍ବରୁ ସାମ୍ବାଦିକ ଜେ. ଡେ. ହତ୍ୟାକାଣ୍ଡ ମାମଲାରେ ଛୋଟା ରାଜନକୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି କୋର୍ଟ ।