ସ୍କିନକେୟାର ପ୍ରଡକ୍ଟ ସହ୍ୟ କରିପାରୁନି ଏକ ତୃତୀୟାଂଶ ଭାରତୀୟଙ୍କ ତ୍ୱଚା: ଡର୍ମାଟୋଲୋଜିଷ୍ଟ ଦେଲେ ସତର୍କ ସୂଚନା

ଗୋଟିଏ ସମୟ ଥିଲା, ଯେତେବେଳେ କୌଣସି କ୍ରିମ୍ ଲଗାଇବା ପରେ ସାମାନ୍ୟ ଜ୍ୱଳନ ବା କୁଣ୍ଡାଇ ହେବା ଭଳି ସମସ୍ୟାକୁ ଲୋକେ ଅଣଦେଖା କରୁଥିଲେ। କିନ୍ତୁ ଆଜିକାଲି ସେରମ୍ ଲଗାଇବା ପରେ ତ୍ୱଚା ପୋଡ଼ିବା, କ୍ଲିଞ୍ଜିଂ ପରେ ଲାଲ୍ ପଡ଼ିଯିବା ଏବଂ ସନସ୍କ୍ରିନ୍ ଲଗାଇବା ପରେ କୁଣ୍ଡାଇ ହେବା ଭଳି ସମସ୍ୟା ଚର୍ମରୋଗ ବିଶେଷଜ୍ଞଙ୍କ କ୍ଲିନିକ୍‌ରେ ସାଧାରଣ ହୋଇଗଲାଣି। ହିନ୍ଦୁସ୍ତାନ ଟାଇମ୍ସର ଏକ ରିପୋର୍ଟ ଅନୁଯାୟୀ, ଭାରତରେ ଏବେ ସମ୍ବେଦନଶୀଳ ତ୍ୱଚା ବା ସେନ୍‌ସିଟିଭ୍ ସ୍କିନ୍ ଏକ ବଡ଼ ସମସ୍ୟା ଭାବେ ଉଭା ହୋଇଛି। ପ୍ରସିଦ୍ଧ ଡର୍ମାଟୋଲୋଜିଷ୍ଟ ଡା. ରିଙ୍କି କପୁର ପ୍ରକାଶ କରିଛନ୍ତି ଯେ, ଏକ ତୃତୀୟାଂଶ ଭାରତୀୟଙ୍କ ତ୍ୱଚା ନିୟମିତ ସ୍କିନକେୟାର ପ୍ରଡକ୍ଟକୁ ସହ୍ୟ କରିବାରେ ଅକ୍ଷମ।

ଦେଶବ୍ୟାପୀ ସର୍ବେକ୍ଷଣରୁ ମିଳିଛି ଚାଞ୍ଚଲ୍ୟକର ତଥ୍ୟ

ସେନ୍‌ସିଟିଭ୍ ସ୍କିନ୍ ଏବେ କେବଳ ଏକ ସାଧାରଣ ସମସ୍ୟା ହୋଇ ରହିନାହିଁ। ଭାରତରେ କରାଯାଇଥିବା ଏକ ଜାତୀୟ ସ୍ତରୀୟ ଅଧ୍ୟୟନରୁ ଜଣାପଡ଼ିଛି ଯେ, ଦେଶର ପ୍ରାୟ ୩୨.୪ ପ୍ରତିଶତ ଲୋକଙ୍କ ତ୍ୱଚା ଅତ୍ୟନ୍ତ ସମ୍ବେଦନଶୀଳ। ଏହି ତାଲିକାରେ ୩୬.୭ ପ୍ରତିଶତ ମହିଳା ଥିବା ବେଳେ ୨୭.୯ ପ୍ରତିଶତ ପୁରୁଷ ମଧ୍ୟ ସାମିଲ ଅଛନ୍ତି। ଯଦିଓ ଏହା ଲୋକଙ୍କ ନିଜସ୍ୱ ଅଭିଜ୍ଞତା ଉପରେ ଆଧାରିତ ଏବଂ ଏହାକୁ ଏକ କ୍ଲିନିକାଲ୍ ନିଦାନ ଭାବେ ଗ୍ରହଣ କରାଯାଇପାରିବ ନାହିଁ, ତଥାପି ଏହି ଆକଳନ ସମସ୍ୟାର ଗମ୍ଭୀରତାକୁ ସ୍ପଷ୍ଟ କରୁଛି।

ସ୍କିନକେୟାର ପ୍ରଡକ୍ଟର ପାର୍ଶ୍ୱପ୍ରତିକ୍ରିୟା

ବର୍ତ୍ତମାନ ବଜାରରେ ବିଭିନ୍ନ ପ୍ରକାରର ସ୍କିନକେୟାର ପ୍ରଡକ୍ଟ ଉପଲବ୍ଧ। ତେବେ ପୂର୍ବରୁ ବ୍ୟବହାର କରୁଥିବା ପରିଚିତ ପ୍ରଡକ୍ଟ ପ୍ରତି ମଧ୍ୟ ତ୍ୱଚା ହଠାତ୍ ଅସହନଶୀଳ ହୋଇପଡ଼ୁଥିବା ଦେଖିବାକୁ ମିଳୁଛି। ବିଶେଷ କରି ପରିବେଶ ପ୍ରଦୂଷଣ ଏବଂ ଭୁଲ୍ ସ୍କିନକେୟାର ଅଭ୍ୟାସ କାରଣରୁ ଲୋକଙ୍କ ମୁହଁରେ ହଠାତ୍ ବ୍ରଣ (pimples) ବାହାରିବା, ରାସେସ୍ ହେବା ଏବଂ ତ୍ୱଚା ଲାଲ୍ ପଡ଼ିଯିବା ଭଳି ସମସ୍ୟା ଦେଖାଯାଉଛି।

ପରିବର୍ତ୍ତିତ ପରିବେଶ ଓ ଜୀବନଶୈଳୀ କାରଣରୁ ଭାରତୀୟଙ୍କ ତ୍ୱଚାର ପ୍ରାକୃତିକ ସୁରକ୍ଷା କବଚ ଦୁର୍ବଳ ହେବାରେ ଲାଗିଛି। ତେଣୁ ବିନା ଡାକ୍ତରୀ ପରାମର୍ଶରେ ବିଭିନ୍ନ ରାସାୟନିକ ସ୍କିନକେୟାର ପ୍ରଡକ୍ଟ ବ୍ୟବହାର କରିବା ପରିବର୍ତ୍ତେ, ନିଜ ତ୍ୱଚାର ପ୍ରକାରକୁ ବୁଝି ବିଶେଷଜ୍ଞଙ୍କ ସାହାଯ୍ୟ ନେବା ଅତ୍ୟନ୍ତ ଜରୁରୀ ବୋଲି ଡା. ରିଙ୍କି କପୁରଙ୍କ ସୂତ୍ରରୁ ସ୍ପଷ୍ଟ ହୋଇଛି।