ଦୀର୍ଘ ୩୪ ବର୍ଷ ପରେ ଆସିଲା କୋର୍ଟଙ୍କ ରାୟ: ୮୫ ବର୍ଷୀୟ ବୃଦ୍ଧ ହେଲେ ଦୋଷୀ ସାବ୍ୟସ୍ତ, ଯିବେ ଜେଲ

ନୂଆଦିଲ୍ଲୀ: ବିହାରର ବୈଶାଳୀ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଏଠାରେ ଏକ ୩୪ ବର୍ଷ ପୁରୁଣା ଆକ୍ରମଣ ମାମଲାରେ ଅତିରିକ୍ତ ଜିଲ୍ଲା କୋର୍ଟ ଜଣେ ୮୫ ବର୍ଷୀୟ ବୃଦ୍ଧଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଯୌବନ ଅବସ୍ଥାରେ କରିଥିବା ଅପରାଧ ପାଇଁ ବୃଦ୍ଧାବସ୍ଥାରେ ଦଣ୍ଡ ଭୋଗିବାକୁ ପଡ଼ିଛି। ବର୍ତ୍ତମାନ ଏହି ବୃଦ୍ଧଙ୍କ ଏକ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି।

ଏହି ଘଟଣାଟି ୧୯୯୨ ମସିହା ମେ' ୧୦ ତାରିଖର। ପାରିବାରିକ ବିବାଦକୁ କେନ୍ଦ୍ର କରି ଏକ ଦମ୍ପତିଙ୍କ ଉପରେ ଗୁଳିଚାଳନା ଏବଂ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିଲା। ଏହି ମାମଲାରେ ଗୋଟିଏ ପରିବାରର ୫ ଜଣଙ୍କୁ ଅଭିଯୁକ୍ତ ଦର୍ଶାଇ ଏଫଆଇଆର (FIR) ରୁଜୁ କରାଯାଇଥିଲା। ପୁଲିସ ପକ୍ଷରୁ ୧୯୯୩ ମସିହାରେ କୋର୍ଟରେ ଚାର୍ଜସିଟ୍ ଦାଖଲ କରାଯାଇଥିଲା। ତେବେ ମାମଲାର ଶୁଣାଣି ଚାଲିଥିବା ବେଳେ ୫ ଜଣ ଅଭିଯୁକ୍ତଙ୍କ ମଧ୍ୟରୁ ୪ ଜଣଙ୍କର ମୃତ୍ୟୁ ହୋଇସାରିଛି। କେବଳ ୮୫ ବର୍ଷୀୟ ଦୀପ ରାୟ ନାମକ ଜଣେ ବୃଦ୍ଧ ଜୀବିତ ଥିବାରୁ ଏବେ ତାଙ୍କୁ ଦଣ୍ଡିତ କରାଯାଇଛି।

ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, ବୃଦ୍ଧ ଜଣକ ହାତରେ ବାଡ଼ି ଏବଂ ଚପଲ ଧରି କୋର୍ଟ ପରିସରରୁ ବାହାରକୁ ଆସୁଛନ୍ତି। ତାଙ୍କର ଶାରୀରିକ ଅବସ୍ଥା ଏତେ ଦୁର୍ବଳ ଯେ ଉଠିବା ବସିବା ପାଇଁ ତାଙ୍କୁ ଦୁଇ ଜଣଙ୍କର ସାହାଯ୍ୟ ଦରକାର ପଡ଼ୁଛି। ତେବେ ଆଇନ ଆଗରେ ବୟସର ଅସହାୟତା କୌଣସି କାମରେ ଆସିନାହିଁ।

ଏହି ଘଟଣାଟି ବୈଶାଳୀ ଜିଲ୍ଲା ଅନ୍ତର୍ଗତ ରାଘୋପୁରର ଜୁଡାୱନପୁର ଅଞ୍ଚଳର। ସୋମବାର ଦିନ ଶୁଣାଣି ଶେଷ ହେବା ପରେ ଅତିରିକ୍ତ ଜିଲ୍ଲା ଦୌରା ଜଜ୍ ଆର୍ମ୍ସ ଆକ୍ଟ ଅଧୀନରେ ଦୀପ ରାୟଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଦୀର୍ଘ ୩୪ ବର୍ଷର ଲମ୍ବା ଆଇନଗତ ଲଢ଼େଇ ପରେ ଅଦାଲତ ଏହି ବଡ଼ ରାୟ ଶୁଣାଇଛନ୍ତି ।