ବିଜୁ ବାବୁଙ୍କୁ ନିନ୍ଦା ଓଡ଼ିଶାର ଅପମାନ; ବିଭ୍ରାନ୍ତିକାର ମନ୍ତବ୍ୟକୁ ନେଇ ବର୍ଷିଲା ବିଜେଡି

ଭୁବନେଶ୍ୱର: ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଉପରେ ଝାଡ଼ଖଣ୍ଡ ବିଜେପି ସାଂସଦ ନିଶିକାନ୍ତ ଦୁବେ ଦେଇଥିବା ବିବାଦୀୟ ମନ୍ତବ୍ୟକୁ ନେଇ ବର୍ଷିଲା ବିଜେଡି। ବିଜେଡିର ବରିଷ୍ଠ ନେତା ଦେବୀ ମିଶ୍ର ଓ ପ୍ରମିଳା ମଲ୍ଲିକ ସାମ୍ବାଦିକ ସମ୍ମିଳନୀ କରି ନିଶିକାନ୍ତ ଦୁବେ ନିସର୍ତ୍ତ କ୍ଷମା ପ୍ରାର୍ଥନା କରନ୍ତୁ ବୋଲି ଦାବି କରିଛନ୍ତି।

ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ଯେ, ନିଶିକାନ୍ତ ଦୁବେ ନିସର୍ତ୍ତ କ୍ଷମା ପ୍ରାର୍ଥନା କରନ୍ତୁ, ନଚେତ ବିଜେଡି ଏହାକୁ ଗ୍ରହଣ କରିବନି। ଆଗକୁ ସାଧାରଣ ଲୋକଙ୍କ ପାଖକୁ ଯିବ ଦଳ। ବିଜୁ ବାବୁ ଦେଶର ସମ୍ପଦ। ଭାରତ ମୁକ୍ତି ସଂଗ୍ରାମର ଅନନ୍ୟ ଯୋଦ୍ଧା। ସେ ଇଣ୍ଡୋନେସିଆର ଭୂମିପୁତ୍ର। ଜଣେ ସାହସିକ ନେତା। ତାଙ୍କ ନାଁରେ ସାଂସଦ ନିଶିକାନ୍ତ ଦୁବେ ଅରୁଚିକର ମନ୍ତବ୍ୟ ରଖିଥିଲେ। ଏହାକୁ ରାଜ୍ୟସଭାରେ ଦଳ ତରଫରୁ ରାଜ୍ୟସଭା ସାଂସଦମାନେ ନିନ୍ଦା କରିଛନ୍ତି। ଓଡ଼ିଶାରେ ବି ଏହାକୁ ନିନ୍ଦା କରାଯାଉଛି। ନିଶିକାନ୍ତ ଦୁବେ ମାନସିକ ବିକୃତ ପରି ମନ୍ତବ୍ୟ ଦେଇଥିବା ନବୀନ ପଟ୍ଟନାୟକ କହିଛନ୍ତି। 

ଯେଉଁମାନେ ଓଡ଼ିଆ ଅସ୍ମିତା କଥା କହି ଶାସନକୁ ଆସିଛନ୍ତି, ତାଙ୍କ ଦଳର ସାଂସଦଙ୍କ ପାଟିରୁ ପଦେ କଥା ବାହାରୁନି। ଆଜି ଏହାକୁ ସାରା ଓଡ଼ିଶା ନିନ୍ଦା କରିଛି। ଓଡ଼ିଶା କହିଲେ ଲୋକ ବିଜୁ ବାବୁଙ୍କୁ ଚିହ୍ନନ୍ତି। ସେ ଦେହ ତ୍ୟାଗ କଲା ବେଳେ ତିନୋଟି ରାଷ୍ଟ୍ରର ଜାତୀୟ ପତାକା ତାଙ୍କ ଉପରେ ପଡିଥିଲା। ଜଣେ ଏମପି ଏଭଳି ଅସମ୍ମାନଜନକ କଥା କହିବା ନିନ୍ଦନୀୟ। ସେ ଲୋକଙ୍କ ପାଖରେ ଓଡ଼ିଆ ଜାତି ପାଖରେ କ୍ଷମା ମାଗନ୍ତୁ। ନଚେତ ବିଜେଡି ଏହାକୁ ସହଜରେ ଗ୍ରହଣ କରି ନାହିଁ କି କରିବ ନାହିଁ। ବିଜେଡି ସାଧାରଣ ଲୋକଙ୍କ ପାଖକୁ ଯିବ। ତୁରନ୍ତ ସେ କ୍ଷମା ମାଗନ୍ତୁ।

ସେହିପରି ବରିଷ୍ଠ ବିଜେଡି ନେତା ଦେବୀ ମିଶ୍ର କହିଛନ୍ତି ଯେ, ବିଜୁ ବାବୁଙ୍କ ବିରୋଧରେ ଜଣେ ସାଂସଦ ଖରାପ ମନ୍ତବ୍ୟ ଦେଇଛନ୍ତି। ସେ ଇତିହାସ-ଭୂଗୋଳ ଜାଣିନାହାନ୍ତି। ମାନସିକ ବିକାରଗ୍ରସ୍ତ ଥାଇପାରନ୍ତି। ସେ ତାଙ୍କ ନେତାଙ୍କୁ ଖୁସି କରିବା ପାଇଁ ମଧ୍ୟ ଏମିତି କରିଥାଇପାରନ୍ତି। ଇତିହାସ ପୃଷ୍ଠା ଖୋଲିଲେ ଦେଖିବେ, ଇଣ୍ଡୋନେସିଆ ମୁକ୍ତି ସଂଗ୍ରାମରେ କେତେ ସାହାଯ୍ୟ କରିଥିଲେ ବିଜୁ ପଟ୍ଟନାୟକ। କିଛି ନ ଜାଣିଥିବା ଲୋକଟିଏ ବିଜୁ ପଟ୍ଟନାୟକଙ୍କୁ ଏଭଳି କଥା କହିବା ନିନ୍ଦନୀୟ। ନିଶିକାନ୍ତ ଦୁବେ ସବୁବେଳେ ନ୍ୟୁଜରେ ରହିବାକୁ ଚେଷ୍ଟା କରୁଛନ୍ତି। କିନ୍ତୁ ଜଣେ ମହାନ ସ୍ୱାଧୀନତା ସଂଗ୍ରାମୀଙ୍କ ପ୍ରତି ଏଭଳି ମନ୍ତବ୍ୟ କୁଶ୍ଚିତ ମାନସିକତାର ପରିଚୟ। ଏଥିପାଇଁ କ୍ଷମା ପ୍ରାର୍ଥନା କରିବା ଉଚିତ। ନଚେତ ତାଙ୍କ ନେତାମାନେ ହସ୍ତକ୍ଷେପ କରିବା ଦରକାର।