ଭୁବନେଶ୍ୱର: ବର୍ତ୍ତମାନ ରାଜ୍ୟର କିଛି ଅଞ୍ଚଳରେ ଗରମ ଲାଗି ରହିଛି। ତେବେ ଆସନ୍ତା ସପ୍ତାହରୁ ସାରା ରାଜ୍ୟରେ ତାପମାତ୍ରା ସ୍ୱାଭାବିକଠାରୁ ହ୍ରାସ ପାଇବାର ସମ୍ଭାବନା ରହିଛି। ଆକଳନ କରାଯାଉଛି ଯେ ଭୁବନେଶ୍ୱର ସମେତ ସମସ୍ତ ଉପକୂଳ ଜିଲ୍ଲାରେ ୨୫ ପରେ ଏବଂ ଉଭୟ ଦକ୍ଷିଣ ଓ ଉତ୍ତର ଆଭ୍ୟନ୍ତରୀଣରେ ୨୮ ପରେ ତାପମାତ୍ରା ବିଶେଷ ଭାବେ ହ୍ରାସ ହେବ ବୋଲି ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି। ତାଙ୍କ କହିବା ଅନୁଯାୟୀ ସମ୍ଭବତଃ ରାଜ୍ୟର ସବୁ ଜିଲ୍ଲାରେ ଦିନର ସର୍ବାଧିକ ତାପମାତ୍ରା ୪୦ ଡିଗ୍ରୀ ତଳେ ରହିବ। ଉପକୂଳ ଜିଲ୍ଲାଗୁଡିକରେ ୩୫ରୁ ୩୭ ଡିଗ୍ରୀ ସେଲ୍‌ଫସିୟସ ରହିବା ବେଳେ ଆଭ୍ୟନ୍ତରୀଣ ଜିଲ୍ଲାମାନଙ୍କରେ ଆଉ ୨ ଡିଗ୍ରୀ ସେଲ୍‌ଫସିୟସ ଅଧିକ ରହିପାରେ। ରାଜ୍ୟକୁ ୨୮ ପରେ ବଙ୍ଗୋପସାଗର ପବନ ବହିବ ଏବଂ ଏହା ଓଡ଼ିଶା ଦେଇ ସଂଲଗ୍ନ ରାଜ୍ୟମାନଙ୍କୁ ବହିବାର ସମ୍ଭାବନା ରହିଛି। ଉପକୂଳ ଓଡ଼ିଶାରେ ୨୯ ଓ ଆଭ୍ୟନ୍ତରୀଣ ଓଡ଼ିଶାରୁ ମେ ୧ରୁ କାଳବୈଶାଖୀ ବର୍ଷା ହେବାର ସମ୍ଭାବନା ରହିଛି। ତେବେ ସ୍ଥାନେ ସ୍ଥାନେ ଏହା ୩-୪ ଦିନ ଧରି ଲାଗିରହିପାରେ। ବର୍ଷାର ପରିମାଣ ଉପକୂଳ ଜିଲ୍ଲାମାନଙ୍କରେ ମଧ୍ୟମ ଧରଣର ହୋଇପାରେ।

ବର୍ଷାର ଉପଯୋଗ ପାଇଁ ଖରାଟିଆ ଚାଷୀମାନଙ୍କୁ ଡାଳୁଅ ଧାନ, ଚିନା ବାଦାମ ଆଦି ପାଚିଯାଇଥିଲେ ଅମଳ କରିଦେବାକୁ ପ୍ରଫେସର ପଶୁପାଳକ ପରାମର୍ଶ ଦେଇଛନ୍ତି। ଅନ୍ୟପଟେ ଏହି ବର୍ଷା ଜନିତ ସ୍ଥିତି ପାଇଁ ଚଳିତ ବର୍ଷ ଠିକ୍‍ ସମୟରେ ମୌସୁମୀ କେରଳ ଛୁଇଁବାର ସୂଚନା ମିଳୁଛି ବୋଲି ପ୍ରଫେସର ପଶୁପାଳକ କହିଛନ୍ତିା

ସେହିପରି ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ଅନୁଯାୟୀ ରାଜ୍ୟରେ ଆସନ୍ତା ଦୁଇ ଦିନ ମଧ୍ୟରେ ଅଳ୍ପ କିଛି ଅଞ୍ଚଳରେ ହାଲ୍‍କା ବର୍ଷା ହୋଇପାରୋ ମାତ୍ର ଏହା ପରେ ଅର୍ଥାତ ୨୫ ତାରିଖଠାରୁ ପୁଣି କାଳବୈଶାଖୀର ପ୍ରଭାବ ବଢ଼଼ିବ। ଏହାଦ୍ୱାରା ଦକ୍ଷିଣ ଓଡ଼ିଶାରେ ବର୍ଷା ହେବ। ସେହିପରି ୩-୪ ଦିନ ମଧ୍ୟରେ ଆଭ୍ୟନ୍ତରୀଣ ଓଡ଼ିଶାରେ ୨-୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବାର ଥିବା ବେଳେ ୨୪ ଘଣ୍ଟାମଧ୍ୟରେ ଉପକୂଳ ଓଡ଼ିଶାରେ ୩-୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ। ଗତ ୨୪ ଘଣ୍ଟା ମଧ୍ୟରେ ରାଜ୍ୟର କିଛି ସ୍ଥାନରେ ବର୍ଷା ହୋଇଥିବା ବେଳେ ତାପମାତ୍ରା ହ୍ରାସ ପାଇଛି। ବୌଦ୍ଧ ଓ ସୁନ୍ଦରଗଡରେ ତାପମାତ୍ରା ୪୦ ଡିଗ୍ରୀ ସେଲ୍‌ଫସିୟସ ଛୁଇଁଥିବା ବେଳେ ବାକି ସମସ୍ତ ଜିଲ୍ଲାରେ ପାରଦ ୪୦ ଡିଗ୍ରୀ ତଳେ ରହିଛି।