ନରମିଲା ଭାରତ : ୨୩ ବିଲିୟନ ଡଲାରର ଆମେରିକା ଉତ୍ପାଦ ଉପରୁ ଶୁଳ୍କ ହ୍ରାସ କରିବ

ନୂଆଦିଲ୍ଲୀ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏପ୍ରିଲ ୨ରୁ ଭାରତ ସମେତ ଅନେକ ଦେଶ ଉପରେ ଶୁଳ୍କ ଲାଗୁ କରିବାକୁ ଘୋଷଣା କରିଛନ୍ତି। ଏକ ରିପୋର୍ଟ ଅନୁଯାୟୀ, ଭାରତ ଆମେରିକାରୁ ଆସୁଥିବା ୨୩ ବିଲିୟନ ଡଲାର ମୂଲ୍ୟର ସାମଗ୍ରୀ ଉପରେ ଶୁଳ୍କ ହ୍ରାସ କରିବାକୁ ବିଚାର କରୁଛି। ଏହାର ଲକ୍ଷ୍ୟ ହେଉଛି ଭାରତରୁ ଆମେରିକାକୁ ହେଉଥିବା ୬୬ ବିଲିୟନ ଡଲାରର ରପ୍ତାନିକୁ ସୁରକ୍ଷାଦ୍ବୋ। ଚୀନ୍ ପରେ, ଆମେରିକା ହେଉଛି ଭାରତର ଦ୍ୱିତୀୟ ସର୍ବବୃହତ ବାଣିଜ୍ୟିକ ସହଯୋଗୀ। ଭାରତ ଏହାକୁ କୌଣସି ମୂଲ୍ୟରେ ହରାଇବାକୁ ଚାହୁଁନାହିଁ। ଦୁଇ ଦେଶ ମଧ୍ୟରେ ଏକ ବାଣିଜ୍ୟ ଚୁକ୍ତିନାମା ସମ୍ପର୍କରେ ଆଲୋଚନା ଚାଲିଛି।

ଭାରତ ଏହି ଚୁକ୍ତିର ପ୍ରଥମ ପର୍ଯ୍ୟାୟରେ ଆମେରିକାରୁ ଆସୁଥିବା ଅଧାରୁ ଅଧିକ ସାମଗ୍ରୀ ଉପରେ ଶୁଳ୍କ ହ୍ରାସ କରିବାକୁ ପ୍ରସ୍ତୁତ। ଏହି କଟକଣା ବହୁ ବର୍ଷ ମଧ୍ୟରେ ସବୁଠାରୁ ବଡ଼ ହେବ। ଏହାର ଉଦ୍ଦେଶ୍ୟ ହେଉଛି ଟ୍ରମ୍ପଙ୍କ ଦ୍ୱାରା ଲାଗୁ କରାଯାଇଥିବା ପ୍ରତିଶୋଧମୂଳକ ଶୁଳ୍କକୁ ଏଡାଇବା। ଏକ ବିଶ୍ଳେଷଣ ଅନୁଯାୟୀ, ଟ୍ରମ୍ପଙ୍କ ପ୍ରତିଶୋଧମୂଳକ ଶୁଳ୍କ ଭାରତର ଆମେରିକାକୁ ହେଉଥିବା ୬୬ ବିଲିୟନ ଡଲାରର ରପ୍ତାନିର ୮୭%କୁ ପ୍ରଭାବିତ କରିବ। ଭାରତ ଆମେରିକାରୁ ଆମଦାନୀ ହେଉଥିବା ୫୫% ସାମଗ୍ରୀ ଉପରେ ଶୁଳ୍କ ହ୍ରାସ କରିବାକୁ ରାଜି ହୋଇଛି। ବର୍ତ୍ତମାନ, ଏହି ସାମଗ୍ରୀ ଉପରେ ୫% ରୁ ୩୦% ପର୍ଯ୍ୟନ୍ତ ଶୁଳ୍କ ରହିଛି। ସୂତ୍ର ଅନୁଯାୟୀ, ଭାରତ ୨୩ ବିଲିୟନ ଡଲାରରୁ ଅଧିକ ମୂଲ୍ୟର ଆମେରିକୀୟ ସାମଗ୍ରୀ ଉପରେ ଶୁଳ୍କକୁ ଯଥେଷ୍ଟ ହ୍ରାସ କିମ୍ବା ସମ୍ପୂର୍ଣ୍ଣ ଭାବରେ ଉଚ୍ଛେଦ କରିବାକୁ ମଧ୍ୟ ଇଚ୍ଛୁକ।