ରାୟପୁର : ପୁଣିଥରେ ଗର୍ଜିଛି ପୂର୍ବତନ ଭାରତୀୟ ଓପନର୍ ବିରେନ୍ଦ୍ର ସେୱାଗଙ୍କ ବ୍ୟାଟ୍‌ । ଶୁକ୍ରବାର ରାୟପୁରରେ ଭାରତ ଲିଜେଣ୍ଡସ ଏବଂ ବାଂଲାଦେଶ ଲିଜେଣ୍ଡସ ମଧ୍ୟରେ ଚାଲିଥିବା ସଡକ ସୁରକ୍ଷା ୱାର୍ଲ୍ଡ ସିରିଜରେ ଭାରତ ୧୦ ୱିକେଟରେ ବିଜୟୀ ହୋଇଛି। ଏହି ମ୍ୟାଚ୍‌ରେ ବୀରେନ୍ଦ୍ର ସେହୱାଗଙ୍କ ବିସ୍ଫୋରକ ବ୍ୟାଟିଂ ପୁଣି ଦେଖିଲେ କ୍ରିକେଟପ୍ରେମୀ । ସଡ଼କ ସୁରକ୍ଷା ବିଶ୍ୱ ସିରିଜର ଚତୁର୍ଥ ମ୍ୟାଚରେ ଧୂଆଁଧାର ବ୍ୟାଟିଂ କରି ମାତ୍ର ୩୫ ବଲରେ ୮୦ ରନ୍ କରିଛନ୍ତି ବୀରେନ୍ଦ୍ର ସେହୱାଗ । ଆଉ ଏହାସହ ବାଂଲାଦେଶ ଲିଜେଣ୍ଡସକୁ ୧୦ ୱିକେଟରେ ହରାଇଛି ଭାରତ ଲିଜେଣ୍ଡସ । ଅନ୍ୟପଟେ ସଚିନ ତେନ୍ଦୁଲକର ୨୬ ବଲରୁ ଅପରାଜିତ ୩୩ ରନ୍ କରିଥିଲେ ।

ରାୟପୁରର ନବନିର୍ମିତ ସହୀଦ ବୀର ନାରାୟଣ ସିଂହ ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯାଇଥିବା ମୁକାବିଲରେ ଏହି ସିରିଜରେ ପ୍ରଥମେ ବ୍ୟାଟିଂ କରି ବାଂଲାଦେଶ ଲିଜେଣ୍ଡସ ୧୦୯ ରନ କରିବାକୁ ସକ୍ଷମ ହୋଇଥିଲା । ୧୧୦ ରନର ଟାର୍ଗେଟ ନେଇ ମୈଦାନକୁ ଓହ୍ଲାଇଥିଲା ଇଣ୍ଡିଆ ଲିଜେଣ୍ଡସ । ଦୁଇ ଓପନର ବୀରେନ୍ଦ୍ର ସେହୱାଗ ଓ ସଚିନ ତେନ୍ଦୁଲକର ବ୍ୟାଟିଂ କରିବାକୁ ଓହ୍ଲାଇବା ସହ ପୂରା ପଡ଼ିଆ ତାଳିମାଡରେ ପ୍ରକମ୍ପିତ ହୋଇଥିଲା । ଆଉ ଏହାସହ ଆରମ୍ଭ ହୋଇଥିଲା ସେହୱାଗ ସୋ’।

କ୍ରିକେଟରୁ ଅବସର ନେଇଥିଲେ ମଧ୍ୟ ବଦଳିନଥିଲା ସେହୱାଗଙ୍କ ଅନ୍ଦାଜ । ପ୍ରଥମ ବଲରେ ଚୌକା ମାରି ଇନିଂସ ଆରମ୍ଭ କରିଥିଲେ ସେହୱାଗ। ଆଉ ଏହାପରେ ଅଟକି ନଥିଲା ବୀରୁଙ୍କ ବ୍ୟାଟ୍ । ପ୍ରଥମ ଓଭରରେ ହିଁ ୧୯ ରନ କରିଥିଲା ଇଣ୍ଡିଆ ଲିଜେଣ୍ଡସ । ଆଉ ମାତ୍ର ୨୦ ବଲରେ ସେହୱାଗ ପୂରଣ କରିଥିଲେ ଅର୍ଦ୍ଧଶତକ । ଗୋଟିଏ ପଟେ ସଚିନ୍ ସର୍ତକତାର ସହ ବ୍ୟାଟିଂ କରୁଥିବା ବେଳେ ଅନ୍ୟପଟେ ସେହୱାଗ ପୁରୁଣା ଅନ୍ଦାଜରେ ଖେଳୁଥିଲେ ବଡ ବଡ ସଟ୍ । ଶେଷରେ ଛକା ମାରି ଇଣ୍ଡିଆ ଲିଜେଣ୍ଡସକୁ ବଡ ବିଜୟ ଭେଟି ଦେଇଥିଲେ ବୀରୁ ।

ଏହି ମ୍ୟାଚର ପ୍ରଥମ ଇନିଂସରେ ବାଂଲାଦେଶ ଲିଜେଣ୍ଡସ ୧୯.୪ ଓଭରରେ ୧୦୯ ରନ୍ ସଂଗ୍ରହ କରି ଆଉଟ୍ ହୋଇଥିଲେ। ବାଂଲାଦେଶ ପାଇଁ ନାଜିମୁଦ୍ଦିନ ୩୩ ବଲରୁ ୪୯ ରନ୍ କରିଥିଲେ। ତାଙ୍କ ବ୍ୟତୀତ ଅନ୍ୟ କୌଣସି ବ୍ୟାଟ୍ସମ୍ୟାନ୍ ବିଶେଷ କିଛି କରିପାରିନଥିଲେ। ଭାରତ ପାଇଁ ବିନୟ କୁମାର, ପ୍ରଜ୍ଞାନ୍ ଓଝା ଏବଂ ଯୁବରାଜ ସିଂ ଦୁଇଟି ଲେଖାଏଁ ୱିକେଟ୍ ନେଇଥିବାବେଳେ ମନପ୍ରୀତ ଗୋନି ଏବଂ ୟୁସୁଫ ପଠାନ ଗୋଟିଏ ଲେଖାଏଁ ୱିକେଟ୍ ନେଇଥିଲେ।