ବିଶ୍ୱକପ୍‌ରେ ଭାରତର ଧମାକାଦାର ଅଭିଯାନ: ଓପନରରେ ଅଷ୍ଟ୍ରେଲିଆ, ୩ ଦିନ ପରେ ପାକିସ୍ତାନ ସହ ମୁକାବିଲା

ଆନ୍ତର୍ଜାତୀୟ କ୍ରିକେଟ୍ ପରିଷଦ (ICC) ପକ୍ଷରୁ ୨୦୨୭ ପୁରୁଷ ଦିନିକିଆ ବିଶ୍ୱକପ୍‌ର କାର୍ଯ୍ୟସୂଚୀ ଘୋଷଣା କରାଯାଇଛି। ଆଗାମୀ ବିଶ୍ୱକପ୍ ଆଫ୍ରିକା ମହାଦେଶରେ ଖେଳାଯିବ, ଯେଉଁଥିରେ ଦକ୍ଷିଣ ଆଫ୍ରିକା, ଜିମ୍ବାୱେ ଏବଂ ନାମିବ୍ୟା ମିଳିତ ଭାବେ ଆୟୋଜନ କରିବେ। ଏହି ମେଗା ଇଭେଣ୍ଟ ଅକ୍ଟୋବର ୨ରୁ ଆରମ୍ଭ ହୋଇ ନଭେମ୍ବର ୨୧ ପର୍ଯ୍ୟନ୍ତ ଚାଲିବ। ଭାରତୀୟ କ୍ରିକେଟ୍ ଦଳ ନିଜର ଅଭିଯାନ ଅକ୍ଟୋବର ୭ ତାରିଖରୁ ଆରମ୍ଭ କରିବ ବୋଲି ସୂଚନା ମିଳିଛି।

ଟିମ୍ ଇଣ୍ଡିଆର କାର୍ଯ୍ୟସୂଚୀ ଏବଂ ଗ୍ରୁପ୍ ମ୍ୟାଚ୍

ବିଶ୍ୱକପ୍‌ର ଏହି ସଂସ୍କରଣରେ ଭାରତୀୟ ଦଳ ଗ୍ରୁପ୍-ଏରେ ସ୍ଥାନ ପାଇଛି। ଏହି ଗ୍ରୁପ୍‌ରେ ଭାରତ ସହିତ ଅଷ୍ଟ୍ରେଲିଆ, ପାକିସ୍ତାନ, ଆଫଗାନିସ୍ତାନ, ଜିମ୍ବାୱେ ଏବଂ ଏକ ଯୋଗ୍ୟତା ଅର୍ଜନକାରୀ ଦଳ (କ୍ୱାଲିଫାୟର୍) ରହିଛନ୍ତି। ଭାରତୀୟ ଦଳ ନିଜର ପ୍ରଥମ ମ୍ୟାଚ୍ ଅକ୍ଟୋବର ୭ ତାରିଖରେ କେପଟାଉନ୍ଠାରେ ଗତଥରର ବିଜେତା ଅଷ୍ଟ୍ରେଲିଆ ବିପକ୍ଷରେ ଖେଳିବ।

ଏହାପରେ, କ୍ରିକେଟ୍ ପ୍ରେମୀଙ୍କ ସବୁଠାରୁ ପ୍ରତୀକ୍ଷିତ ମ୍ୟାଚ୍ ଅକ୍ଟୋବର ୧୦ ତାରିଖରେ ଖେଳାଯିବ। ଏହି ଦିନ ଜୋହାନ୍ସବର୍ଗର ୱାଣ୍ଡରର୍ସ ଷ୍ଟାଡିୟମରେ ମୁହାଁମୁହିଁ ହେବେ ଚିରପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ।

ଭାରତର ଅନ୍ୟ ଗ୍ରୁପ୍ ମ୍ୟାଚ୍ ଗୁଡ଼ିକ ହେଲା:

* ୧୪ ଅକ୍ଟୋବର: ଭାରତ ବନାମ ଆଫଗାନିସ୍ତାନ (ସେଞ୍ଚୁରିୟନ୍)

* ୧୭ ଅକ୍ଟୋବର: ଭାରତ ବନାମ କ୍ୱାଲିଫାୟର୍ ଏ (ବ୍ଲୁମଫୋଣ୍ଟେନ୍)

* ୨୪ ଅକ୍ଟୋବର: ଭାରତ ବନାମ ଜିମ୍ବାୱେ (ଭିକ୍ଟୋରିଆ ଫଲ୍ସ)

ସୁପର-୭ ଏବଂ ପୁଣିଥରେ ଭାରତ-ପାକ୍ ଟକ୍କର ସମ୍ଭାବନା

ନୂତନ ଫର୍ମାଟ୍ ଅନୁଯାୟୀ, ଉଭୟ ଗ୍ରୁପ୍‌ର ଶ୍ରେଷ୍ଠ ୩ଟି ଲେଖାଏଁ ଦଳ ଏବଂ ସବୁଠାରୁ ଭଲ ପ୍ରଦର୍ଶନ କରିଥିବା ଗୋଟିଏ ଚତୁର୍ଥ ସ୍ଥାନର ଦଳ ସୁପର-୭ ପର୍ଯ୍ୟାୟକୁ ଉନ୍ନୀତ ହେବେ। ଯଦି ଭାରତ ଏବଂ ପାକିସ୍ତାନ ଉଭୟ ସୁପର-୭ ପର୍ଯ୍ୟାୟରେ ପହଞ୍ଚନ୍ତି, ତେବେ ନଭେମ୍ବର ୭ ତାରିଖରେ କେପଟାଉନ୍‌ଠାରେ ପୁଣିଥରେ ଏହି ଦୁଇ ଦଳ ମଧ୍ୟରେ କଡ଼ା ମୁକାବିଲା ହେବାର ସମ୍ଭାବନା ରହିଛି।

ସେମିଫାଇନାଲ୍ ଏବଂ ଫାଇନାଲ୍ ମୁକାବିଲା

ଟୁର୍ଣ୍ଣାମେଣ୍ଟର ପ୍ରଥମ ସେମିଫାଇନାଲ୍ ମ୍ୟାଚ୍ ନଭେମ୍ବର ୧୭ ତାରିଖରେ କେପଟାଉନ୍‌ରେ ଏବଂ ଦ୍ୱିତୀୟ ସେମିଫାଇନାଲ୍ ନଭେମ୍ବର ୧୮ ତାରିଖରେ ସେଞ୍ଚୁରିୟନ୍‌ରେ ଖେଳାଯିବ। ସେହିପରି, ମେଗା ଫାଇନାଲ୍ ମୁକାବିଲା ନଭେମ୍ବର ୨୧ ତାରିଖରେ ଜୋହାନ୍ସବର୍ଗର ୱାଣ୍ଡରର୍ସ ଷ୍ଟାଡିୟମରେ ଅନୁଷ୍ଠିତ ହେବ।

ସମଗ୍ର ବିଶ୍ୱକପ୍ ସମୁଦାୟ ୧୨ଟି ଭେନ୍ୟୁରେ ଖେଳାଯିବ, ଯେଉଁଥିରେ ଦକ୍ଷିଣ ଆଫ୍ରିକାର ୮ଟି, ଜିମ୍ବାୱେର ୩ଟି ଏବଂ ନାମିବ୍ୟାର ଗୋଟିଏ ଷ୍ଟାଡିୟମ୍ ସାମିଲ ରହିଛି। ଚଳିତ ଥର ବିଶ୍ୱକପ୍‌ର ଥିମ୍ 'ଥ୍ରୀ ନେସନ୍ସ, ୱାନ୍ ହାର୍ଟବିଟ୍' ରଖାଯାଇଛି।