ନୂଆଦିଲ୍ଲୀ : ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ଭାରତୀୟ ସାମରିକ ଆକ୍ରମଣର ଭୟକୁ ସ୍ୱୀକାର କରିଛନ୍ତି। ନ୍ୟୁଜ୍ ଏଜେନ୍ସି ରଏଟର୍ସ ଅନୁଯାୟୀ, ଆସିଫ୍ ସୋମବାର କହିଥିଲେ ଯେ ଭାରତରୁ ଆକ୍ରମଣ ନିଶ୍ଚିତ ଏବଂ ଏହା ଖୁବ୍‌ଶୀଘ୍ର ହେବ। ଭାରତରୁ ଆକ୍ରମଣ ଆଶଙ୍କାକୁ ଦୃଷ୍ଟିରେ ରଖି ପାକିସ୍ତାନର ପ୍ରସ୍ତୁତି ବିଷୟରେ ମଧ୍ୟ ଖୱାଜା ଆସିଫ୍ ସୂଚନା ଦେଇଥିଲେ। ସେ କହିଛନ୍ତି, “ଭାରତରୁ ଆକ୍ରମଣ ନିଶ୍ଚିତ ହୋଇଥିବାରୁ ଆମେ ଆମର ସୁରକ୍ଷା ବାହିନୀକୁ ମଜବୁତ କରିବା ଆରମ୍ଭ କରିଛୁ। ଏହି ପରିସ୍ଥିତିରେ, କିଛି କୂଟନୈତିକ ନିଷ୍ପତ୍ତି ନେବାକୁ ପଡିବ ଏବଂ ଏହି ନିଷ୍ପତ୍ତି ନିଆଯାଉଛି।”

ସେ କହିଛନ୍ତି ଯେ ପାକିସ୍ତାନୀ ସେନା ଭାରତରୁ ଯେକୌଣସି ପ୍ରକାରର ଆକ୍ରମଣର ସମ୍ଭାବନା ବିଷୟରେ ସରକାରଙ୍କୁ ସୂଚନା ଦେଇଛି। ତଥାପି, ଆସିଫ୍ ଏହି ପ୍ରସଙ୍ଗରେ ଅଧିକ ସୂଚନା ଦେଇ ନଥିଲେ। ଆସିଫ୍ କହିଛନ୍ତି ଯେ ପାକିସ୍ତାନ ହାଇ ଆଲର୍ଟରେ ଅଛି ଏବଂ ଆମର ଅସ୍ତିତ୍ୱ ବିପଦରେ ପଡ଼ିଲେ ହିଁ ଆମେ ଆମର ପରମାଣୁ ଅସ୍ତ୍ରଶସ୍ତ୍ର ଭଣ୍ଡାର ବ୍ୟବହାର କରିବୁ।

ଉଲ୍ଲେଖନୀୟ ଯେ ଜମ୍ମୁ-କାଶ୍ମୀରର ପହଲଗାମରେ ୨୨ ଏପ୍ରିଲରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ। ଏହି ଘଟଣାରେ ପାକିସ୍ତାନର ହାତ ଥିବା ଜଣାପଡ଼ିଯାଇଛି। ଭାରତ ପ୍ରକାଶ କରିଛି ଯେ ମୋଟ ଚାରି ଜଣ ଆତଙ୍କବାଦୀଙ୍କ ମଧ୍ୟରୁ ଦୁଇଜଣ ପାକିସ୍ତାନୀ। ଏହି ଘଟଣାକୁ ଦୃଷ୍ଟିରେ ରଖି, ଭାରତ ପାକିସ୍ତାନ ବିରୁଦ୍ଧରେ ଗୋଟିଏ ପରେ ଗୋଟିଏ କାର୍ଯ୍ୟାନୁଷ୍ଠାନ ଜାରି ରଖିଛି ଏବଂ  ସିନ୍ଧୁ ଜଳ ଚୁକ୍ତିନାମା ରଦ୍ଧ  କରିବା ପରେ, ସୋମବାର ଦିନ ପାକିସ୍ତାନୀ ୟୁଟ୍ୟୁବ୍ ଚ୍ୟାନେଲଗୁଡ଼ିକୁ ମଧ୍ୟ ଭାରତରେ ବନ୍ଦ କରିଦେଇଛି।

ଏହା ଉଲ୍ଲେଖନୀୟ ଯେ ଖୱାଜା ଆସିଫ୍ ପୂର୍ବରୁ ତାଙ୍କର ଏକ ବିବୃତ୍ତି ମାଧ୍ୟମରେ ସାର୍ବଜନୀନ ଭାବରେ ସ୍ୱୀକାର କରିଥିଲେ ଯେ ପାକିସ୍ତାନ ସରକାର ଗତ ତିନି ଦଶନ୍ଧି ଧରି ଆତଙ୍କବାଦୀ ସଂଗଠନଗୁଡ଼ିକୁ ସମର୍ଥନ ଏବଂ ତାଲିମ ଦେବାର ‘ଘୃଣ୍ୟ କାମ’ କରିଆସୁଛି।

ଭାରତକୁ ରୋକିବା ପାଇଁ ଚୀନ୍ ଏବଂ ରୁଷର ଗୋଡ ତଳେ ପଡ଼ିଗଲା ପାକିସ୍ତାନ

ଋଷର ସରକାରୀ ସମାଚାର ଏଜେନ୍ସି RIA ନୋଭୋସ୍ତିକୁ ଏକ ସାମ୍ପ୍ରତିକ ସାକ୍ଷାତକାରରେ, ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ୍ ପହଲଗାମ ଆକ୍ରମଣର ଅନ୍ତର୍ଜାତୀୟ ତଦନ୍ତରେ ଚୀନ୍ ଏବଂ ରୁଷର ସମ୍ପୃକ୍ତି ବିଷୟରେ କହିଥିଲେ। ସେ କହିଥିଲେ ଯେ ମୁଁ ଭାବୁଛି ରୁଷ କିମ୍ବା ଚୀନ କିମ୍ବା ଏପରିକି ପାଶ୍ଚାତ୍ୟ ଦେଶଗୁଡ଼ିକ ଏହି ସଙ୍କଟରେ ବହୁତ ସକାରାତ୍ମକ ଭୂମିକା ଗ୍ରହଣ କରିପାରିବେ। ସେମାନେ ଏକ ତଦନ୍ତ ଦଳ ମଧ୍ୟ ଗଠନ କରିପାରିବେ ଯାହାକୁ ଭାରତ ମିଛ କହୁଛି ନା ସତ କହୁଛି ତାହା ତଦନ୍ତ କରିବା ପାଇଁ ଦାୟିତ୍ୱ ଦିଆଯିବା ଉଚିତ। ସେ କହିଥିଲେ ଯେ ଏକ ଅନ୍ତର୍ଜାତୀୟ ଦଳକୁ ଏହି ଘଟଣାର ତଦନ୍ତ କରିବାକୁ ଦିଅନ୍ତୁ।

ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ କହିଛନ୍ତି ଯେ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ ମଧ୍ୟ ଅନ୍ତର୍ଜାତୀୟ ତଦନ୍ତର ପ୍ରସ୍ତାବ ଦେଇଛନ୍ତି। ଏଥିରେ ପାକିସ୍ତାନ ଜଡିତ ଥିବାର କିଛି ପ୍ରମାଣ ନିଶ୍ଚୟ ଅଛି କିମ୍ବା ଏହି ଲୋକମାନଙ୍କୁ ପାକିସ୍ତାନର ସମର୍ଥନ ଥିଲା ଏଗୁଡ଼ିକ କେବଳ ଫମ୍ପା ବକ୍ତବ୍ୟ, ତାହା ଛଡା ଅନ୍ୟ କିଛି ନୁହେଁ।