ନୂଆ ଦିଲ୍ଲୀ: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଶ୍ଚର୍ୟ୍ୟ ପ୍ରକଟ କରି ଏହା ପ୍ରଶ୍ନ କରିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ କ’ଣ ଭଗବାନ ନା ‘ମହାମାନବ’ ଯିଏ ବିଧାନସଭା ନିର୍ବାଚନରେ ​​ବିଜେପିର ବିଜୟ ଦାବି କରୁଛନ୍ତି । ଯେତେବେଳେକି ପଶ୍ଚିମବଙ୍ଗର ଆଉ ୬ ଟି ପର୍ଯ୍ୟାୟ ନିର୍ବାଚନ ଏବେବି ବାକି ଅଛି । ହୁଗୁଳି ଜିଲ୍ଲାରେ ଏକ ନିର୍ବାଚନୀ ସମାବେଶକୁ ସମ୍ବୋଧିତ କରି ତୃଣମୂଳ କଂଗ୍ରେସ ସଭାପତି ମମତା ବାନାର୍ଜୀ ଭାରତୀୟ ସେକ୍ୟୁଲାର୍ ଫ୍ରଣ୍ଟ (ଆଇଏସ୍ଏଫ୍) ଓ ଏହାର ପ୍ରତିଷ୍ଠାତା ଅବ୍ବାସ ସିଦ୍ଦିକିଙ୍କ ନାମ ନ ନେଇ କହିଛନ୍ତି ଯେ ସଂଖ୍ୟାଲଘୁ ଭୋଟ୍ ଭଙ୍ଗ କରିବା ପାଇଁ ବିଜେପି ଏପରି ‘ବ୍ୟକ୍ତି’କୁ ଟଙ୍କା ଦେଉଛି ।

ସୂଚନାଯୋଗ୍ୟ ପ୍ରଧାନମନ୍ତ୍ରୀ ମୋଦୀ ଶନିବାର ଏକ ନିର୍ବାଚନ ରାଲିରେ କହିଥିଲେ ଯେ ସେ ପଶ୍ଚିମବଙ୍ଗରେ ବିଜେପି ସରକାରଙ୍କ ଶପଥ ଗ୍ରହଣ ସମାରୋହରେ ଯୋଗଦେବେ ଓ ଯଥାଶୀଘ୍ର ପ୍ରଧାନମନ୍ତ୍ରୀ କିସନ ନିଧି ଯୋଜନା ପଶ୍ଚିମବଙ୍ଗରେ କାର୍ଯ୍ୟକାରୀ ହେବ । ଏହି ବିବୃତ୍ତିକୁ ଦର୍ଶାଇ ବାନାର୍ଜୀ କହିଛନ୍ତି, “ଆପଣ (ମୋଦୀ) ନିଜକୁ ନିଜ କ’ଣ ଭାବୁଛନ୍ତି , ଆପଣ ଭଗବାନ ନା ମହାମାନବ?’

ମମତା ବାନାର୍ଜୀ ଅଭିଯୋଗ କରିଛନ୍ତି ଯେ ବାଂଲାଦେଶର ପ୍ରଥମ ପ୍ରଧାନମନ୍ତ୍ରୀ ଶେଖ ମୁଜିବୁର ରହମାନଙ୍କ ଶତବାର୍ଷିକୀ ଅବସରରେ ମୋଦୀଙ୍କ ପଡୋଶୀ ଦେଶ ଗସ୍ତ ସେଠାରେ ଦଙ୍ଗା ସୃଷ୍ଟି କରିଛି । ବାନାର୍ଜୀ ପରୋକ୍ଷରେ ସିଦ୍ଦିକିଙ୍କୁ ଟାର୍ଗେଟ କରି କହିଛନ୍ତି, “ଜଣେ ନୂଆ ବ୍ୟକ୍ତି ଆସିଛି, ଯିଏ ରାଜ୍ୟରେ ସଂଖ୍ୟାଲଘୁ ଭୋଟ୍ ବଣ୍ଟନ କରିବାକୁ ଚେଷ୍ଟା କରୁଛି ଓ ଏଥିପାଇଁ ବିଜେପିରୁ ଟଙ୍କା ପାଉଛନ୍ତି ।”

ସିଦ୍ଦିକି ନେତୃତ୍ୱାଧୀନ ଆଇଏସ୍ଏଫର ସିପିଆଇ (ଏମ୍) ଓ କଂଗ୍ରେସ ସହିତ ଏକ ମେଣ୍ଟ ଅଛି । ବାନାର୍ଜୀ ଗୁରୁତ୍ୱାରୋପ କରି କହିଛନ୍ତି ଯେ ସେ ଏକ ସାମ୍ପ୍ରଦାୟିକ ବିବୃତ୍ତି କରୁଛନ୍ତି, କିନ୍ତୁ ଏହାର କୌଣସି ପ୍ରଭାବ ପଡ଼ିବ ନାହିଁ । ସେ ଦାବି କରିଛନ୍ତି ଯେ କେନ୍ଦ୍ର ପୁଲିସ ଅଧିକାରୀ ତଦାରଖ କରିବା ପାଇଁ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେଉଛନ୍ତି ।