ଆମେରିକା-ଇରାନ ଯୁଦ୍ଧ ମଧ୍ୟରେ ବଡ଼ ନିଷ୍ପତ୍ତି: ଗୁରୁତ୍ୱପୂର୍ଣ୍ଣ ପେଟ୍ରୋକେମିକାଲ୍ସ ଉପରୁ ସୀମା ଶୁଳ୍କ ଛାଡ଼ କଲେ କେନ୍ଦ୍ର ସରକାର

ଆମେରିକା ଏବଂ ଇରାନ ମଧ୍ୟରେ ଲାଗି ରହିଥିବା ଯୁଦ୍ଧ ଯୋଗୁଁ ବିଶ୍ୱ ଯୋଗାଣ ଶୃଙ୍ଖଳା ଗମ୍ଭୀର ଭାବେ ପ୍ରଭାବିତ ହୋଇଛି। ଏହି ସଙ୍କଟ ସମୟରେ ଘରୋଇ ଉଦ୍ୟୋଗଗୁଡ଼ିକୁ ସୁରକ୍ଷା ଦେବା ପାଇଁ ଭାରତ ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ କେତେକ ଗୁରୁତ୍ୱପୂର୍ଣ୍ଣ ପେଟ୍ରୋକେମିକାଲ୍ (petrochemical) ସାମଗ୍ରୀ ଉପରୁ ସମ୍ପୂର୍ଣ୍ଣ ରୂପେ ସୀମା ଶୁଳ୍କ ଛାଡ଼ କରାଯାଇଛି। ସରକାରଙ୍କ ଏହି ରିହାତି ଏପ୍ରିଲ ୨ରୁ ଆରମ୍ଭ ହୋଇ ଜୁନ ୩୦, ୨୦୨୬ ପର୍ଯ୍ୟନ୍ତ ବଳବତ୍ତର ରହିବ।

ନିଷ୍ପତ୍ତିର କାରଣ ଏବଂ ଲକ୍ଷ୍ୟ

ଆମେରିକା ଏବଂ ଇସ୍ରାଏଲର ଆକ୍ରମଣ ପରେ ଇରାନ ହରମୁଜ୍ ପ୍ରଣାଳୀ (Strait of Hormuz) କୁ ବନ୍ଦ କରିଦେଇଛି। ଫଳରେ ସାମୁଦ୍ରିକ ବାଣିଜ୍ୟ ପଥ ବାଧାପ୍ରାପ୍ତ ହେବା ସହ ସାରା ବିଶ୍ୱରେ ଶକ୍ତି ସମ୍ବନ୍ଧୀୟ ଶିଳ୍ପଗୁଡ଼ିକର କଞ୍ଚାମାଲ ଦର ବୃଦ୍ଧି ପାଇଛି। ଅର୍ଥ ମନ୍ତ୍ରଣାଳୟ ଅନୁଯାୟୀ, ଦେଶରେ ଗୁରୁତ୍ୱପୂର୍ଣ୍ଣ ପେଟ୍ରୋକେମିକାଲ୍ସର ନିରନ୍ତର ଉପଲବ୍ଧତା ସୁନିଶ୍ଚିତ କରିବା, ମୂଲ୍ୟ ବୃଦ୍ଧିକୁ ନିୟନ୍ତ୍ରଣ କରିବା ଏବଂ ମୁଦ୍ରାସ୍ଫୀତି ଆଶଙ୍କାକୁ ଦୂର କରିବା ପାଇଁ ଏହି ସାମୟିକ ରିହାତି ପ୍ରଦାନ କରାଯାଇଛି।

କେଉଁ ସାମଗ୍ରୀ ଶସ୍ତା ହେବ?

ସରକାରୀ ବିଜ୍ଞପ୍ତି ଅନୁଯାୟୀ, ସମୁଦାୟ ୪୦ଟି ସାମଗ୍ରୀ ଉପରୁ ସୀମା ଶୁଳ୍କ ଛାଡ଼ କରାଯାଇଛି। ଏଥିରେ ମିଥାନଲ୍, ଆନହାଇଡ୍ରସ୍ ଆମୋନିଆ, ଟଲ୍ୟୁଇନ୍, ଷ୍ଟାଇରିନ୍, ପିଭିସି (PVC), ଡାଇକ୍ଲୋରୋମିଥେନ୍, ଭିନାଇଲ୍ କ୍ଲୋରାଇଡ୍ ମୋନୋମର୍ ଏବଂ ଆସେଟିକ୍ ଏସିଡ୍ ପରି ଗୁରୁତ୍ୱପୂର୍ଣ୍ଣ ରାସାୟନିକ ପଦାର୍ଥ ଅନ୍ତର୍ଭୁକ୍ତ ରହିଛି। ଏହା ବ୍ୟତୀତ ସରକାର ଏହି ସମୟସୀମା ପାଇଁ ଆମୋନିୟମ୍ ନାଇଟ୍ରେଟ୍ ଉପରୁ କୃଷି ଭିତ୍ତିଭୂମି ଏବଂ ବିକାଶ ସେସ୍ ମଧ୍ୟ ହ୍ରାସ କରିଛନ୍ତି।

କେଉଁ କ୍ଷେତ୍ରକୁ ମିଳିବ ଫାଇଦା?

ପେଟ୍ରୋକେମିକାଲ୍ କଞ୍ଚାମାଲ ଆମଦାନୀ ଉପରେ ଭାରତ ଅଧିକ ନିର୍ଭରଶୀଳ। ସରକାରଙ୍କ ଏହି ପଦକ୍ଷେପ ଦ୍ୱାରା ଏହା ଉପରେ ନିର୍ଭର କରୁଥିବା ପ୍ଲାଷ୍ଟିକ୍, ପ୍ୟାକେଜିଂ, ବୟନ ଶିଳ୍ପ, ଔଷଧ ନିର୍ମାଣ, ରାସାୟନିକ ପଦାର୍ଥ ଏବଂ ଅଟୋମୋବାଇଲ୍ ପାର୍ଟସ୍ ନିର୍ମାଣ ଆଦି କ୍ଷେତ୍ର ବ୍ୟାପକ ଭାବେ ଲାଭବାନ ହେବେ। ଅଶୋଧିତ ତୈଳ ଏବଂ ପ୍ରାକୃତିକ ଗ୍ୟାସର ଦର ବୃଦ୍ଧିର ପ୍ରଭାବରୁ ଛୋଟ ଏବଂ ମଧ୍ୟମ ଧରଣର ଶିଳ୍ପଗୁଡ଼ିକୁ ସୁରକ୍ଷା ମିଳିପାରିବ ଏବଂ ଶେଷରେ ଉପଭୋକ୍ତାମାନଙ୍କ ଉପରେ ମଧ୍ୟ ମୂଲ୍ୟବୃଦ୍ଧିର ବୋଝ କମ୍ ପଡ଼ିବ ବୋଲି ଆଶା କରାଯାଉଛି |