ଖାରକିଭ୍‌ରେ ରୁଷର ଡ୍ରୋନ୍‌ ଆକ୍ରମଣ: ବାପା ଓ ୩ ଶିଶୁଙ୍କ ମୃତ୍ୟୁ, ଗର୍ଭବତୀ ମାଆ ଗୁରୁତର

ରୁଷ-ୟୁକ୍ରେନ ଯୁଦ୍ଧ ମଧ୍ୟରେ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ୟୁକ୍ରେନର ଖାରକିଭ୍ ଅଞ୍ଚଳରେ ରୁଷ ପକ୍ଷରୁ କରାଯାଇଥିବା ଏକ ଭୟଙ୍କର ଡ୍ରୋନ୍ ଆକ୍ରମଣରେ ଗୋଟିଏ ପରିବାର ଛାରଖାର ହୋଇଯାଇଛି। ଏହି ଆକ୍ରମଣରେ ଜଣେ ବ୍ୟକ୍ତି ଏବଂ ତାଙ୍କର ତିନିଜଣ ଛୋଟ ପିଲାଙ୍କର ମୃତ୍ୟୁ ଘଟିଥିବା ବେଳେ, ମୃତକଙ୍କ ଗର୍ଭବତୀ ପତ୍ନୀ ଗୁରୁତର ଭାବେ ଆହତ ହୋଇଛନ୍ତି।

ପରିବାର ଉପରେ କାଳ ସାଜିଲା ଡ୍ରୋନ୍‌

ରିପୋର୍ଟ ଅନୁଯାୟୀ, ଖାରକିଭ୍‌ର ବୋଗୋଡୁଖିଭ୍ (Bohodukhiv) ସହରରେ ଏହି ଅଘଟଣ ଘଟିଛି। ମଙ୍ଗଳବାର ବିଳମ୍ବିତ ରାତିରେ ଏକ ରୁଷୀୟ ଡ୍ରୋନ୍‌ ପରିବାରର ଘର ଉପରେ ମାଡ଼ ହୋଇଥିଲା। ଫଳରେ ଘରଟି ସମ୍ପୂର୍ଣ୍ଣ ରୂପେ ଧ୍ୱଂସ ହୋଇଯିବା ସହ ନିଆଁ ଲାଗିଯାଇଥିଲା। ଧ୍ୱଂସାବଶେଷ ତଳୁ ଉଦ୍ଧାରକାରୀ ଦଳ ୩୪ ବର୍ଷୀୟ ବାପା ହ୍ରିହୋରି (Hryhorii) ଏବଂ ତାଙ୍କର ତିନି ସନ୍ତାନଙ୍କ ମୃତଦେହ ଉଦ୍ଧାର କରିଛନ୍ତି। ମୃତକ ଶିଶୁମାନଙ୍କ ମଧ୍ୟରେ ୨ ବର୍ଷର ଦୁଇ ଜାଆଁଳା ପୁଅ ଇଭାନ ଓ ଭ୍ଲାଦିସ୍ଲାଭ ଏବଂ ୧ ବର୍ଷର ଝିଅ ମାଇରୋସ୍ଲାଭା ଅନ୍ତର୍ଭୁକ୍ତ।

ଗର୍ଭବତୀ ମାଆଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ

ଏହି ଭୟଙ୍କର ବିସ୍ଫୋରଣରୁ ପିଲାମାନଙ୍କ ମାଆ ଓଲ୍‌ହା (Olha) ଅଳ୍ପକେ ବର୍ତ୍ତି ଯାଇଛନ୍ତି। ସେ ୩୫ ସପ୍ତାହର ଗର୍ଭବତୀ ଅଛନ୍ତି। ଉଦ୍ଧାରକାରୀ ଦଳ ତାଙ୍କୁ ଭଗ୍ନାବଶେଷ ତଳୁ ଜୀବନ୍ତ ଉଦ୍ଧାର କରିଥିଲେ ମଧ୍ୟ ସେ ଗୁରୁତର ଆହତ ହୋଇଛନ୍ତି। ତାଙ୍କ ମୁଣ୍ଡରେ ଗଭୀର ଆଘାତ ଲାଗିବା ସହ ଶରୀରର ବିଭିନ୍ନ ସ୍ଥାନ ପୋଡ଼ି ଯାଇଥିବା ସୂଚନା ମିଳିଛି। ସ୍ଥାନୀୟ ପ୍ରଶାସନ ଅନୁଯାୟୀ, ଏହି ପରିବାର ନିକଟରେ ଯୁଦ୍ଧକ୍ଷେତ୍ରରୁ ରକ୍ଷା ପାଇବା ପାଇଁ ଏହି ସ୍ଥାନକୁ ସ୍ଥାନାନ୍ତରିତ ହୋଇଥିଲେ, କିନ୍ତୁ ଦୁର୍ଭାଗ୍ୟବଶତଃ ଏଠାରେ ମଧ୍ୟ ସେମାନେ ରୁଷୀୟ ଆକ୍ରମଣର ଶିକାର ହେଲେ।

୧୨୯ଟି ଡ୍ରୋନ୍‌ ଆକ୍ରମଣ କଲା ରୁଷ

ୟୁକ୍ରେନ୍ ବାୟୁସେନା ସୂଚନା ଦେଇଛି ଯେ, ରୁଷ ଗତ ରାତିରେ ୟୁକ୍ରେନ୍ ଉପରେ ମୋଟ ୧୨୯ଟି 'ଶାହେଦ୍' (Shahed) ଡ୍ରୋନ୍ ଦ୍ୱାରା ଆକ୍ରମଣ କରିଥିଲା। ସେଥିମଧ୍ୟରୁ ୧୧୨ଟି ଡ୍ରୋନ୍‌କୁ ୟୁକ୍ରେନ୍ ସେନା ଖସାଇ ଦେବାରେ ସଫଳ ହୋଇଛି। ତେବେ କିଛି ଡ୍ରୋନ୍ ଆବାସିକ ଅଞ୍ଚଳରେ ପଡ଼ିବା ଯୋଗୁଁ ସାଧାରଣ ନାଗରିକଙ୍କ ଜୀବନହାନି ଘଟିଛି। ରାଷ୍ଟ୍ରପତି ଭୋଲୋଦିମିର ଜେଲେନ୍ସ୍କି ଏହି ଘଟଣାକୁ ନିନ୍ଦା କରିବା ସହ ରୁଷ ଉପରେ ଚାପ ପ୍ରୟୋଗ କରିବାକୁ ବିଶ୍ୱ ସମୁଦାୟକୁ ଆହ୍ୱାନ ଦେଇଛନ୍ତି।